Arquivo por etiquetas: Festas

Ferrol en festas

Poblicado o por
Resposta

Unha vez máis queda demostrado. As xentes de Ferrol son quen de ocupar as rúas e as prazas. Sumando á poboación local a comarcal, un feixe de turistas de diversos acentos. Non necesitamos grandes escusas. Simplemente, que nos deixen un oco por onde colar a alegría de vivir no mellor lugar do mundo, nesta comarca e nesta cidade deitada fronte o mar.

Sei que son reiterativo: sexan felices. Non deixen que ninguén lles amole. Nin o bulo deste domingo que buscaba causar medo, nin ninguén que siga a pensar que España é un imperio. Busquen unha escusa para saír á rúa, incluso con esta choiva inoportuna ou a pesar desta calor, que se pegan á pel. Que nada, nin ninguén condicione a súa determinación. Si, a vida é de función única.

Fáganse acompañar pola xente que queren. Que saiban que para vostede, eles son importantes e neste momento o único realmente transcendente. Ningunha aplicación do teléfono paga a pena. O relevante é querer e ser querido. Vivimos porque amamos.

Aproveiten as festas, a familia, os amigos, as terrazas. As festas de Ferrol e de cada recuncho desta comarca. Non esquezan os libros e o xornal. Incluso – por exemplo – achéguense esta fin de semana a Pontedeume, vila do libro. Vivan a vida.

https://www.diariodeferrol.com/articulo/opinion/ferrol-festas-4965961

Éxito de Nadal

Poblicado o por
Resposta

Até o mal tempo invernal destes días foi quen de respectar a vontade das e dos ferroláns e das xentes vidas de toda a comarca, que decidiron facer súa a cidade. Nin o tráfico, nin a choiva nin o frío lograron frear este nadal. Moreas de persoas, rúas ateigadas e a decisión de saír na procura da felicidade, por moi efémera ou trivial que esta poida parecer.

O clan do “en Ferrol todo está mal” sobresaltado. Ninguén fíxolles o máis mínimo caso. Nin moito menos a aquela persoa que protestaba porque Ferrol estaba imposible por causa da cabalgata de Reis. Quédome cunha cousa lida estes días atrás neste xornal: para moitas nenas e nenos esta era a primeira vez que podían participar dun evento así, nunca viran nada igual pola cidade. Pasaron a maior parte da súa vida baixo o síndrome do tapabocas. Cando dano fixo a pandemia!

Neste nadal vimos todas as rúas do centro cheas de xentes, comercios, tendas de barrio, librarías e terrazas ateigadas. O alumeado destas datas, paxareira do Cantón incluída, un gran acerto do actual goberno municipal como nunca. Orgullo de cidade.

Permítanme usar unha expresión de dúas palabras, que usa o meu amigo Seijas, cando as cousas saen ben e hai que celebralas: un éxito!

https://www.diariodeferrol.com/articulo/opinion/exito-nadal-4134747

O blues do PP ferrolán

Poblicado o por
Resposta

O blues, como saben, é unha melodía triste e melancólica que ten como eixo – normalmente – os propios problemas. E nestes días estraños que nos toca vivir, a dereita ferrolá ten o seu, porque mira que é difícil facer oposición cando a pandemia cambiou as nosas prioridades.

Así que acusar ao alcalde Ángel Mato por manter a programación deste “simulacro” de festas de Ferrol e facelo responsable da loita contra o Covid-19, é o estribillo dese blues melancólico que nin lles serve para ocultar que é o propio PP e o presidente da Xunta de Galicia quen deben poñerse á fronte do problema.

Neste tempos, guste ou non lle guste ao conxunto da oposición municipal, a mellor oposición, valga a redundancia, e a colaboración co propio goberno local. Teñen – primeiro, como é obvio, o grupo socialista pero tamén o conxunto dos grupos municipais – unha débeda coa cidadanía: chegar a un acordo de orzamentos por Ferrol.

https://www.diariodeferrol.com/opinion/manuel-cendan/blues-do-pp-ferrolan/20200825230717286965.html

A voltas coa felicidade

Poblicado o por
Resposta

Escribía unha amiga que a felicidade é un estado mental. Hai tamén quen di que cando menos cousas materiais tes, mellor. Non crean que este é un desvarío de principios de ano, produto da enchente do Nadal. Vén a colación ante un feito evidente no verán, e agora coas festas destes días: en cada evento, en cada escusa – se mo permiten – hai moreas de persoas. Da igual que sexa un feito musical, Papá Noel ou os Reis. O certo é que hai xente polas rúas de Ferrol, como hai tempo que non víamos.

De certo que os hostaleiros están contentos con tanto tránsito cidadá, vese que hai un repunte neste sector. Non tanto no sector comercial porque quizais a xente é reaccia a gastar ao ter interiorizado a precariedade, produto da crise e da reforma laboral do PP, que agora – co novo goberno en España – debéranse poñer couto. E si, a investidura de antonte, tamén forma parte desa felicidade, cando menos, inmediata.

https://www.diariodeferrol.com/opinion/manuel-cendan/voltas-coa-felicidade/20200108200522272103.html

Agosto finito

Poblicado o por
Resposta

Acabaremos este mes sumando o final das festas de Ferrol coas Meninas de Eduardo Hermida. E, tras iso, mediado setembro, Ángel Mato cumprirá cen días como undécimo alcalde do noso concello.

Este mes de agosto déixanos un novo goberno moi presente nos medios de comunicación. Á novidade, á necesaria ocupación das distintas responsabilidades municipais, á organización desde cero e a fume de carozo das festas da cidade, súmase un dos sinais de identidade común a todas as sucesivas alcaldías socialistas (seguro que con acertos e erros) en Ferrol: temos un goberno a tempo completo.

Veremos en setembro – non sei se hoxe haberá un adianto no pleno de fin de mes – o tono da oposición. Tanto da oficial (PP), como da de aqueles que tiñan comprometido o seu apoio e, xa á primeira, decidiron deixar só ó PSOE. Na miña opinión, un erro que debérase corrixir. E unha petición para todos: sumen nos asuntos de cidade.

https://www.diariodeferrol.com/opinion/manuel-cendan/agosto-finito/20190828224655263574.html