Volta atrás

Permítanme dicirlles que con isto da pandemia estou saturado, procuro non ler máis que os titulares que a prensa vai sacando cada día e cústame moito pararme nese tipo de noticias. Pero, non deixo de ver a preocupación da xente, tanto no traballo como na rúa. E cada día que pasa moito máis irascible que o anterior. Agora estamos pagando as mensaxes confusas pola irresponsable oposición dos ultras e da dereita, a diferenza do que pasa en toda Europa occidental.

O novo estado de alarma con toque de queda nocturno non deixa de ser unha cesión á dereita por parte do goberno de España. Ata aquí temos chegado por querer consensuar con quen usa a pandemia para facer “política”. Incluso Feijóo usa os medios públicos galegos e afíns para atacar a Pedro Sánchez e agochar a súa inacción. Dentro de quince días terá a potestade de facer o que considere, pero algo dirá para non facer fronte ás súas responsabilidades.

https://www.diariodeferrol.com/opinion/manuel-cendan/volta-atras/20201027203632290476.html

Tres meses

Pasados tres meses, aqueles que estaban acosando ao goberno de Pedro Sánchez, pedían a fin do estado de alarma e que as Comunidades Autónomas asumiran a loita contra a Covid-19, agora piden o contrario.

Sabemos que, aparte de eludir as comparecencias de Feijóo para explicar se están facendo algo ou non, a Xunta de Galicia minte nas cifras de rastreadores, así o denunciaban os propios sindicatos sanitarios. Tamén pretenden distraernos da súa ineficacia, enleando ao Delegado do Goberno, como aos propios alcaldes e policías locais que carecen, obviamente, dos recursos da administración autonómica.

Nada sabemos dos centos de profesores que, a maiores, hai que contratar como reforzo e das melloras que os centros de estudio teñen que ter para poder acoller con garantías ás nosas fillas e fillos. Feijóo debe tomar nota da petición dos alcaldes de Ferrolterra, en definitiva que exerza como presidente da Xunta.

https://www.diariodeferrol.com/opinion/manuel-cendan/tres-meses/20200818222927286556.html

Embigos

O acontecido este sábado na rúa Pardo Bajo en Ferrol, pero tamén en moitas localidades galegas, é síntoma de cousas que están pasando desde a supresión do estado de alarma. Amosa, de xeito claro, que ninguén está ao mando en Galicia na verdadeira desescalada. Os concellos fan o que poden, mentres o presidente Feijóo está – como hai meses – unicamente á campaña electoral, máis porque se hai que reprimir determinados comportamentos sempre é impopular en período electoral.

Agora que o “papel de malo” corresponde á Xunta de Galicia que sexan as policías locais ou as asociacións de hostaleiros quen asuman unhas tarefas para as que non están preparadas, cando ademais o caldo de cultivo foi a rebelión que, desde o primeiro momento, houbo nos ultras e na dereita para boicotear ao Goberno de España. O certo é que a mensaxe que transmitiron foi ben clara: o comunitario non importa, só o embigo de cada quen.

https://www.diariodeferrol.com/opinion/manuel-cendan/embigos/20200623232013283323.html

Estatuto Electrointensivo

Este luns, o Goberno de Pedro Sánchez abría o prazo para alegacións ao novo decreto, que busca unha tarifa da luz máis axeitada para as empresas electrointensivas (Megasa, Alcoa, Ferrolatlántica…) e intentar resolver a situación creada polo PP. En 1997 Rato privatizou o sector público eléctrico e o ex ministro Soria, no 2013, modificou o sistema da interrumpibilidade a instancia de Feijóo. Nos últimos vinte anos a suba para o consumidor medio foi dun 120% e para a industria dun 150%.

O novidoso Estatuto Electrointensivo debera dar lugar a unha tarifa eléctrica máis competitiva co resto da UE. Pero tamén é imprescindible romper a actual ditadura eléctrica cun pacto de estado, decidir que tamaño de sector público eléctrico queremos recuperar. É certo que Alcoa necesita unha solución específica, así todas as distorsións desde o 2013 veñen dadas polo interese dos políticos por contentar a voracidade desta multinacional.

https://www.diariodeferrol.com/opinion/manuel-cendan/estatuto-electrointensivo/20190320210020251713.html

Poligal

Hoxe á tarde hai un pleno moi importante en Narón ás dezanove horas. Especial, porque van tratar da vida da xente, de como xogaron con elas e con eles durante moitos anos. Os xestores de Poligal nunca tiveron espírito empresarial, todo -e en primeiro lugar o seu persoal- eran números sobre un papel. Sempre buscaron beneficios rápidos, e para iso usaron todos os instrumentos legais ao seu alcance.

Hai que sentar ao Grupo Peralada co comité de empresa e buscar unha saída en favor do emprego. Débenllo ao conxunto do seu persoal, entre moitas cousas porque o seu foi un calvario prolongado durante décadas. Débenllo, o conselleiro de industria e o presidente da Xunta, porque a súa reforma laboral foi letal para os dereitos dos traballadores e para a economía deste país. Hoxe defender a esta comarca e a Galicia ten nome propio, o de cada traballador de Poligal. Non hai escusa. Poligal, futuro.

https://www.diariodeferrol.com/opinion/manuel-cendan/poligal/20190227204323249731.html