Arquivo por etiquetas: Galiza non se vende

Outra sentenza contra Reganosa

Poblicado o por
Resposta

Mañá domingo será a manifestación contra Reganosa. Máis esta vez hai novas importantes e que son moi saudables, para a loita democrática do pobo de Ferrolterra contra a maior agresión medioambiental e para a vida das persoas que sufre Galicia. O Tribunal Superior de Xustiza de Galicia acaba de decretar a ilegalidade da modificación do Plan Xeral de Ordenación Municipal do Concello de Mugardos polo que se daba cobertura á perigosa, ilegal e non legalizable planta de gas dentro da ría.

Ademais, o Comité Cidadán de Emerxencia para a Ría de Ferrol acaba de presentar ante a Fiscalía especial anticorrupción unha denuncia por presunto enriquecemento ilícito, onde están ademais implicados o anterior Presidente da Xunta e o seu ex Conselleiro de Economía, Srs. Fraga e Orza, respectivamente, como responsables políticos.

Tamén, a Unión Europea aceptou a trámite reiniciar o expediente aberto ao Goberno español por presunto grave incumprimento das directivas europeas de medio ambiente.

Talvez, aqueles “asesores” da actual Xunta de Galicia, e que aconsellaron aos seus titulares do PSdeG e BNG, “deixar facer” a Reganosa, teñan moito que explicarlles como lles meteron neste desaguisado. Un par de suxestións: que se desfagan deses “asesores” e que busquen unha saída política ao conflito, e iso só pasa porque a Planta de Gas non estea dentro da ría de Ferrol.

Lembrade: Domingo 8 de xuño, ás 12 horas no Peirao de Curuxeiras de Ferrol Vello. Manifestación.

Arriba tedes o vídeo da roda de prensa do Comité Cidadán, e aquí seguido podedes baixarvos o son musical da loita popular contra Reganosa.

Balakandra (“Ou iso parecía”)

Cuña radiofónica Radio Filispim

Contra Reganosa: peche no Concello de Ferrol

Poblicado o por
Resposta

Unha representación do Comité Cidadán está desde onte pechada na casa do Concello. Trátase de denunciar a situación na que desde o 9 de maio de 2007, atópase a ría e a cidade de Ferrol, ante a ameaza para a vida e o medio ambiente que supón Reganosa. Unha planta de gas que carece da obrigada Declaración de Impacto Ambiental e xa ten en contra dúas sentenzas do Tribunal Superior de Xustiza de Galicia.

Reganosa é perigosa, ilegal e ademais, non é legalizable. Un accidente ou atentado terían consecuencias catastróficas para nós. Lembro as declaracións do xa falecido Xeneral Gabeiras o 8 de setembro de 2001, presidente de honra do Comité Cidadán de Emerxencia, falando de que por mor da planta de Tojeiro, éramos obxectivo preferente dos terroristas. A este último faltoulle tempo para tildar a Gabeiras de tolo; o 11 de setembro Al Qaeda tiraba abaixo as Torres Xemelgas de Nova Iork.

A todo isto hai que sumarlle o pacto á siciliana firmado polo entón Presidente da Xunta, Manuel Fraga, onde esta comprometíase a pagar a falta de beneficios económicos á Reganosa do peto de todos os galegos. Reganosa é un ruinoso negocio, na actualidade está ao 30 % da súa capacidade nominal. Orza e Feijoó tamén son culpables.

A estas alturas os tres partidos galegos con representación no Parlamento de Galicia teñen responsabilidades nesta desfeita. Se un só dos grupos parlamentarios houbera pedido a planta de Reganosa fóra da ría de Ferrol, hoxe esta non estaría hoxe en Mugardos. Os cidadáns de Ferrolterra así o saben.

Agora pretenden voar o canle de entrada á ría para facilitarlle o paso aos gaseiros, máis terán que seguir a facelo coa preamar. Seguen a transportar gas por estradas en camións cisterna; e pretenden ampliar a capacidade de regasificación da planta á espera de que o Goberno central lle permita a Reganosa alimentar o sistema gasístico estatal, ante a falta de clientes galegos.

Pero, o certo é que desde a Consellería de Pesca se lles dixo aos mariscadores que non sementaran preto dos Castelos, sinxelamente van voar os seus fondos mariños, que son Rede Natura.

Ademais, o apoio político a Reganosa impide que outros operadores poidan ofertar proxectos industriais de desenvolvemento sostibles para Galicia. A proposta do superporto Ártabros como entrada de mercadorías entre América e Europa, como porto refuxio e cunha proposta de planta de gas superior a Reganosa, e cumprindo coas normativas de seguridade e legais, está á espera de mellores tempos. Polo tanto, ninguén pode dicir que non hai alternativa a Reganosa, que é unha cuestión de “patriotismo”, que este é un movemento de “non no meu patio traseiro”, de falta de solidariedade co país. Antes e agora, a isto chamábase “caciquismo”.

O 8 de xuño hai manifestación en Ferrol. Contra a maior agresión medio ambiental que sufre Galicia. Contra Reganosa, contra o desamparo no que estamos os cidadáns.

O domingo 8 de xuño, ás 12 horas acudide ao Porto de Ferrol. Contra Reganosa. Por dignidade do pobo galego. Planta de Gas, fóra da Ría de Ferrol! En defensa da vida, da ría e da legalidade!

Ver Boletín do Comité Cidadán.

Ver libro “Muros de Silencio”.

