O blues do PP ferrolán

O blues, como saben, é unha melodía triste e melancólica que ten como eixo – normalmente – os propios problemas. E nestes días estraños que nos toca vivir, a dereita ferrolá ten o seu, porque mira que é difícil facer oposición cando a pandemia cambiou as nosas prioridades.

Así que acusar ao alcalde Ángel Mato por manter a programación deste “simulacro” de festas de Ferrol e facelo responsable da loita contra o Covid-19, é o estribillo dese blues melancólico que nin lles serve para ocultar que é o propio PP e o presidente da Xunta de Galicia quen deben poñerse á fronte do problema.

Neste tempos, guste ou non lle guste ao conxunto da oposición municipal, a mellor oposición, valga a redundancia, e a colaboración co propio goberno local. Teñen – primeiro, como é obvio, o grupo socialista pero tamén o conxunto dos grupos municipais – unha débeda coa cidadanía: chegar a un acordo de orzamentos por Ferrol.

https://www.diariodeferrol.com/opinion/manuel-cendan/blues-do-pp-ferrolan/20200825230717286965.html

Mesa pola Industria

A dereita está botada ao monte e teñen pésima memoria. Foron Aznar e Rato quen privatizaron en 1997 as eléctricas e converteron Endesa nunha empresa privada. Quizais, cando acusan ao goberno socialista de “querer pechala”, realmente están a propoñer a súa renacionalización? Sería isto válido para Alcoa?

Tamén son responsables da Lei 6/1998 que “liberalizou” o chan, provocando a burbulla do ladrillo e a crise económica e bancaria do 2008 que “obriga” a Zapatero a modificar a Constitución. É Soria – a instancia de Feijóo – quen saca a orde IET 2013/2013 que modifica o sistema de interrumpibilidade, creando o actual caos nas industrias electrointensivas.

Sería axeitado un pouco de mesura por parte dos señores Tellado e Calvo e dos seus compañeiros do PP. Sería mellor que sumáranse á mesa proposta polo alcalde Ángel Mato, poñer propostas e solucións en común para Ferrol, As Pontes e esta comarca.

https://www.diariodeferrol.com/opinion/manuel-cendan/mesa-pola-industria/20200115210903272604.html

Van máis de cen días

Estaría ben que todos os grupos políticos do Concello de Ferrol chegaran a acordos de cidade, renunciando así a reiterar a situación dos últimos oito anos. Esta proposta foi un dos eixos da candidatura, e do discurso do actual alcalde Ángel Mato, durante a súa campaña electoral.

Hai moitas cuestións que resolver, así que cada quen pode facer a lista que máis lle apeteza e, seguramente, a poderíamos ampliar de xeito case exponencial. Esperemos que, das palabras e dos eternos lamentos, pasemos aos feitos.

Por poñer uns exemplos aí está a sentenza 62/2018 sobre o saneamento que, sen entrar na cuestión de fondo, si deixa claro o erro de recibir unhas instalacións cun funcionamento inadecuado e que dan orixe ao actual problema da taxa. A necesidade de pechar xa, tras trinta anos, o convenio urbanístico con Defensa ou como superar a falta de apoio da Xunta de Galicia á candidatura de Ferrol a Patrimonio Mundial.

https://www.diariodeferrol.com/opinion/manuel-cendan/van-mais-de-cen-dias/20190925233057265483.html

Agosto finito

Acabaremos este mes sumando o final das festas de Ferrol coas Meninas de Eduardo Hermida. E, tras iso, mediado setembro, Ángel Mato cumprirá cen días como undécimo alcalde do noso concello.

Este mes de agosto déixanos un novo goberno moi presente nos medios de comunicación. Á novidade, á necesaria ocupación das distintas responsabilidades municipais, á organización desde cero e a fume de carozo das festas da cidade, súmase un dos sinais de identidade común a todas as sucesivas alcaldías socialistas (seguro que con acertos e erros) en Ferrol: temos un goberno a tempo completo.

Veremos en setembro – non sei se hoxe haberá un adianto no pleno de fin de mes – o tono da oposición. Tanto da oficial (PP), como da de aqueles que tiñan comprometido o seu apoio e, xa á primeira, decidiron deixar só ó PSOE. Na miña opinión, un erro que debérase corrixir. E unha petición para todos: sumen nos asuntos de cidade.

https://www.diariodeferrol.com/opinion/manuel-cendan/agosto-finito/20190828224655263574.html

Xestión

Os primeiros meses despois dunhas municipais son moi duros para calquera novo goberno. Hai cousas que necesitan ser resoltas inmediatamente, como as festas da cidade, así como garantir que os distintos servizos e dependencias do Concello de Ferrol funcionan adecuadamente. Unha verdadeira carreira de obstáculos, e sorte se non atopas nada inesperado no fondo dun caixón.

Vemos, e este xornal así vaino recolléndoo, a determinación do novo goberno de Ángel Mato de abordar, con urxencia, todas as cuestións que afectan á cidadanía. Moitos son os asuntos que están sendo abordados e de diversa índole e importancia.

Por citar algúns: hai un seguimento exhaustivo das obras da nova praza de Armas, e así tamén, desa primeira fase do mercado de Caranza – temas ben amarrados por María Lemos no mandato anterior – ou que xa pasa ao pleno o documento económico – financeiro, antesala duns novos orzamentos municipais.

https://www.diariodeferrol.com/opinion/manuel-cendan/xestion/20190815000239262732.html