Acerca de Manuel Cendán

Como di a canción: "marchei a ser feliz". https://manuelcendan.com

Dicotomías

Séneca disertaba sobre como alcanzar a vida feliz, pero tamén foi titor de Nerón e gobernante na Roma do “dereito” de conquista e da escravitude. Alexis de Tocqueville, o gran intelectual da democracia americana, deixou escrito que as ansias de igualdade dos negros levarían a unha guerra de exterminio contra a supremacía branca. Así mesmo, desprezaba á emerxente clase traballadora e os seus desexos democráticos, que eles chamaban socialismo.

Na actual Comunidade de Madrid a Constitución pódese considerar suspendida de facto. A rexión española máis rica é tamén a máis desigual. Ayuso négalles o seu dereito á saúde e mira para outro lado para non ver as ringleiras da fame, atendidas polas asociacións veciñais ante a inacción do seu goberno autonómico. Pero Feijóo, “o moderado”, considera a Pedro Sánchez “traidor” e responsable de todos os males de España.

En Ferrol, a oposición obstaculiza a labor do goberno municipal socialista pero sempre todo é culpa do alcalde Ángel Mato. Incluso de que peche algún comercio, que resulta ser agraciado coa solidariedade do líder da dereita local que tivo na súa man unha maioría absoluta, sen ningún beneficio para a cidade. Será Mato culpable do cambio climático?

https://www.diariodeferrol.com/articulo/opinion/dicotomias-4073241

Dous apagóns

Estes días atrás unha parte do barrio da Magdalena, da rúa da Igrexa e do entorno do Cantón e do Callao, quedaron por varias horas a escuras. Non unha, senón dúas veces. E todo, porque a compañía eléctrica interpelada está a dar un servizo ineficiente. Claro, para a cidadanía. Supoño que estirar a vida útil dunha vella instalación, que xa non cumpre cos cánones modernos, é un éxito de rendibilidade. Pero, nestes tempos non ten escusa o acontecido.

Sorprende a falta de empatía e máis cando levamos uns anos no que todo o que ten que ver co sector enerxético está no ollo do furacán. Deixar durante horas aos veciños, á hostalería e ao comercio ferrolá a dúas velas, acaso non merece unha compensación económica? E das perdas por ter o negocios pechados pola falta de luz, dos custes financeiros e laborais, non deben ser resarcidas? Só se hai electrodomésticos danados? En fin.

Nin sequera os comerciantes, hostaleiros e fogares afectados merecen unha desculpa por parte da compañía eléctrica? Acaso a zona da cidade de Ferrol afectada, non merece unha nova instalación adecuada ás necesidades? E xa saben o dito: non hai dúas sen tres. Así que botemos os dados da sorte e que non haxa un novo apagón.

https://www.diariodeferrol.com/articulo/opinion/dous-apagons-4064715

O Ferrol que queremos

Recoñezo a miña preocupación ante a radicalización do discurso político, o uso das mentiras e da difamación para denigrar as políticas e aos líderes da esquerda. Algo que, lamentablemente, hai tempo que está traspasado tamén ao eido local, tanto polas redes sociais como por quen, de xeito despectivo, falan de “sanchismo”, pretendendo invocar os instintos primarios e así seguir sempre nos vellos debates de hai dúas décadas.

Pero, o certo é que somos unha cidade europea, cos problemas que puidera ter un francés ou un belga… Incluso aquelo que supuxo un agravio polo atraso nas novas infraestruturas, ten como contrapartida que tamén sabemos o que non queremos. Por exemplo: ese turismo de masas, que expulsa á poboación local e converte ás cidades en “parques temáticos”.

Fronte aos vellos debates; que tipo de turismo queremos para Ferrol? Como imos regular os pisos turísticos e facemos fronte á suba especulativa no alugueiro da vivenda? Como evitamos a xentrificación que xa se está a dar? Somos conscientes da compra masiva de inmobles por foráneos e dos cambios sociais que van a provocar na próxima década? Estamos a tempo de construír o Ferrol que queremos, reforzando o noso dereito á cidade.

https://www.diariodeferrol.com/articulo/opinion/ferrol-queremos-4058659

Orgullo de cidade

O amigo Pepe Fandiño presentaba, este venres pasado, o novo libro do prezado Henrique Dacosta: “O estraño caso da bicicleta amarela” (Belagua, 2022), facendo unha reivindicación do orgullo que debemos ter dunha cidade tan dinámica como Ferrol. Ten razón Fandiño e xa saben que eu son de amores pasionais. Por iso entendo tanto as súas palabras e, por suposto, a nosa cidade como ese espazo tan vital e literario dun autor tan ferrolán, tan universal, como Dacosta.

Para quen subscribe estas letras de cambio, Ferrol segue a ser o espazo de liberdade, de construción constante da propia identidade, da realidade cotiá, pero de igual xeito da cidade soñada. Sabemos que hai quen di que en Ferrol todo está mal, porque así cren non ter a obriga de arrimar o ombro. Mais, aquí facemos barcos. Tan bos, que algúns son barquiños de papel capaces de levar a ilusión da cidade por ser patrimonio mundial da Unesco.

Ferrol está cambiando porque o Mundo comeza sempre a ser mudado desde aquí. Se teñen dúbidas escoiten as voces nas nosas rúas, teñen todos os acentos, todos os idiomas están xa entre nós. Se teñen dúbidas pregúntenlles aos nosos escritores como se constrúen os relatos que abren as portas da vida.

https://www.diariodeferrol.com/articulo/opinion/orgullo-cidade-4047597

https://belaguaediciones.com/inicio/91-o-estrano-caso-da-bicicleta-amarela-oito-contos-e-unha-traxicomedia.html

Un pacto por Ferrol

O debate sobre o proxecto de orzamentos do Estado, para o 2023 en Ferrol, ante a inminencia das próximas municipais de maio, está a resultar unha posta en escena por parte da oposición máis que previsible.

Pero, as cifras son as cifras. A proposta de orzamentos xerais de Pedro Sánchez (sen incluír as partidas para Navantia) é cinco veces superior aos de Rajoy. A maiores o Ministerio de Fomento é hoxe o principal inversor urbanístico na cidade, como mostra a remodelación das Pías.

Que dicir do líder local da dereita atrapado, polo seu medo a perder votos en favor de Vox, se sae do mantra ese de “que malos son os socialistas”. O que xa é de nota, é a acusación do Podemos estatal polo incremento do gasto militar ao PSOE, cando a principal beneficiaria é Navantia. No BNG, cun único deputado, pretenden xogar a facer oposición ao PSOE en Madrid, a pesar da perigosa alianza de Feijoo con Abascal e os seus ultras.

Evidentemente, Ferrol necesita máis investimento. Pero, somos consciente de ter unha cidade de só 60.000 habitantes? Un goberno local socialista en minoría, fagocitado pola suma nos plenos da “gran coalición” tripartita? Non sería moito mellor para a cidadanía un gran pacto por Ferrol? Un cre que si.

https://www.diariodeferrol.com/articulo/opinion/pacto-ferrol-3932107