Fene con Palestina

Poblicado o por
Resposta

Catel Fene con PalestinaEsta semana, debe ser por iso de non perder o costume, desde a Asociación Fuco Buxán facemos doblete. Este martes 22 de Abril en Sargadelos Ferrol, houbo un acto sobre a actual situación medio ambiental e urbanística de Galicia. Participaron nel Antón Masa, presidente da Asociación pola defensa da Ría de Pontevedra; Xosé García, secretario xeral de Verdegaia e Rosa Méndez, directiva de Fuco Buxán e Doutora en Humanidades, especialista en Patrimonio Público. O encargado de presentar o acto foi o amigo, compañeiro e pintor Víctor García Novás.

 Así mesmo, na Casa da Cultura de Fene, inauguramos a exposición “Resistencias palestinas ao outro lado do Muro”. Como xa sabedes esta exposición xa a levamos a Santiago, á Fundación Araguaney (setembro 2007), como a Ferrol á Galería Sargadelos (novembro 2007).

 A exposición rematará o 8 de maio. No acto de peche falarán Teresa Martinez (directiva de Fuco Buxán), Magali Thill (subdirectora de ACSUR – Las Segovias), Mohamed Safa (OLP) e o alcalde socialista e amigo Iván Puentes. Será ás 20 horas, no Salón de Actos da Casa da Cultura en Fene.

A exposición consta dunha serie de fotografías de Haneen Kandalaft de Nazareth, Jamal Aruri de Ramallah, de Mathew Cassel e Gary Fields dos EE.UU., do español Raúl Gallego e da campaña “Stop The Wall”.

Debedes saber que ACSUR, xa ten delegación en Galicia. Ao seu cargo está Dolores Queiro, recen chegada de traballar en Guatemala. Sendo esta substituída polo amigo Ian Ingelmo, que lembraredes que foi o noso profesor de vídeo comunitario en “Ferrol, polo mar e a vida”, xunto con Silvia Chocarro. Para contactar coa delegación na Coruña podedes facelo a través do correo galiza@acsur.org.

Xa para rematar, adiantarvos que o 9 de maio virá Ceferino Díaz a presentar o seu libro “A esforzada conquista da Autonomía”. Un interesantísimo traballo sobre como se desenvolveu a historia que dou lugar ao actual Estatuto de Autonomía de Galicia.

Carta póstuma para Carmelo Teixeiro

Poblicado o por
Resposta

Carmelo TeixeiroBenquerido Carmelo, hai uns días que cústame sentarme a escribirche esta carta que che debo, aínda que creo que ben sabes que non é necesaria. Pero, máis que por ti, e que me perdoen tanto miña prezada Victoria coma os teus fillos; sabes que é por min, unha especie de catarses, de enfrontarme a esta segunda orfandade. Sentimento que seguro que comparto con moita xente e moitas entidades, especialmente Fuco Buxán e o Comité Cidadán de Emerxencia.

Estes derradeiros dezasete anos estivemos xuntos día a día, traballando en diferentes proxectos, tanto a nivel político como socio cultural. Xuntos fixemos a campaña municipal de 1991, e até 1993 compartimos as tarefas de organización na Agrupación Comarcal Socialista. Unha vez fóra dos cargos orgánicos do partido, participamos na fundación da revista “Razón Socialista” en 1995. Esta quedábase pequena ás nosas ansias de traballar pola transformación social e pola unidade e a rexeneración das esquerdas, e no 1999 compartimos a creación da Asociación Fuco Buxán. Máis tarde, xa no ano 2001, fronte á ameaza de Reganosa xurdiu o Comité Cidadán de Emerxencia para a Ría de Ferrol. Máis, esta é só unha parte do teu compromiso; debemos cando menos engadilo teu papel no antifranquismo, e nas responsabilidades galegas na UGT e no PSdeG – PSOE. E, tamén, deixas dous magníficos documentos; o libro do que es coautor “Muros de Silencio” e a curtametraxe “Ferrol, pola vida e o mar”.

Demasiadas cousas xuntos e por iso esta carta écheme moi difícil. A túa será unha perda que non poderemos reemplazar – que non poderei reemplazar – e, por iso, non me queda dúbida que seguiremos a reivindicar o teu nome e o teu compromiso coa cidade de Ferrol, a súa ría e a comarca. Fronte aos que sempre corren para saír na foto, ti eras o traballo calado e continuo. Tiñas claros os obxectivos e a túa teima na procura dos mesmos: non parabas até conseguilos. Nunca tiveches unha mala palabra, nunca un rancor polos que nos ferían, polos que renunciaban. Sempre axudando e apostando porque cada un de nós, e dos que nalgún momento quixeron compartir algunha parte do camiño, sacáramos o mellor que podíamos dar. Contigo outro mundo era posible e sempre sementabas, porque eras consciente de que hai que continuar na tarefa de cambialo.

Sabes o meu medo, de non saber estar á altura do teu traballo. Teño dito que ti es produto da cidade de Ferrol, formas parte do mellor de nós, do noso compromiso cos valores humanos, democráticos e sociais. Tamén teño dito que segues os vieiros dos Xaime Quintanilla, de Julio Aneiros, dos Pillado… Espero, e ti ben sabes que unha das poucas cousas que lle pido a vida e non fraquear, que non me falten folgos para non defraudarme. Moito é o que fixéchedes, moito o que ti fixeches.

Dixen que a miña vida non sería igual se non nos houberamos encontrado, e é certo. Ademais, son moi consciente de que é verdade aquilo de “dime con quen andas…”. Grazas Carmelo por ter existido, por compartir con nós, e en especial comigo, todos estes anos. Un derradeiro abrazo.

Venres 15 Homenaxe a Carmelo Teixeiro (Enlace a convocatoria)

Domingo 17 Manifestación en Compostela: Galiza non se vende.