Arquivo por etiquetas: Patrimonio Mundial

Barcos de papel

Poblicado o por
Resposta

Persistir. Xa saben aquelo de quen a persegue a consegue. Por iso é tan importante seguir coa promoción da candidatura “Cidade de Ferrol. Porto da Ilustración”. E as novas cinco iniciativas que propón a concelleira Eva Martínez van nesa liña. Pero, permítanme pararme nunha que pode parecer a máis cativa, a confección de barquiños de papel para, desde unha situación axeitada, botalos ao mar coas mensaxes da cidadanía.

E permítanme unha confesión: gústanme. Non sei se é algo que queda do neno que hai moito tempo atrás fun. Pero, si. Eu era de barcos de papel que botaba en calquera charco da rúa da miña casa. Supoño porque teñen a virtude de levar como tripulación os soños. E Ferrol necesita tamén soñar, porque para chegar a algures, antes hai que saber dos mares que levaranos a bo porto. Si, o Ferrol da Ilustración e do Patrimonio Mundial da Unesco. Somos o que soñamos e o camiño que facemos.

https://www.diariodeferrol.com/articulo/opinion/barcos-papel-3580700

Ferrol da Ilustración

Poblicado o por
Resposta

O acordo entre o alcalde Ángel Mato e o conselleiro de Cultura da Xunta, para promover a candidatura da cidade a patrimonio mundial ante a Unesco, ten un gran valor de seu. Se ben queda moito por facer, comezando pola reformulación do órgano de xestión onde tamén hai que incluír a outros concellos, propietarios e, primeiramente, á Armada, o certo é que rompe cancelas e da idea de que si é posible crear unha cultura de acordos por Ferrol.

Hai dous anos houbo portadas coa sinatura, dos últimos cinco alcaldes da cidade, do documento “Ferrol da Ilustración, Patrimonio Mundial”. Aquel acto do Foro Ferrol Vivo foi presentado pola periodista Puri Rodríguez e pola – entón voceira do Foro – hoxe concelleira de Patrimonio Histórico, Eva Martínez, quen logrou poñer nos últimos anos na axenda ferrolá a candidatura. Si, hai moito por facer, moito que acordar. Pero, parabéns e adiante. Sumemos, por Ferrol.

https://www.diariodeferrol.com/opinion/manuel-cendan/ferrol-da-ilustracion/20200212231517274628.html

Ferrol – La Rochelle

Poblicado o por
Resposta

Vemos como a recente visita das concelleiras de Turismo e Patrimonio Histórico, Mayte Deus e Eva Martínez, á localidade francesa da Rochelle, para participar no proxecto europeo MMIAH, trae novas moi interesantes para traballar a prol do desenvolvemento de Ferrol no eido da promoción e da recuperación do patrimonio marítimo, militar e industrial e cunha serie de medidas que van a axudar a promover o Camiño Inglés e á recuperación do valor urbanístico da Magdalena, A Graña e Ferrol Vello.

Liderar e darlle un impulso a este programa, potenciar o Castelo de San Felipe, ou traballar por recuperar a nosa historia militar e das baterías – que datan do século XVIII en adiante – son cousas que van na recuperación da nosa paisaxe costeira e iniciativas que dan unha visión da potencialidade de Ferrol. Así, non menos importante resulta a reformulación, tan demandada, da Empresa Municipal de Turismo.

https://www.diariodeferrol.com/opinion/manuel-cendan/ferrol-la-rochelle/20191016230436266729.html

Van máis de cen días

Poblicado o por
Resposta

Estaría ben que todos os grupos políticos do Concello de Ferrol chegaran a acordos de cidade, renunciando así a reiterar a situación dos últimos oito anos. Esta proposta foi un dos eixos da candidatura, e do discurso do actual alcalde Ángel Mato, durante a súa campaña electoral.

Hai moitas cuestións que resolver, así que cada quen pode facer a lista que máis lle apeteza e, seguramente, a poderíamos ampliar de xeito case exponencial. Esperemos que, das palabras e dos eternos lamentos, pasemos aos feitos.

Por poñer uns exemplos aí está a sentenza 62/2018 sobre o saneamento que, sen entrar na cuestión de fondo, si deixa claro o erro de recibir unhas instalacións cun funcionamento inadecuado e que dan orixe ao actual problema da taxa. A necesidade de pechar xa, tras trinta anos, o convenio urbanístico con Defensa ou como superar a falta de apoio da Xunta de Galicia á candidatura de Ferrol a Patrimonio Mundial.

https://www.diariodeferrol.com/opinion/manuel-cendan/van-mais-de-cen-dias/20190925233057265483.html

Ferrol, sociedade civil

Poblicado o por
Resposta

Os erros de xestión nos últimos mandatos municipais –tanto co PP de JM Rey como co FeC de Suárez- só afianzaron a idea de que Ferrol xa non ten solución, que dá igual facer ou non facer. Pero non é así.

É importante fixarse no novo asociacionismo ferrolán, que dalgún xeito invalida o “status quo” dos que xa están acomodados. Paferr, Ruta Naval e o Foro Ferrol Vivo constitúen tres xeitos diferentes de entender e facer sociedade civil, mais non esperan polos políticos locais e unen esforzos para traballar en positivo.

Porque se agora, tras dúas décadas, a candidatura a Patrimonio Mundial non é un simple corta e pega que adorna programas electorais e esixe un compromiso realista e concreto, é debido á sociedade civil, que leva nomes como os dos Perales, José A. Marcote ou Eva Martínez. Esta última considerada polo ex director deste xornal, Man Castro, como unha das principais valedoras da candidatura.

https://www.diariodeferrol.com/opinion/manuel-cedan/ferrol-sociedade-civil/20190213205454247898.html