Arquivo por autores: Manuel Cendán

Descoñecido's avatar

Acerca de Manuel Cendán

"Un murmurio de palabras". https://manuelcendan.com

Camiños de ferro

Poblicado o por
Resposta

O deseño das infraestruturas responde sempre aos intereses económicos, pero tamén ideolóxicos. Non é algo irrelevante, nin vén “porque agora tocaba”. Vén isto a conta porque os Verdes alemáns acaban de facer unha proposta para unir 200 cidades europeas con 40 liñas de ferrocarril e os seus pretendidos homólogos españois de “Más Madrid”, súmanse sen máis a esta proposta.

Basicamente, a proposta para a península exclúe ás comunidades de Cantabria, Asturias, Castela – León e Galicia e non respecta a decisión estratéxica do goberno portugués de priorizar o Eixo Atlántico, reforzando así o proxecto “aznariano” que buscaba o efecto aspiradora de recursos para Madrid, quebrado coa crise do 2008. Calquera tipo de integración territorial debe asumir a pluralidade peninsular. O corredor cantábrico e o eixo atlántico – con Ferrol de vértice – forma parte de todo proxecto de país que mereza tal nome.

https://www.diariodeferrol.com/texto-diario/mostrar/3169385/caminos-ferro

Moda Ferrol

Poblicado o por
Resposta

Estes días o Diario recollía, nas súas páxinas, que se está a celebrar a semana da moda de Madrid. Igual para a maior parte da sociedade ferrolá esta nova é unha máis sen maior repercusión, alén da recuperación dunha certa normalidade pre-covid. Seguramente, moitos pensan erroneamente que, as tendas ferrolás de roupa e complementos, son só unha “correa de transmisión” entre a industria téxtil e o consumidor final.

O certo é que estes días, que un saiba, dous comercios locais: “El Dique Moda Home” e “María Barcia Boutique” (moda muller) asistirán esta fin de semana a esta nova convocatoria que, particularmente, está centrado nos eventos. E debemos engadir que estamos ante dúas empresas locais que teñen marca propia de roupa e, polo tanto, poderíamos dicir que “exportan” moda deseñada e feita nesta comarca, cunha enorme calidade e a prezos competitivos. Un xeito de promover tamén a “marca” Ferrol.

https://www.diariodeferrol.com/texto-diario/mostrar/3159059/moda-ferrol

Pepitas

Poblicado o por
Resposta

É certo que teño devoción por esta cidade nosa. Ferrol coas súas afoutezas e coas súas debilidades. É certo que son dos que pensa que necesitamos de cousas que unan, que sirvan para apuntalar un relato común necesario para todo proxecto de cidade.

É certo, tamén, que teño recoñecido nestas páxinas, xa hai uns anos, que as Pepitas – que este ano celébranse en setembro por mor da pandemia – eran practicamente o único que formaba parte da nosa identidade común, por riba de leas sociais ou políticas.

Máis, nos últimos anos, estamos a construír ese novo relato que, a poucos, van deixando de lado o vitimismo e o desleixo que afecta a Ferrol: As Meninas, O Camiño Inglés, Ferrol da Ilustración, Batalla de Brión… Poden parecer cousas pequenas, pero son fundamentais como banda sonora da cidade soñada e que, por tanto, seremos. Porque, a ciencia certa, somos o que soñamos e o camiño que facemos.

https://www.diariodeferrol.com/texto-diario/mostrar/3151040/pepitas

Turistas

Poblicado o por
Resposta

É certo que aínda queda parte da temporada por diante, pero xa vemos como a presenza dos turistas comeza a amainar e a primeira impresión, vista desde fóra do sector, é que en Ferrol e na nosa comarca, as expectativas de gasto de moitos hostaleiros non se cumpriron. É certo que tivemos moita xente da capital do reino de España e do sur que, basicamente, buscaban tranquilidade e escapar das altas temperaturas, pero alén do aloxamento, “viñan cos cartos medidos”.

Precisamente agora, debera haber unha suma, por parte dos distintos concellos e administracións, para acordar un modelo de turismo de calidade fronte o do Mediterráneo e sería interesante saber datos oficiais desta campaña. É evidente que o futuro inmediato vai cambiar, incluso para a poboación local. Evitar disfuncións, subas especulativas dos alugamentos ou servizos municipais colapsados deberan formar parte dos asuntos a resolver a curto prazo.

https://www.diariodeferrol.com/texto-diario/mostrar/3114260/turistas

Propaganda

Poblicado o por
Resposta

Permítanme un apunte persoal. Ter vacinadas ás fillas axuda a unha maior tranquilidade, máis cando hai non tanto o presidente Feijóo dicía que non chegaban vacinas suficientes desde o goberno de España, xunto con ese estraño sistema de auto-cita para xente moza que estaba colapsado e nada sabíamos do que ía pasar antes de comezar o novo curso académico.

O problema, talvez, radica en que a Xunta de Galicia é sobre todo unha oficina de propaganda e para maior gloria de Pablo Casado, Feijóo está nunha dura pelexa coa señora Ayuso, nesa pretensión por ocupar o liderado do PP estatal. Así que unha boa parte do que acontece débese a esa necesidade que teñen de baterse, porque no que si están en sintonía, tanto a presidenta madrileña como o galego, é en usar a pandemia para facer máis recortes, tanto na sanidade como na educación públicas. Aínda non asumiron que o seu modelo quedou zarandeado neste tempo.

https://www.diariodeferrol.com/texto-diario/mostrar/3105293/propaganda