As marxes de Ferrol

É certo que as marxes para facer política local en Ferrol son moi estreitas e, máis, cando vés dunha situación extraordinaria como a provocada pola pandemia do Covid-19. Por iso, a mellor política partidaria sempre é, nestes casos, arrimar o ombro e botar unha man. Pero, agora xa foi e a soidade do goberno de Angel Mato converteuse nun plus que deixa en evidencia ao resto dos grupos municipais.

Lembran a roda de prensa do PP sobre a metade de mandato? Foi flor dun día. O certo é que o goberno municipal de Ángel Mato está a gañar a batalla mediática e, o que é máis importante, na percepción na cidadanía. A isto hai que sumarlle a errada precampaña da Xunta contra o alcalde, aí está o “show” da entrega do saneamento ao Concello. E todos sabemos que en asuntos como na xestión das multas, non habería diferenzas con ningún candidato/a. No fondo é como ese baile coxo de Feijóo co uso das máscaras.

https://www.diariodeferrol.com/texto-diario/mostrar/2967949/sabores-ilustrados

Alcaldables

A metade do mandato chegou e comezan a aparecer as primeiras enquisas, que xa están a condicionar a política local. A verdade que sabemos aquelo que todos intuíamos: a data de hoxe, Ángel Mato ten máis posibilidades que ningún outro de seguir sendo alcalde. Pero, aínda hai xogo no campo.

José Manuel Rey está de sorte porque ten opcións e, iso, vaille traer os mimos do PP galego e do presidente da Xunta Alberto Núñez Feijóo. Pero, depende en grande medida da capacidade de colaboración na esquerda ferrolá.

Os socialistas teñen que implementar o cumprimento do seu programa electoral, erro sería adoptar unha actitude conservadora, pese á complicada situación na Corporación de Ferrol cun goberno en minoría. En FeC necesitan reformular a súa estratexia e no BNG un pouco máis de ambición e, ambos os dous, asumir que non son a alternativa. É todos darse conta de que a cidadanía reclama sumas e acordos.

https://www.diariodeferrol.com/texto-diario/mostrar/2928239/alcaldables

O tren Ferrol – Coruña

Hai uns días vía a sorpresa que tiña un amigo periodista, porque o ministro de Transportes José Luis Ábalos citaba, nunha roda de prensa, a Ferrol e á necesidade dunha nova liña de tren coa capital provincial. Quizais este mínimo xesto amosa claramente a cuestión de fondo. Si, non estábamos nin na axenda.

Pero, se hai quen se pode “apuntar o tanto” é precisamente o actual alcalde de Ferrol, Ángel Mato. El reclamou a atención do presidente da Xunta, Núñez Feijóo, e do propio ministro. Acertada foi a súa estratexia de sumar ao ex presidente Laxe, ao Eixo Atlántico e á propia alcaldesa da Coruña, Inés Rey.

Persoalmente, creo que sumados, todos gañan. Por iso, aos críticos co alcalde, precisamente por exercer como primeiro edil de Ferrol, diríalles aquelo de Castelao: “non lle poñan chatas á obra”. Ademais non é unha cuestión de partidos, senón de peso político territorial. Súmense, xuntos podemos.

https://www.diariodeferrol.com/texto-diario/mostrar/2835550/tren-ferrol-coruna

Xestionar as contradicións

A estas alturas da vida hai pouco máis que vivir coas contradicións por asumir que o inmediato é moito máis importante. Así o BNG está a ter que xestionar as súas. O seu erro de quedar fóra dos Orzamentos do Estado significa, nin máis nin menos, que para eles acabou a lexislatura en Madrid. Agora, Ana Pontón suplica por unha foto con Feijóo. Na comarca, ás portas da folga xeral do 10 de marzo, precisamente desde o PSOE lembráronlle as súas ansias privatizadoras de Astano.

En Ferrol o grupo de goberno terá todas as responsabilidades que consideren, pero se non hai orzamentos municipais, tamén é porque hai quen non quere que Mato xestione maiores recursos. Pode ser moi duro saber que algúns naceron para compartir o camiño da esquerda, claro que igual poidan sentirse satisfeitos xogando ao pim-pam-pum. Pero, todos terán que responder ante a cidadanía por como xestionen as súas contradicións.

https://www.diariodeferrol.com/texto-diario/mostrar/2768053/xestionar-as-contradicions

Vivan os coches

Parabéns a todas as persoas agraciadas onte co sorteo da lotería nacional, pero tamén aos veciños de Canido e ao persoal dos xulgados da rúa Coruña. A cargo dos orzamentos municipais van ter un aparcadoiro de balde a carón, e con algúns cambios de sentido nesas rúas.

Podo entender a alegría de algúns, pero para os ferroláns dos outros barrios resulta curioso e, máis para aqueles que apostamos por un modelo diferente, onde a cidadanía recupere o pulso da cidade. Visto alén de Canido todo parece que, no seu día, fóra unha cesión máis, do anterior grupo de goberno, para contentar aos sectores máis antipeonalización.

Unha ocorrencia que houbera quedado no esquecemento, senón fóra que algúns buscaban usala como ferramenta contra o actual alcalde, veciño de Canido. En fin, o proxecto de peonalización na picota, pero a cambio teremos un feixe de coches rotando por 133 prazas que métense no centro da cidade.

https://www.diariodeferrol.com/opinion/manuel-cendan/vivan-os-coches/20201227195741293966.html