Arquivo por etiquetas: crise

Adeus ás clases medias

Poblicado o por
Resposta

A mediados de decembro foi presentado o IX Informe de FOESSA, de Cáritas España sobre a exclusión e desenvolvemento social no conxunto do Estado. Evidentemente, nesta columna é imposible facer unha valoración de esa completa radiografía ao país que temos.

Pero, si afirmar que o que fallan non son as persoas, senón as trabas estruturais. En España hai máis de catro millóns de persoas en exclusión severa. Os catro factores contra a pobreza e a exclusión social son: educación, orixe familiar, saúde e relacións sociais.

A vivenda é un factor fundamental por estar esta inaccesible e o emprego, cada vez, é máis precario, a pesar de toda a regulamentación estatal. Dentro das persoas excluídas o 70% son poboación autóctona e o resto de orixe migrante. Dous millóns e medio de xente moza viven con precariedade estrutural.

A primeira consecuencia é a fragmentación social e as clases medias desprázanse cara abaixo. Aumentando as desigualdades, o individualismo e un sistema insostible.

O certo é que a xestión do que afecta maiormente á vida das persoas, como son vivenda, educación, saúde, industria ou dependencia son competencias das Comunidades Autónomas, á marxe dos regulamentos estatais ou da UE.

IX Informe

https://diariodeferrol.elidealgallego.com/opinion/2025-12-31/adeus-as-clases-medias-827659.html

Actitudes

Poblicado o por
Resposta

Hai unha serie de prexuízos sobre Ferrol e as súas rúas baleiras e as súas xentes desaparecidas. Parece que se un vai a Lugo, ou a Vigo hai moito máis. Quizais Santiago comeza a pagar polo “vicio” dos seus pisos turísticos, que provoca unha emigración dos seus estudantes a outros campus. Ou se prefiren quedar na Coruña, e pasear pola súa rúa Real e polas que están á carón, igual observan ringleiras de comercios pechados (como no resto das grandes cidades), pero si moita xente paseando.

É dicir, a crise do 2008, ás sucesivas (incluída a da pandemia), afectaron a todos por igual. Vese nas súas trazas urbanas, pero igual cren máis en eles mesmos que as xentes de Ferrol na súa cidade e nas súas propias posibilidades. Seguramente, ser unha cidade creada polo Estado ten as súas vantaxes. Pero, pola contra, aquí parece que todo depende de fóra e por iso estamos nesa eterna espera de non se sabe que.

https://www.diariodeferrol.com/articulo/opinion/actitudes-3784776

Bon tempo

Poblicado o por
Resposta

Levamos uns anos que temos o tempo “un pouquiño mareado”. Na mesma semana temos xeo, frío, calor e auga, manga curta e dobre. Resulta rechamante que nestas datas, acabadas de nadal, a estes “días primaverais” por momentos, todos – prensa incluída – dámoslles a etiqueta de “bon tempo”. Lonxe quedan aqueles invernos rigorosos, onde comezaba a chover en setembro e non paraba até o mes de xuño.

Así vese, novamente, a importancia da linguaxe e a nosa subxectiva visión de curto prazo. Baixo este traxe, en Ferrol, non somos quen de ver que tamén estamos a padecer unha situación de crise climática. Afortunadamente, aínda non azoutan os fenómenos medioambientais doutras zonas do país.

O que si, xa afecta á nosa vida. Díganllo, por exemplo, ás xentes do campo coas colleitas queimadas, ou nós mesmos, que – ante esta confusión de estacións – non sabemos que roupas poñer ou comprar para o día seguinte.

https://www.diariodeferrol.com/articulo/opinion/bon-tempo-3367326

Mesa pola Industria

Poblicado o por
Resposta

A dereita está botada ao monte e teñen pésima memoria. Foron Aznar e Rato quen privatizaron en 1997 as eléctricas e converteron Endesa nunha empresa privada. Quizais, cando acusan ao goberno socialista de “querer pechala”, realmente están a propoñer a súa renacionalización? Sería isto válido para Alcoa?

Tamén son responsables da Lei 6/1998 que “liberalizou” o chan, provocando a burbulla do ladrillo e a crise económica e bancaria do 2008 que “obriga” a Zapatero a modificar a Constitución. É Soria – a instancia de Feijóo – quen saca a orde IET 2013/2013 que modifica o sistema de interrumpibilidade, creando o actual caos nas industrias electrointensivas.

Sería axeitado un pouco de mesura por parte dos señores Tellado e Calvo e dos seus compañeiros do PP. Sería mellor que sumáranse á mesa proposta polo alcalde Ángel Mato, poñer propostas e solucións en común para Ferrol, As Pontes e esta comarca.

https://www.diariodeferrol.com/opinion/manuel-cendan/mesa-pola-industria/20200115210903272604.html

Populares

Poblicado o por
Resposta

Agora que Rajoy xa non é presidente, o Partido Popular e a propia Xunta de Galicia xogan a ser máis reivindicativos que ninguén. De feito, se viñera alguén de fóra e non coñecera a cousa política local, poderían crer que eles son “radicais antisistema” ou “anticapitalistas”.

O certo é que a transición enerxética comezou hai trinta anos pero ninguén fixo caso. O certo é que Endesa fai o que fai porque é unha empresa privada e busca optimizar os seus beneficios empresariais e carece de controis públicos, o certo é que as privatizacións do mercado eléctrico están na orixe da actual situación e ten efectos colaterais noutras empresas desta comarca.

Pero, a única alternativa do PP é seguir coa “doutrina Rato”, actual inquilino de Soto del Real. O problema é sentarse e, por unha vez, lograr un compromiso real que permita a esta comarca marcar unha folla de ruta respaldada por todos os axentes sociais.

https://www.diariodeferrol.com/opinion/manuel-cendan/populares/20191009221804266350.html