Luces de Nadal

Poblicado o por
Resposta

Voulles facer unha confesión. Gústame saír á rúa baixo as luces de nadal. Son consciente de que hai xente crítica, porque este ano o Concello de Ferrol decidiu poñer moitas máis. Do mesmo xeito que hai quen critica a presenza dos feirantes na praza de España, dándolle vida.

Si, é un espellismo. Que busca que por un tempo esquezamos os problemas, a suba dos prezos, incluídos os da luz que leva ás empresas electrointensivas da comarca a non producir. Son consciente de que son unhas datas, que moita xente, prefire obviar. Molestos por mil razóns válidas.

Pero, un aínda ten algo daquel rapaz que, inoportunamente, foi quen de achar que os Reis “deixaran en depósito” no faiado da casa a súa primeira bicicleta, moito antes da data prevista. A escasos días das festas de nadal e da lotería nacional, permítanme ser optimista. Seguro que iremos a mellor. A esperanza é o camiño da nosa especie.

https://www.diariodeferrol.com/texto-diario/mostrar/3341911/luces-nadal

Emprendemento

Poblicado o por
Resposta

Importante noticia a recollida por este xornal e, máis, cando aínda estamos saíndo a poucos (sexamos optimistas) desta estraña situación da Covid-19: o programa de apoio ao comercio minorista, subscrito polo Ministerio de Industria e as Cámaras de Comercio coa participación da concellaría de Promoción Económica de Ferrol, encabezada por Mayte Deus.

Dar apoio a este sector maltratado polas diversas crises económicas, sanitaria e a competencia desleal das grandes plataformas globais e fomentar alternativas para locais vacíos e novos emprendementos é unha necesidade que debera axudar aos autónomos e ao comercio de proximidade.

E hai que ser extremadamente didácticos. Explicar claramente a contía das axudas, destinatarios finais e simplificar trámites. Así como facer pedagoxía cando se refiren ao “laboratorio de ideas” ou como van facer realidade os “grupos motor”. A iniciativa paga a pena.

https://www.diariodeferrol.com/texto-diario/mostrar/3337468/emprendemento

Realidade ferrolá

Poblicado o por
Resposta

Se seguimos a actualidade local poderíamos acabar disertando sobre a metafísica da realidade. Unha realidade fragmentada que constrúese desde filtros interesados. Practicamente, non miramos nin comprobamos as fontes nin o seu contido, serve para facer un xuízo ou o contrario.

Por iso, segue a sorprenderme a pouca didáctica dos partidos con representación local. Reproducen unha serie de consignas para a súa parroquia e pouco máis. Non é certo que as entidades “serias” xa teñan os orzamentos do 2022 aprobados, só aquelas que teñen gobernos de maioría absoluta. Non é certo que os “nosos males” débanse ao “silencio” de Mato, senón á falta de peso territorial da nosa cidade e á incapacidade dun pacto de todos por Ferrol.

E se falamos de “falta de ideas para loitar por Ferrol”, igual deberíamos comezar por saber cales son as ideas da dereita e as dos “socios non socios”, alén de queimados lemas rituais.

https://www.diariodeferrol.com/texto-diario/mostrar/3330692/realidade-ferrola

De compras

Poblicado o por
Resposta

A verdade que tenme desconcertado isto do “Black Friday”. Un invento que as grandes plataformas de internet pretenden estender ao conxunto do planeta, para que todo pase por elas en exclusiva.

Realmente, descoñezo cal é a ganancia para os negocios de proximidade nesta anarquía comercial. Dubido moito que sexan capaces de aguantar o desgaste ás que as están sometendo, por iso entendo perfectamente a “rebelión” do comercio pontevedrés e creo que o ferrolán gañaría se se sumaran á mesma.

Hai tamén unha “batalla cultural”. Acabar co consumidor tradicional para fomentar outro compulsivo que busque cousas que non necesita e a prezos que, en verdade, non son tan competitivos como nos presentan. Especialmente, por comprar neste mercado do “efémero”. De feito, todos sabemos de establecementos que gardan os produtos de temporada para ofertarnos do que levan anos sen poder desfacerse, legal pero de dubidosa ética.

https://www.diariodeferrol.com/texto-diario/mostrar/3318584/compras

Atención primaria

Poblicado o por
Resposta

Estes días, houbo xente de Ferrol que se trasladaron a Santiago para participar na manifestación en defensa da apertura da atención primaria, na sanidade pública. A resposta do señor conselleiro foi curiosa, que foi unha manifestación “política” en contra da Xunta. Igual as súas decisións non son “políticas”…

O certo é que están aproveitando para quen poida recorra á sanidade privada e, quen non, que asuma que non ter medios é unha carga. Somos a cuarta autonomía que máis persoal reduciu, segundo o propio Consello de Contas. Hai unha grande fenda dixital e, simplemente, ninguén colle o teléfono nos servizos públicos. Así que ese 60% de atención presencial é falsa, porque o non tramitado computa en ningures.

Hoxe no Sergas seguen por debaixo de cando o goberno do socialista Pérez Touriño. O certo é que necesitamos subir os orzamentos na atención primaria pública nun 50%, tal e como recomenda Europa.

https://www.diariodeferrol.com/texto-diario/mostrar/3307810/atencion-primaria