Volta atrás

Permítanme dicirlles que con isto da pandemia estou saturado, procuro non ler máis que os titulares que a prensa vai sacando cada día e cústame moito pararme nese tipo de noticias. Pero, non deixo de ver a preocupación da xente, tanto no traballo como na rúa. E cada día que pasa moito máis irascible que o anterior. Agora estamos pagando as mensaxes confusas pola irresponsable oposición dos ultras e da dereita, a diferenza do que pasa en toda Europa occidental.

O novo estado de alarma con toque de queda nocturno non deixa de ser unha cesión á dereita por parte do goberno de España. Ata aquí temos chegado por querer consensuar con quen usa a pandemia para facer “política”. Incluso Feijóo usa os medios públicos galegos e afíns para atacar a Pedro Sánchez e agochar a súa inacción. Dentro de quince días terá a potestade de facer o que considere, pero algo dirá para non facer fronte ás súas responsabilidades.

https://www.diariodeferrol.com/opinion/manuel-cendan/volta-atras/20201027203632290476.html

Somos comunidade

É evidente que a cidadanía foi asumindo a extraordinaria situación que provoca a pandemia do coronavirus. Pasados uns primeiros intres de desconcerto, o día a día está dentro da “normalidade”. Realmente, as incidencias – tanto en Ferrol como no resto de concellos da nosa comarca – son irrelevantes. Hai conciencia, e polo xeral mantense a corentena, agás nos casos de ter que ir ao traballo ou por unha necesidade perentoria.

É evidente que cando pase a situación de alarma haberá que facer autocrítica por tantos anos de recortes, de privatizacións e de fomento do individualismo máis vulgar, porque se por algo aguantamos é por poñer o comunitario por riba das cousas privadas. Como exemplos desto último, na nosa cidade, temos esa sobre carga de traballo que están a desenvolver a nosa sanidade pública (Complexo Hospitalario Arquitecto Marcide), os servizos sociais de Ferrol, protección civil, as forzas de seguridade, servizos de limpeza, alimentación e un longo etc., que son os que garanten a continuidade da vida.

Mentres, en altas instancias políticas, mediáticas e empresariais, hai quen entrou en pánico e acaba de decretar bater a Pedro Sánchez. Non queren mirarse no seu propio espello, asumir as súas responsabilidade no deterioro do público por fomentar negocios privados, e non fan máis que entorpecer e propagar bulos.

Pero, agora toca pasar esta – a sen dúbida – a maior crise deste país desde a primeira metade do século pasado. Non somos soldados, pero si unha cidadanía responsable e solidaria coa súa sociedade e co seu tempo. Ánimo, vémonos nas xanelas ou neses supermercados convertidos nas novas prazas urbanas…

A voltas coa felicidade

Escribía unha amiga que a felicidade é un estado mental. Hai tamén quen di que cando menos cousas materiais tes, mellor. Non crean que este é un desvarío de principios de ano, produto da enchente do Nadal. Vén a colación ante un feito evidente no verán, e agora coas festas destes días: en cada evento, en cada escusa – se mo permiten – hai moreas de persoas. Da igual que sexa un feito musical, Papá Noel ou os Reis. O certo é que hai xente polas rúas de Ferrol, como hai tempo que non víamos.

De certo que os hostaleiros están contentos con tanto tránsito cidadá, vese que hai un repunte neste sector. Non tanto no sector comercial porque quizais a xente é reaccia a gastar ao ter interiorizado a precariedade, produto da crise e da reforma laboral do PP, que agora – co novo goberno en España – debéranse poñer couto. E si, a investidura de antonte, tamén forma parte desa felicidade, cando menos, inmediata.

https://www.diariodeferrol.com/opinion/manuel-cendan/voltas-coa-felicidade/20200108200522272103.html

A espera

Estes días son de espera por novas boas para as comarcas de Ferrol, Eume e Ortegal. Parece que, a pesar da tormenta perfecta que están a organizar os ultras e as súas comparsas do PP e Cs, haberá investidura de Pedro Sánchez.

Nestas terras pedimos que todos aqueles asuntos que foron adiados polas “políticas” da dereita por beneficiar á “súa base social”, logren chegar a bo porto. O novo goberno de España debera traernos as F110, unha oportunidade para As Pontes e unha tarifa eléctrica competitiva para a industria.

Fronte ás esperanzas está esa dereita radicalizada, que ameaza con usar a determinados tribunais cuxos xuíces xogan a facer política rancia, para paralizar a acción dun goberno lexítimo. Chegados a ese punto, as e os traballadores deberemos axudar a consolidar a Coalición Progresista e as esperanzas da cidadanía. Será necesaria unha folga xeral contra unha CEOE e unhas dereitas hiperventiladas?

https://www.diariodeferrol.com/opinion/manuel-cendan/a-espera/20200102002049271553.html

Ferrol central

A curiosidade fixo que escoitara, parte das intervencións deste luns do Congreso, para a reelección de Pedro Sánchez como presidente do Goberno de España.

Para Ferrol ten unha especial importancia porque están en xogo os orzamentos das F110 e outras infraestruturas, pero tamén por cuestións que vanse abrindo camiño a poucos, como é a calidade do aire que respiramos e a necesidade de sacar do casco urbano os vehículos.

Refírome a esa pasaxe do discurso de Sánchez, no que anuncia unha lei para obrigar aos concellos de máis de 50.000 habitantes (Ferrol supera esa cifra) a asegurar un aire limpo para respirar, a colación da súa defensa do Madrid Central.

Días atrás saía o estudio de Ecoloxistas en Acción “La calidad del aire en el Estado Español 2018”, cun apartado para Ferrol con deberes e esixencias específicas. Onte, Europa levantaba a moratoria e anunciaba sancións contra España polos incumprimentos.

https://www.diariodeferrol.com/opinion/manuel-cendan/ferrol-central/20190724224732261271.html