Arquivo por etiquetas: Eixo Atlántico

Expocidades

Poblicado o por
Resposta

Agora que a Praza de Armas é xa un lugar de encontro, tras a Semana Santa tivemos a “Expocidades” do Eixo Atlántico. Unha trintena de casetas dos principais concellos do norte de Portugal e Galicia, centradas na promoción turística e gastronómica (e no noso caso tamén na nosa candidatura a patrimonio mundial pola Unesco), á que seguirá a mediados de xuño unha versión musical no Auditorio Municipal de Ferrol.

Pero, é moito máis que un simple evento turístico. A presenza da alcaldesa de Narón Marián Ferreiro e da actual presidenta do Eixo Atlántico e alcaldesa de Lugo Lara Méndez, ademais tendo como anfitrión ao alcalde de Ferrol Ángel Mato, denota a importancia estratéxica que ten para o hínterland que formamos o norte de Galicia. Xa saben, persistir, sumar esforzos por unha causa común que debera darlle un novo pulo a estes territorios e, polo tanto, á nosa presenza no país e na Unión Europea.

https://www.diariodeferrol.com/articulo/opinion/expocidades-3756067

Camiños de ferro

Poblicado o por
Resposta

O deseño das infraestruturas responde sempre aos intereses económicos, pero tamén ideolóxicos. Non é algo irrelevante, nin vén “porque agora tocaba”. Vén isto a conta porque os Verdes alemáns acaban de facer unha proposta para unir 200 cidades europeas con 40 liñas de ferrocarril e os seus pretendidos homólogos españois de “Más Madrid”, súmanse sen máis a esta proposta.

Basicamente, a proposta para a península exclúe ás comunidades de Cantabria, Asturias, Castela – León e Galicia e non respecta a decisión estratéxica do goberno portugués de priorizar o Eixo Atlántico, reforzando así o proxecto “aznariano” que buscaba o efecto aspiradora de recursos para Madrid, quebrado coa crise do 2008. Calquera tipo de integración territorial debe asumir a pluralidade peninsular. O corredor cantábrico e o eixo atlántico – con Ferrol de vértice – forma parte de todo proxecto de país que mereza tal nome.

https://www.diariodeferrol.com/texto-diario/mostrar/3169385/caminos-ferro

O portugués

Poblicado o por
Resposta

Estes días desde a Corporación municipal retomaban unha proposta interesante, tanto para Ferrol, como para as galegas e os galegos. É a proposta dos talleres de portugués a desenvolver no próximo mes de maio en centros da ESO, FP e bacharelato, ampliado a quinto e sexta de Primaria.

A estas alturas da vida xa temos cometido todo tipo de erros en relación co idioma portugués. Feito que impídenos cumprir co papel que supostamente teríamos de xeito preferente, como sería ser a ponte natural de conexión do mundo luso-brasileiro con España e a Unión Europea.

Ademais, a hexemonía da dereita na Xunta e os seus complexos provincianos trae consigo que sexan as Escolas Oficiais de Idiomas e os Concellos os que estean a paliar esta situación. O certo é que a maioría dos estudantes de portugués non están en Galicia, senón na autonomía de Extremadura. O portugués é cultura, pero tamén futuro económico. Tomemos nota.

https://www.diariodeferrol.com/texto-diario/mostrar/2846855/p-portugues

O tren Ferrol – Coruña

Poblicado o por
Resposta

Hai uns días vía a sorpresa que tiña un amigo periodista, porque o ministro de Transportes José Luis Ábalos citaba, nunha roda de prensa, a Ferrol e á necesidade dunha nova liña de tren coa capital provincial. Quizais este mínimo xesto amosa claramente a cuestión de fondo. Si, non estábamos nin na axenda.

Pero, se hai quen se pode “apuntar o tanto” é precisamente o actual alcalde de Ferrol, Ángel Mato. El reclamou a atención do presidente da Xunta, Núñez Feijóo, e do propio ministro. Acertada foi a súa estratexia de sumar ao ex presidente Laxe, ao Eixo Atlántico e á propia alcaldesa da Coruña, Inés Rey.

Persoalmente, creo que sumados, todos gañan. Por iso, aos críticos co alcalde, precisamente por exercer como primeiro edil de Ferrol, diríalles aquelo de Castelao: “non lle poñan chatas á obra”. Ademais non é unha cuestión de partidos, senón de peso político territorial. Súmense, xuntos podemos.

https://www.diariodeferrol.com/texto-diario/mostrar/2835550/tren-ferrol-coruna

Comunicar Ferrol

Poblicado o por
Resposta

É de salientar que sexa o goberno portugués quen máis interesado está en artellar o territorio galego, conscientes de que formamos parte dun mesmo ámbito xeopolítico e económico, no resto da península está consolidado o eixo de Madrid co Mediterráneo español. A Xunta de Galicia segue a mirarse na capital do reino, e de aí que asuma como propia esa mentalidade provinciana que dende alá pretenden impoñernos.

Vén isto a conto polo interese que teñen, alén do Miño, nunha conexión ferroviaria rápida entre Lisboa e A Coruña. Precisamente, unha Xunta que non exerce provoca que Ferrol quede fóra de xogo e sen ningún papel no desenvolvemento do Eixo Atlántico. Aquí, simplemente, estariamos contentos cunha boa conexión coa cidade herculina. No esquecemento queda aquela proposta, do enxeñeiro naval Manuel Casal Pita, dun Ave circular para Galicia que conectaba as nosas sete grandes cidades.

http://www.diariodeferrol.com/opinion/manuel-cedan/comunicar-ferrol/20180222004506217337.html