Mans á cabeza

Agora que andamos pola metade de xaneiro, anda o presidente Feijóo coas mans á cabeza, moi preocupado polos rebrotes da pandemia (e polo temporal de Filomena). De aquela había que “salvar a campaña do nadal”, mais non lle desexo a ganancia. E isto que sabemos todos, pretende ser ocultado pola Xunta e os medios afíns, de aí – seguramente – a teima da administración autonómica de converter á hostalería en culpables do que non son. Ou andar xogando á pita cega con Ferrol e Narón…

Pero, si que hai discursos que quedan baleiros. O da suposta superioridade do privado sobre o público, o dos recortes no ensino e na sanidade públicos. Unha dereita que nin sabe xestionar nin como vai vacinar á poboación. Claro que sempre poden chamar a Casado e a súa pala en vez da UME de Zapatero, ou ante tanta sanidade precaria, igual Feijóo pásalles un de eses papeiños a que tan acostumados nos ten o chamán do Inferniño.

https://www.diariodeferrol.com/opinion/manuel-cendan/mans-a-cabeza/20210112232730294869.html

Vacacións en corentena

Algúns, que indubidablemente somos privilexiados porque aínda temos onde traballar, tivemos as vacacións nas primeiras etapas do desconfinamento. Pero, decidimos non marchar, non por falta de gañas, nin sequera por temor a ser contaxiados, senón – sinxelamente – por temor a que un rebrote nos collera fóra da casa e obrigárannos a quedar, de novo, confinados e sen data determinada para volver a Ferrol.

Supoño que para moitos isto é unha esaxeración, pero quizais optamos pola vella forma á antiga. Ás veces, o mellor está preto da casa. Acaso non temos as mellores praias e areais, non temos marabillas nos camiños da nosa natureza? Onte falaba cunha amizade dunha ruta ao longo do Xuvia e a Presa do Rei; na miña cabeza agolpábanse os vellos veráns pasando alí as tardes, cando os máis maiores atravesaban madeiros entre as ramas das árbores e saltar desde aí (quen se atrevía) para nadar no río.

https://www.diariodeferrol.com/opinion/manuel-cendan/vacacions-corentena/20200728233743285358.html

Bonifacio Borreiros

A Bonifacio coñecino da man de Carmelo Teixeiro ao calor das municipais de 1991. Era o secretario xeral da comarcal e deputado autonómico polo PSdeG, Carmelo era entón o secretario de organización. Foron anos intensos, moitas cousas vividas, ata leváronnos ao xulgado por defender Ferrol, tíñamos razón -e gañamos aquel xuízo- pero case quedamos de aquela expulsados das filas socialistas. Eu era un mozo que foi aprendendo dos dous moitas cousas, igual iso explica a miña rebeldía.

O dezanove de xuño vai haber unha homenaxe a Bonifacio en Narón. A cargo da Asociación de Amigos do Arte, en forma de primeiro premio de pintura, cunha inauguración onde estarán uns bos amigos del, como o presidente González Laxe -xuntos compartiron militancia no PSG e responsabilidades na Xunta- ou como o libreiro Álvaro Espilla. Así como Narciso Pillo, Andrés Pena e Julia Dopico Vale. Parabéns pola iniciativa.

https://www.diariodeferrol.com/opinion/manuel-cedan/bonifacio-borreiros/20180523235049226635.html

Megasa incumpre

Megasa181214

Esperábamos un nadal en paz, crendo que o peor xa pasara. Pero, Megasa quere deixar un mal regalo de reis. Desde a xerencia din que lle “sobran” 47 empregos. Que todos os esforzos destes anos dos seus traballadores, Concello e da propia veciñanza non serven para nada.

A dirección pretende sacar fóra de Xuvia as negociacións sobre o despedimento colectivo e da modificación das condicións de traballo. Os motivos: evitar a presión social. Non queren nin luz nin taquígrafos. Non queren que se lles lembren as súas débedas cos traballadores e co propio Concello de Narón.

Megasa incumpre. Onde queda a promoción económica de Narón? E para cando o reparto dos longos beneficios, habidos incluso en plena crise económica? Defender o emprego contra á precarización. Estes son os obxectivos, hoxe pola mañá, dos traballadores diante da Casa do Concello de Narón.

Enlace a Diario de Ferrol (Columna xa semanal “Letras de Cambio”).

Entrevista do Comité de Megasa e Alcaldes co Conselleiro de Industria

Entrevista Comité Megasa e Alcaldes co Conselleiro de Industria.

Entrevista Comité Megasa e Alcaldes co Conselleiro de Industria.

Nota do Comité de Empresa de Megasa Siderúrxica S.L.

Unha delegación deste Comité, acompañados pola Comisión de Alcaldes acudiu onte á chamada do Conselleiro de Industria da Xunta de Galicia, Sr. Francisco Conde.

Os traballadores de Megasa seguirán coas mobilizacións, unha vez que aínda non temos constatado unha solución definitiva, en defensa dos nosos empregos.

No día de onte, unha delegación do Comité de Empresa, acompañados pola Comisión de Alcaldes de Ferrolterra, Eume e Ortegal (que neste caso, estaban representados polos Alcaldes de Ares, Ferrol, Narón e S. Sadurniño), estivemos reunidos co Sr. Conselleiro de Industria e Enerxía da Xunta de Galicia, Sr. Francisco Conde; ao cal agradecemos o feito de ser convocados por el; así tamén, o noso agradecemento aos respectivos alcaldes que nos acompañaron.

O motivo da xuntanza, en San Caetano, foi coñecer as xestións que dende a Xunta están a desenvolver, en relación coa problemática de competencia desigual creada pola recente orde do Ministerio de Industria sobre a interrumpibilidade, e que dá vantaxes nas bonificacións da tarifa eléctrica a un competidor directo da empresa Megasa.

Este Comité de Empresa quere manifestar:

  1. Que sigue á espera de concretar unha xuntanza co Sr. Presidente da Xunta de Galicia, Alberto Núñez Feijóo. Entendemos que precisamente a situación que estamos a padecer, require precisamente dunha intervención directa do Sr. Presidente, tendo en conta o seu peso específico dentro do PP e a súa liña directa co Sr. Ministro Soria e o Sr. Presidente Mariano Rajoy.

  2. Este Comité de Empresa foi informado polo Sr. Conselleiro da existencia dunhas alegacións da Xunta ante o Ministerio de Industria e que “coñeceremos unha vez sexan publicadas pola Comisión Nacional da Enerxía”; así como da esixencia da Xunta para que dentro do mesmo sector siderúrxico todos “teñamos as mesmas normas de xogo”. Descoñecemos, polo tanto, como vaise concretar realmente estas dúas cuestións esenciais, alén das propias palabras do Sr. Conselleiro.

  3. Aínda así, entendemos que vanse a manter a discriminación ao apostar, tanto a Xunta como o propio Ministerio de Industria, por dous escalóns de acceso ao servizo da interrumpibilidade: o de 5 e o de 90 megawatios. Trasládamoslle ao Sr. Conselleiro as nosas inquedanzas de que ao final non haxa igualdade real ao manterse estes dous escalóns; así como as nosas críticas ás rixideces actuais para o seu acceso.

  4. Evidentemente, mentres non estemos na final do problema os traballadores e familias de Megasa seguiremos coas mobilizacións, conscientes da importancia de manter viva a presión sobre os políticos do Partido Popular. Eles causaron o problema, e eles o teñen que solucionar.

 En Narón, a 20 de setembro de 2013.

Comité de Empresa de Megasa Siderúrxica S.L.