Rueda

A todo hiperliderado sucédelle unha etapa de interinidade, e isto estalle a pasar ao actual presidente da Xunta, señor Rueda. Alimentando a aspirantes de preto e alleos, que están esperando que vaia a máis. Incluso cunha eventual saída de Feijoo da política estatal por causa do “fogo amigo” de Ayuso.

Así temos un presidente que non dá aberto unha nova etapa, con propostas como a baixada do imposto de patrimonio a eses poucos centos de galegos ricos, que non acaba de darlle un perfil propio. Nin sequera a reivindicación de apurar os tempos para unir o AVE de Vigo con Portugal vai darlle pulo, porque abriralle unha lea co PP de Madrid. Un eixo atlántico liderado por Lisboa e Vigo daría un novo equilibrio á península, con novo reparto de poder político e económico.

Neste panorama hai que entender a visita do presidente da Xunta ás grandes cidades, que concentran á maior parte da poboación. Para a dereita son territorio hostil. Síntese incómodo e prefire illarse nos edificios que a Xunta ten en cada lugar, en vez de ser recibido – con normalidade – por cada alcaldía. No caso de Ferrol, só falta que o señor Rueda repita o erro recente, do seu vicepresidente no Porto, de confundir institución e partido.

https://www.diariodeferrol.com/articulo/opinion/rueda-3914645

A foto

Foto de @jorgemeis para Diario de Ferrol

O día previo ao dos Inocentes, tivemos a visita do vicepresidente Francisco Conde, anteriormente conselleiro de Industria (responsabilidade que foi renomeada para ocultar as competencias exclusivas que o noso Estatuto atribúe ao goberno galego). Diversos axentes sociais estiveron presentes por estar convocados, aínda que eran conscientes de que só tratábase dunha foto.

As grandes achegas poden resumirse en novamente “poñer en marcha” unha oficina territorial da Xunta e reivindicar, outra vez, a zona franca para Ferrol. Facer culpable a Pedro Sánchez da falta das infraestruturas de Ferrol (que foron adiadas pola supeditación do PP á dereita económica da cidade da Coruña), como reivindicar o comezo da fragatas F110 (que sufriron un grande atraso atribuído a intereses persoais do ex ministro de Rajoy, Pedro Morenés). A estas alturas, necesitamos moito máis que proclamas baldeiras.

https://www.diariodeferrol.com/articulo/opinion/foto-3355551

Máis ou menos (orzamentos)

Á cidadanía resúltanos difícil seguir os debates sobre orzamentos e, nestes días, súmanse aos Xerais do Estado os da Xunta. Con respecto aos primeiros vimos como Podemos saúdaos efusivamente e, a nivel local, Ferrol en Común falaba de presentarlle emendas (igual non saben que eles tamén son goberno de España). No BNG están na corda frouxa, porque se novamente quedan fóra do acordo, para eles será unha lexislatura sen influenza no parlamento estatal.

Peor sorte mediática tiveron os senadores do PP local. O mesmo día que mal falaban deste borrador de orzamentos, o goberno de España licitaba a primeira fase da nova entrada das Pías. E se miramos aos da Xunta, pouco máis que unha nova delegación e pedir a Madrid a Zona Franca, no medio dunha baixada de investimento para o conxunto de Galicia de seis puntos e unha nova rebaixa fiscal que, unha vez feitos os números, só benefician aos grandes patrimonios.

https://www.diariodeferrol.com/texto-diario/mostrar/3243484/mais-ou-menos-orzamentos

As marxes de Ferrol

É certo que as marxes para facer política local en Ferrol son moi estreitas e, máis, cando vés dunha situación extraordinaria como a provocada pola pandemia do Covid-19. Por iso, a mellor política partidaria sempre é, nestes casos, arrimar o ombro e botar unha man. Pero, agora xa foi e a soidade do goberno de Angel Mato converteuse nun plus que deixa en evidencia ao resto dos grupos municipais.

Lembran a roda de prensa do PP sobre a metade de mandato? Foi flor dun día. O certo é que o goberno municipal de Ángel Mato está a gañar a batalla mediática e, o que é máis importante, na percepción na cidadanía. A isto hai que sumarlle a errada precampaña da Xunta contra o alcalde, aí está o “show” da entrega do saneamento ao Concello. E todos sabemos que en asuntos como na xestión das multas, non habería diferenzas con ningún candidato/a. No fondo é como ese baile coxo de Feijóo co uso das máscaras.

https://www.diariodeferrol.com/texto-diario/mostrar/2967949/sabores-ilustrados

O portugués

Estes días desde a Corporación municipal retomaban unha proposta interesante, tanto para Ferrol, como para as galegas e os galegos. É a proposta dos talleres de portugués a desenvolver no próximo mes de maio en centros da ESO, FP e bacharelato, ampliado a quinto e sexta de Primaria.

A estas alturas da vida xa temos cometido todo tipo de erros en relación co idioma portugués. Feito que impídenos cumprir co papel que supostamente teríamos de xeito preferente, como sería ser a ponte natural de conexión do mundo luso-brasileiro con España e a Unión Europea.

Ademais, a hexemonía da dereita na Xunta e os seus complexos provincianos trae consigo que sexan as Escolas Oficiais de Idiomas e os Concellos os que estean a paliar esta situación. O certo é que a maioría dos estudantes de portugués non están en Galicia, senón na autonomía de Extremadura. O portugués é cultura, pero tamén futuro económico. Tomemos nota.

https://www.diariodeferrol.com/texto-diario/mostrar/2846855/p-portugues