Arquivo por etiquetas: COVID-19

Normalidade

Poblicado o por
Resposta

Hai unhas enormes ganas de volver á “normalidade”. Está presente en cada conversa nosa ou nas que oímos en calquera café. Estes dous anos de pandemia deixa unha grande ferida na nosa economía e na nosa situación emocional.

Levamos meses con subas especulativas nas tarifas enerxéticas que para as clases traballadoras e media son imposibles, provocando unha inflación en todos os demais produtos. Á vez, Putin decidiu disputarlle a hexemonía aos EEUU e aos seus satélites, e sen ningún pudor, invadir e provocar unha catástrofe humanitaria en Ucraína.

Necesitamos unha intervención no sector eléctrico, pero tamén regular os disparates da banca e no propio funcionamento das Bolsas, hoxe a mercé dos grupos de presión. Até cando poden esperar as persoas e as empresas, a economía real, a unha decisión de Europa? Si, “Winter is coming”… pero, estamos na vida real e as persoas necesitan solucións xa.

https://www.diariodeferrol.com/articulo/opinion/normalidade-3483200

Salvados polos libros

Poblicado o por
Resposta

Cando pase un tempo seguro que teremos estudios de como afecta a pandemia da Covid-19 aos diversos eidos da nosa vida e saúde. Un dos máis interesantes será aquel que teña que ver coa emocional, de como facer fronte ao illamento e, en moitos casos, á soidade.

Ese vinte e cinco por cento de suba xeral nas vendas de libros con respecto aos anos anteriores, resulta ser unha boa nova. Aquela lenda urbana que falaba da fin do libro en papel e dunha redución ao mínimo dos nosos hábitos de lectura, resultou chocar coa realidade.

En cada localidade, nós en Ferrol, deberíamos agradecerlles ás nosas libreiras e libreiros a súa vocación. A súa pelexa diaria por manter os seus negocios tan maltratados pola nosa sociedade. Libraría Galiano, as dúas Centrales, a do Cantón, Estraviz, Limiar (sumen a esta lista todas esas que faltan)… tamén son parte fundamental na loita contra todas a vagas da pandemia.

https://www.diariodeferrol.com/articulo/opinion/salvados-polos-libros-3390848

Blackberry

Poblicado o por
Resposta

No 1984 tan literario naceron as BlackBerry. Supoño que como moitos de vostedes eu tamén quixen ter unha. Era un móbil elegante, diferente. Agora as tradicionais deixarán de ter asistencia técnica, simplemente porque o mundo é de Apple e dos Android. Xa ven como todo pasa.

Co desenvolvemento da telefonía viñeron as redes sociais e con iso cambios culturais profundos, que se non somos quen de ser críticos, acaban provocando en nós unha permanente angustia que obriga a que resolvamos as nosas cousas cunha inmediatez compulsiva sen sentido.

A maiores, neste nadal en Ferrol vimos pola rúa a moita xente inquieta, seguramente un xeito de expresar o seu desacougo pola persistencia da pandemia. Si, estamos cansos, fartos de restricións e de contaxios. Fágolles unha proposta, fagamos só unha paradiña. Respiren. A felicidade é outra cousa e seguro que encontramos o camiño. Márcollo como tarefa para este 2022.

https://www.diariodeferrol.com/articulo/opinion/blackberry-3362144

Propaganda

Poblicado o por
Resposta

Permítanme un apunte persoal. Ter vacinadas ás fillas axuda a unha maior tranquilidade, máis cando hai non tanto o presidente Feijóo dicía que non chegaban vacinas suficientes desde o goberno de España, xunto con ese estraño sistema de auto-cita para xente moza que estaba colapsado e nada sabíamos do que ía pasar antes de comezar o novo curso académico.

O problema, talvez, radica en que a Xunta de Galicia é sobre todo unha oficina de propaganda e para maior gloria de Pablo Casado, Feijóo está nunha dura pelexa coa señora Ayuso, nesa pretensión por ocupar o liderado do PP estatal. Así que unha boa parte do que acontece débese a esa necesidade que teñen de baterse, porque no que si están en sintonía, tanto a presidenta madrileña como o galego, é en usar a pandemia para facer máis recortes, tanto na sanidade como na educación públicas. Aínda non asumiron que o seu modelo quedou zarandeado neste tempo.

https://www.diariodeferrol.com/texto-diario/mostrar/3105293/propaganda

Vacinación

Poblicado o por
Resposta

A xente está á espera do nove de maio. Para ese día está previsto que non haberá prolongación do Estado de Alarma polo Covid-19. Sería, definitivamente, o inicio da “nova normalidade”. A partir de aquí as CCAA terán que asumir as súas responsabilidades, amosar claramente a súa capacidade para a xestión e poñer todos os seus instrumentos (especialmente a organización da vacinación de toda a poboación) a prol do control e erradicación do virus.

Na nosa área sanitaria, a resposta da poboación vai no camiño correcto. Un trinta por cento da cidadanía xa ten, cando menos, a primeira dose. É de agradecer a colaboración do Concello de Ferrol e de Protección Civil. A coordinación entre sanitarios, Benestar Social e Seguridade, así como o traballo dos voluntarios, tanto na vacinación, como a asistencia á poboación con dificultades de mobilidade está sendo eficaz e mostran como hai que facer as cousas.

https://www.diariodeferrol.com/texto-diario/mostrar/2858219/vacinacion