Arquivo por autores: Manuel Cendán

Descoñecido's avatar

Acerca de Manuel Cendán

"Un murmurio de palabras". https://manuelcendan.com

64.555.456,06

Poblicado o por
Resposta

Non é ningunha fórmula matemática, nin tampouco é un número esotérico. É a suma do proxecto orzamentario, que da man da concelleira de Facenda Mayte Deus, xunto co resto do grupo socialista acaba de presentar o alcalde, Ángel Mato, ao conxunto da corporación municipal.

Diversas foron as primeiras respostas. O PP está no seu papel de oposición e alternativa, o BNG acerta coa súa suma inicial ao diálogo co actual goberno. Quizais, quen está un pouco fóra de xogo sexa Ferrol en Común, que pretende ser tratado como se fora parte do goberno e cando tras a investidura, quedaron á marxe do mesmo e nin sequera os seus votos – sumados aos do alcalde – dan para a maioría absoluta.

Ábrese a negociación. Séntense e cheguen a un acordo, Ferrol ben vale un pacto orzamentario. O propio Ángel Mato vén de dicir que era preferible un goberno en maioría. Hai unha oportunidade real para un acordo por Ferrol.

https://www.diariodeferrol.com/opinion/manuel-cendan/64555-45606/20200226210317275637.html

Construíndo Narón

Poblicado o por
Resposta

Este último sábado tiven ocasión de asistir á presentación, en sociedade, da asociación “Ágora Narón” no salón do Centro Social do Alto, cunhas xornadas que levaban como título xenérico “Construíndo Narón”, e que tiña como eixo dúas mesas.

Unha primeira de técnicos que versaron sobre o deseño actual de Narón e as súas peculiaridades sociolóxicas e a falta de humanización de moitos dos seus espazos públicos. Quizais o máis salientable, visto desde fóra, fuxindo de localismos estériles, sería a necesidade de abordar un planeamento urbanístico consensuado entre os concellos de Narón, Ferrol e Neda. Algo lóxico dada a traza urbana continua existente.

Na segunda tomaron a palabra directivos das asociacións veciñais da Gándara, Santa Icía e San Mateo. Non hai que esquecer que este vén sendo un dos concellos máis extensos da provincia coruñesa. Para acabar, parabéns a esta nova iniciativa cidadá.

https://www.diariodeferrol.com/opinion/manuel-cendan/construindo-naron/20200219222026275053.html

Ferrol da Ilustración

Poblicado o por
Resposta

O acordo entre o alcalde Ángel Mato e o conselleiro de Cultura da Xunta, para promover a candidatura da cidade a patrimonio mundial ante a Unesco, ten un gran valor de seu. Se ben queda moito por facer, comezando pola reformulación do órgano de xestión onde tamén hai que incluír a outros concellos, propietarios e, primeiramente, á Armada, o certo é que rompe cancelas e da idea de que si é posible crear unha cultura de acordos por Ferrol.

Hai dous anos houbo portadas coa sinatura, dos últimos cinco alcaldes da cidade, do documento “Ferrol da Ilustración, Patrimonio Mundial”. Aquel acto do Foro Ferrol Vivo foi presentado pola periodista Puri Rodríguez e pola – entón voceira do Foro – hoxe concelleira de Patrimonio Histórico, Eva Martínez, quen logrou poñer nos últimos anos na axenda ferrolá a candidatura. Si, hai moito por facer, moito que acordar. Pero, parabéns e adiante. Sumemos, por Ferrol.

https://www.diariodeferrol.com/opinion/manuel-cendan/ferrol-da-ilustracion/20200212231517274628.html

Pardo Bajo

Poblicado o por
Resposta

A peonalización do centro de Ferrol vai a poucos. Ademais, hai momentos que parece que con pasos atrás – como o novo aparcadoiro ás portas de Canido, que na miña opinión foi unha cesión populista, do anterior goberno, ao lobby antipeonalización – pero en calquera caso, o proceso é irreversible. De feito, o futuro nin pasa polo coche eléctrico, senón polo transporte público combinado e de balde. Ou alguén cre posible meter na nosa cidade un coche por cada veciña ou veciño?

O caso da peonalización de Pardo Bajo é unha aposta do Concello, produto dunha demanda social que ademais amosa o apoio decidido da hostalería a estes procesos. A súa reurbanización e adecuación ás novas necesidades, unha vez sexan aprobados os novos orzamentos municipais, similar tamén ao conxunto arquitectónico da Magdalena, será un espazo gañado non só por eles, senón polo conxunto da cidadanía. O dereito á cidade existe.

https://www.diariodeferrol.com/opinion/manuel-cendan/pardo-bajo/20200205225003274150.html

Empatía

Poblicado o por
Resposta

No xornal de onte, miraba a foto da nova sala de espera da Casa Solidaria, a correspondente a unha unidade básica dos servizos sociais do Concello. Pode parecer un tema menor, incluso haberá quen a considere innecesaria ou cuestión irrelevante. Pero, esas pequenas cousas, como é habilitar un espazo cuns asentos e calefacción, son necesarias para tratar ás persoas como merecen. Máis, nun servizo onde vense as tripas de Ferrol.

Maioritariamente, as persoas que recorren aos nosos servizos sociais son xente que están en desamparo, incrementado o seu número pola crise económica e os recortes ideolóxicos da dereita, que sempre confunde dereitos e solidariedade con beneficencia. Nunha cidade envellecida e nun asunto necesitado sempre de aumentar o seu gasto en dignificar ás persoas e as súas vidas. Por iso non existe tal gasto, senón un verdadeiro investimento produtivo en mellorar a vida na nosa cidade.

https://www.diariodeferrol.com/opinion/manuel-cendan/empatia/20200129201213273714.html