Arquivo por autores: Manuel Cendán

Descoñecido's avatar

Acerca de Manuel Cendán

"Un murmurio de palabras". https://manuelcendan.com

Vacinación

Poblicado o por
Resposta

A xente está á espera do nove de maio. Para ese día está previsto que non haberá prolongación do Estado de Alarma polo Covid-19. Sería, definitivamente, o inicio da “nova normalidade”. A partir de aquí as CCAA terán que asumir as súas responsabilidades, amosar claramente a súa capacidade para a xestión e poñer todos os seus instrumentos (especialmente a organización da vacinación de toda a poboación) a prol do control e erradicación do virus.

Na nosa área sanitaria, a resposta da poboación vai no camiño correcto. Un trinta por cento da cidadanía xa ten, cando menos, a primeira dose. É de agradecer a colaboración do Concello de Ferrol e de Protección Civil. A coordinación entre sanitarios, Benestar Social e Seguridade, así como o traballo dos voluntarios, tanto na vacinación, como a asistencia á poboación con dificultades de mobilidade está sendo eficaz e mostran como hai que facer as cousas.

https://www.diariodeferrol.com/texto-diario/mostrar/2858219/vacinacion

O portugués

Poblicado o por
Resposta

Estes días desde a Corporación municipal retomaban unha proposta interesante, tanto para Ferrol, como para as galegas e os galegos. É a proposta dos talleres de portugués a desenvolver no próximo mes de maio en centros da ESO, FP e bacharelato, ampliado a quinto e sexta de Primaria.

A estas alturas da vida xa temos cometido todo tipo de erros en relación co idioma portugués. Feito que impídenos cumprir co papel que supostamente teríamos de xeito preferente, como sería ser a ponte natural de conexión do mundo luso-brasileiro con España e a Unión Europea.

Ademais, a hexemonía da dereita na Xunta e os seus complexos provincianos trae consigo que sexan as Escolas Oficiais de Idiomas e os Concellos os que estean a paliar esta situación. O certo é que a maioría dos estudantes de portugués non están en Galicia, senón na autonomía de Extremadura. O portugués é cultura, pero tamén futuro económico. Tomemos nota.

https://www.diariodeferrol.com/texto-diario/mostrar/2846855/p-portugues

O tren Ferrol – Coruña

Poblicado o por
Resposta

Hai uns días vía a sorpresa que tiña un amigo periodista, porque o ministro de Transportes José Luis Ábalos citaba, nunha roda de prensa, a Ferrol e á necesidade dunha nova liña de tren coa capital provincial. Quizais este mínimo xesto amosa claramente a cuestión de fondo. Si, non estábamos nin na axenda.

Pero, se hai quen se pode “apuntar o tanto” é precisamente o actual alcalde de Ferrol, Ángel Mato. El reclamou a atención do presidente da Xunta, Núñez Feijóo, e do propio ministro. Acertada foi a súa estratexia de sumar ao ex presidente Laxe, ao Eixo Atlántico e á propia alcaldesa da Coruña, Inés Rey.

Persoalmente, creo que sumados, todos gañan. Por iso, aos críticos co alcalde, precisamente por exercer como primeiro edil de Ferrol, diríalles aquelo de Castelao: “non lle poñan chatas á obra”. Ademais non é unha cuestión de partidos, senón de peso político territorial. Súmense, xuntos podemos.

https://www.diariodeferrol.com/texto-diario/mostrar/2835550/tren-ferrol-coruna

Adiante Uni Ferrol

Poblicado o por
Resposta

Vinte seis vitorias de vinte seis partidos xogados. Ese é o mérito e o traballo de todo o equipo de baloncesto feminino do Baxi Ferrol. Por causa da pandemia, as e os aficionados fomos acompañándoas segundo as autoridades sanitarias e a Xunta de Galicia nos permitían. Pero, o certo que esta foi unha grande temporada para o Uni.

A partir de mañá xogarán en Leganés a fase de ascenso á primeira división do basket feminino, a Liga Endesa. Merecen estar, o teñen ben gañado e a pulso. A maioría só poderemos seguir o que aconteza desde a distancia, pero a cidade de Ferrol e a comarca estarán con elas, co equipo técnico e coa nova directiva.

Que mellor embaixada tería a cidade e a comarca que ás xogadoras do Uni Ferrol, xogando na primeira división do baloncesto feminino? Para Ferrol é importante porque é tamén un xeito de facer cidade, un feito que suma, e elas – partido a partido – demostraron que o merecen.

https://www.diariodeferrol.com/texto-diario/mostrar/2825180/adiante-uni-ferrol

De Novo Armas

Poblicado o por
Resposta

A verdade que un non deixa de sorprenderse cando saen determinados “debates políticos” no Concello de Ferrol. De verdade que había que levar ao pleno municipal o mantemento ordinario da Praza de Armas? Cuestión que, como moito, dá para tratar en Comisión? Pero, segue a dereita ferrolá sen aceptar que é un erro a súa posición sobre manter, no seu chan, o aparcadoiro?

É certo que hai grupos minoritarios en redes sociais que seguen facendo ruído, pero que realmente, dálles igual este asunto ou outro calquera. Len só o titular da noticia e a partir de aí arde Troia. O problema é que desde a dereita, así, as están alimentando, sen decatarse que están inflando ao seu inimigo pola dereita. Unha mágoa que as Confrarías, por causa do Covid-19, non poidan saír esta Semana Santa á rúa, porque esta nova Praza de Armas adáptase moito mellor ás súas necesidades e acabaríamos, creo, con esta polémica estéril.

https://www.diariodeferrol.com/texto-diario/mostrar/2816761/novo-armas