Resistan

Si, resistan. Non fagan caso dese ruído de fondo que, por momentos, danos dor de cabeza. Ferrol non vai esmorecer, porque temos dereito a ser felices e a identificarnos con esta cidade. Fagan caso, resistan. Que nada lles achique o día, nin os anos que nos pasan por riba e non de balde, nin as dificultades persoais ou colectivas. Nin as novas dos medios de comunicación que parecen repetirse. Sexan positivos.

Alégrense por vivir nun lugar especial, cunha historia única, con enormes posibilidades de futuro. Sigan a desfrutar deste tempo, póñanlle música á vida, vida ás rúas. Saquen os seus móbiles e tiren fotos, hai lugares a esgallo por toda a cidade que ben vale o repicar ledo das campás, aí está toda a arquitectura de Rodolfo Ucha que entróncanos co Art Noveau europeo. Apúntese mañá á tarde a esa “perfomance” na Magdalena porque somos xente alegre e porque Ferrol é moderno. Sexan felices.

https://www.diariodeferrol.com/opinion/manuel-cedan/resistan/20180927000325238050.html

O mercado de Caranza

A xente do mercado de Caranza debe estar cansa de tanto esperar, de tantas palabras baleiras, de tantos anos. Pero, o certo é que a xerente de Urbanismo -nas recentes xornadas do Foro Ferrol Vivo- falaba de que xa estaban os pregos da licitación e que esta remodelación parcial ía para oito meses, de ser así van a estar moi apurados desde o actual grupo de goberno para poder inaugurar o novo mercado, se non queren coincidir coas novas eleccións municipais, datas prohibidas para eses faceres.

A esta primeira fase, terá que vir outra máis que, en verdade, converta a eses quince mil metros cadrados nun elemento central e aglutinador das actividades comerciais, de servizos, deportivas e socio-culturais que complemente Caranza, así recollido como tal no actual PXOM. Agora vai a reorganización interior dos postos do mercado e o seu equipamento adecuado ás novas necesidades, montacargas de servizo e a mellora do acceso peonil e un ascensor desde a avenida de Castelao… Unha boa nova.

Enlace a Letras de Cambio (Diario de Ferrol).

O botánico do Montón

O mandato do alcalde Vicente Irisarri foi quen de poñer a andar o xardín botánico, situado na península do Montón. Máis de mil douscentos árbores de cincuenta e oito especies catalogadas pola SGHN. Seguramente, un gran descoñecido para a inmensa maioría da cidadanía de Ferrol, e agora, unha década despois corre un grave risco de deteriorarse e ter danos irreparables polo simple feito de estar abandonado.

Así, e tal e como quedou claro nas xornadas sobre o barrio de Caranza, organizadas polo Foro Ferrol Vivo en colaboración coa asociación de veciños e outras entidades, necesita dunha actuación urxente. De aí que a presidenta veciñal reclame unha primeira inversión de cen mil euros, necesarios para volver a poñerlle as portas e o enreixado, frear as “okupacións” e iniciar unha recuperación integral de ese espazo, que está chamado a ser un dos grandes pulmóns de Ferrol, de ocio e deporte.

https://www.diariodeferrol.com/opinion/manuel-cedan/o-botanico-do-monton/20180705000213230574.html

É posible

O futuro non está escrito, constrúese día a día. Por iso é tan importante que unha plataforma cidadá como o Foro Ferrol Vivo sexa capaz de xuntar aos últimos cinco alcaldes da cidade, apoiando a candidatura a Patrimonio Mundial ante a UNESCO. Hai que agradecerlles a Xaime Bello, Juan Juncal, Vicente Irisarri, Rey Varela e a Jorge Suárez que traballen xuntos. Deste xeito trasládase unha mensaxe unitaria que reafirma o colectivo.

É posible un pacto por Ferrol. Así o propón o Foro, así o referendarán os nosos alcaldes este sábado a media tarde no Antigo Hospicio. Evento que contará tamén coa participación da voceira da entidade Eva Martínez e será conducido pola tamén xornalista Puri Rodríguez. É esta unha invitación -a toda a cidadanía e ás súas institucións- a traballar a prol dunha cidade inserta na modernidade, orgullosa do seu e onde as causas colectivas convértenos nun Ferrol vivo.

http://www.diariodeferrol.com/opinion/manuel-cedan/e-posible/20180117225953213723.html

Sumando sinerxias

A pesar de intereses particulares que queren amolar, a costa de provocar unha escura cidade, non poderán con nós. Hai quen está empeñado en facer mal as cousas, pero outros seguiremos empeñados en abrir as fiestras para que o aire fresco inunde as nosas rúas, barrios e parroquias. Somos unha cidade viva, rebelde, produto do racionalismo da Ilustración, do modernismo de Ucha e da loita das súas xentes.

Cada cidade é un xeito de entender a vida, por iso temos dereito a decidir que Ferrol queremos. Por iso, son tan importantes encontros como os da semana pasada no Antigo Hospicio, sobre a reinvención de cidades atlánticas tras as súas crises, organizada polo Concello, ou a organizada polo Foro Ferrol Vivo en Ferrol Vello, e que fixo unha radiografía e propostas para a recuperación integral do barrio, entrada natural á cidade. Sumemos as sinerxías de toda administración, de todas e todos nós.

http://www.diariodeferrol.com/opinion/manuel-cedan/sumando-sinerxias/20171012001615205230.html