Arquivo da categoría: Diario de Ferrol

Ferrol Blues

Poblicado o por
Resposta

Levamos anos alimentando ese blues que fala da perda de habitantes e capacidades de Ferrol. As últimas estadísticas do INE van nesa liña. É certo que hai datos obxectivos, pero un sempre aposta por reverter a proba de cargo.

Para a miña xeración, a do “Baby Boom”, a cidade era un espazo de liberdade vital para desenvolver un proxecto de vida. Mais, agora esta Galicia “urbanizada” do século XXI é unha garantía de calidade de vida, practicamente en calquera sitio. No noso caso, seguramente, terá razón o profesor Fra Molinero que di que debemos tomar como referencia os movementos poboacionais na comarca.

Houbo quen soubo aproveitar a baixa autoestima ferrolá, “vendendo” supostos mellores prezos na vivenda e “mellores” servizos locais. En calquera caso, o primeiro é deixar atrás o Ferrol queixoso. A cidade ten moito que ofrecer coma calquera grande cidade europea. Só temos que traballar, apostar e crer en nós.

https://www.diariodeferrol.com/texto-diario/mostrar/2935435/ferrol-blues

Alcaldables

Poblicado o por
Resposta

A metade do mandato chegou e comezan a aparecer as primeiras enquisas, que xa están a condicionar a política local. A verdade que sabemos aquelo que todos intuíamos: a data de hoxe, Ángel Mato ten máis posibilidades que ningún outro de seguir sendo alcalde. Pero, aínda hai xogo no campo.

José Manuel Rey está de sorte porque ten opcións e, iso, vaille traer os mimos do PP galego e do presidente da Xunta Alberto Núñez Feijóo. Pero, depende en grande medida da capacidade de colaboración na esquerda ferrolá.

Os socialistas teñen que implementar o cumprimento do seu programa electoral, erro sería adoptar unha actitude conservadora, pese á complicada situación na Corporación de Ferrol cun goberno en minoría. En FeC necesitan reformular a súa estratexia e no BNG un pouco máis de ambición e, ambos os dous, asumir que non son a alternativa. É todos darse conta de que a cidadanía reclama sumas e acordos.

https://www.diariodeferrol.com/texto-diario/mostrar/2928239/alcaldables

Axuda no fogar

Poblicado o por
Resposta

Se a política municipal ten sentido é precisamente para traballar pola cidadanía, e unha sociedade que mereza o nome como tal debe prestar especial atención aos máis vulnerables. Por iso resulta curioso que todo aquelo que ten que ver coa área de Benestar Social sexa sempre o “patito feo” e nunca se poña a súa labor en valor.

Estes días vense de aprobar o novo servizo de axuda no fogar. Un dos máis importantes contratos que vai redundar nun beneficio directo á cidadanía, pero tamén ás propias traballadoras (maioritariamente son mulleres) que estarán subrogadas e con mellores condicións que as actuais.

Este é un contrato que xustifica de seu un mandato municipal. E por moito que algúns pretendan minusvaloralo é un grande feito e unha realidade a súa transcendencia. É un xeito de facer cidade, porque – se algúns aínda non o saben – Ferrol é a súa cidadanía, sexan usuarios ou xente traballadora.

https://www.diariodeferrol.com/texto-diario/mostrar/2891275/axuda-no-fogar

Agora Ferrol

Poblicado o por
Resposta

A cidade tamén necesita que volvamos á “normalidade orzamentaria”. Ferrol necesita aprobar uns novos orzamentos que permita abordar a situación post estado de alarma. Investir novamente na mellora da calidade de vida da súa cidadanía.

O xogo político está moi ben, pero a xente simplemente “pasa das fotos”. Aínda que un poida entender que aqueles que apostaban por ter un goberno refén e dependente estean fóra de xogo. Non había moito interese nun goberno de coalición de esquerdas, pero quen apostou por quedarse fóra, non está a sacarlle rédito a iso.

Máis de oitenta e tres millóns leva o proxecto presentado polo alcalde Ángel Mato. Seguro que pode ter melloras, achegas e emendas. Séntense, Ferrol ben vale un pacto pola cidadanía. Fagan as críticas que consideren, pero tamén aposten pola cidade, que leva un ano coa súa administración en estado de alarma, en realidade, suspendida. Agora toca Ferrol.

https://www.diariodeferrol.com/texto-diario/mostrar/2879953/agora-ferrol

O novo Plan Ferrol?

Poblicado o por
Resposta

Mentres o 10 de marzo a comarca participaba na mobilización a prol da industria local, o presidente Feijóo estaba en Madrid, pero para unha cousa diferente. Agora, vén cunha proposta que necesita concretarse, para saber que desta fala en serio.

Ninguén esquece que Feijóo leva doce anos á fronte da Xunta e con competencias exclusivas en materia de industria e promoción económica. Por iso, esa necesidade de saber de que estamos a falar realmente e, máis, cando chegarán recursos europeos para a recuperación vía goberno de España. Polo que sabemos, a proposta inicial é implementar o naval e os eólicos, pero necesitamos máis.

Fai ben Mato e os demais alcaldes tendo unha actitude propositiva e pedindo claridade. O certo é que o consorcio público privado “paralelo”, que acaba de montar a Xunta con determinadas empresas para “identificar” os proxectos para Galicia, tampouco é garantía de nada. Obras son amores.

https://www.diariodeferrol.com/texto-diario/mostrar/2868699/novo-plan-ferrol