Arquivo por etiquetas: ferrol

De falsas vítimas

Poblicado o por
Resposta

Beatriz Sestayo actúa como se fose vítima protagonista dunha suposta campaña de acoso, para tapar unha das peores derrotas e forzar un peche de filas entre os seus incondicionais. Non quere ver o dano que lle fai ao PSdeG local, a culpa sempre élle allea.

Este luns -con ausencias significativas- celebrou unha asemblea cun 20% dos afiliados. O máis salientable é que xa vai ter de xerente de urbanismo ao número seis da súa lista municipal e o cese (cuestión esta que non me causa especial sensación) da súa secretaria de organización, que tamén foi apartada da xunta do goberno de Ferrol en favor de Sas.

“Revólvese” contra a “malvada” prensa, pero non entregou o seu escano parlamentario (de dedicación exclusiva) e está en boca da cidadanía polas retribucións que, a maiores, vai ter como membro da xunta de goberno, voceira e pola asistencia a plenos.

http://www.diariodeferrol.com/opinion/manuel-cendan/falsas-vitimas/20150709003819128598.html

Por Ferrol

Poblicado o por
Resposta

As esquerdas ferrolás teñen que aproveitar a súa ocasión para facer unha aposta, de verdade, pola cidade. Hai necesidade dun verdadeiro programa conxunto que deseñe o futuro a curto e medio prazo, pero tamén sen cometer o erro de querer cambialo todo facendo penitencias innecesarias e alimentando á dereita.

O inmediato é unha auditoría das contas e frear pelotazos urbanísticos como o proxectado coa remodelación do mercado de Caranza. Tamén, hai que ter en conta como facer fronte á reforma local impulsada polo PP que pretende coaccionar aos concellos. Isto non é asunto menor. Por exemplo, afecta a como remunicipalizar a auga, a limpeza ou recuperar servizos sociais básicos.

Non se trata, simplemente, de xestionar ou representar. Senón, de recuperar a política con maiúscula, de ensanchar a democracia e o empoderamento da xente. Primeiro ás persoas.

Enlace a Diario de Ferrol.

Veredicto

Poblicado o por
Resposta

O noso entorno inmediato terá alcaldes socialistas en Neda, Pontedeume, Cerdido, Cariño, Ortigueira, Capela, As Pontes, Monfero, Ares, Valdoviño e Miño. Así o apunta a lóxica política e matemática. Este resultado, nas comarcas do nordés da provincia da Coruña, pon na man do PSdeG a Deputación, que debe ser sumada ás de Pontevedra e Lugo.

Pero, o Partido Socialista recibe unha dura derrota en Ferrol. Non hai escusas. Non hai alcaldesa, nin lista maioritaria. Toca autocrítica, responsabilidades e cumprir cos compromisos adquiridos coa cidadanía. O primeiro que a candidata asuma o seu propio resultado, abandonando o Parlamento para encabezar o novo grupo socialista no Concello. Así, tamén, a fragmentada esquerda ferrolá debe resolver a prol da cidade, reflexionar sobre a súa fraxilidade e sacar conclusións adecuadas do ruxe-ruxe da xunta electoral de onte.

Enlace web a Diario de Ferrol.

Municipais

Poblicado o por
Resposta
QuñielasCandidatosFerrolLocais2015

Quiñiela das e dos candidatos, Locais 2015.

As eleccións locais son moi especiais por dous motivos. Porque, son as que os cidadáns viven máis de preto, e porque, historicamente -na Europa occidental- a tradición rebelde dos pobos comeza enfrontando ás cidades e vilas contra os poderes despóticos.

Son nas que as e os cidadáns soen coñecer directamente aos candidatos/as e esíxenlles solucións viables aos seus problemas inmediatos. Á marxe de que, no noso caso, aos de “Ferrol en Común” de Yolanda Díaz haiba quen os confunda cos da “Marea Ártabra”.

Os electores non son xentes irresponsables, nin masoquistas. Nin unha campaña ou enquisa substitúe un resultado electoral. Simplemente, recóllese o sementado ao longo do tempo. Ademais, para cambiar un goberno municipal a alternativa ten que ter credibilidade e capacidade de liderar un novo proxecto de cidade. O 24 de maio a veciñanza dará o seu veredicto.

Enlace web a Diario de Ferrol

Entullos

Poblicado o por
Resposta

Estes días sorprendíannos coa emisión en directo da detención do señor Rodrigo Rato. E por se non o tíñamos claro co caso Bankia, o gran deus do capitalismo español ten os seus pés na lameira, dende hai décadas. Iso fai moito máis ridículo a pretensión do PP de afastalo do seu carón.

O caso é que a xestión de Rato, baixo o paraugas de Aznar, ímola pagar durante moito tempo e a un prezo moi alto. Debéramos tomar exemplo de Grecia que vai auditar a súa débeda e chamar a declarar aos dirixentes europeos implicados nesta estafa.

Mentres, aquí pagamos a crise do ladrillo cunha perda evidente de nivel de vida e agresións aos nosos dereitos. Por iso, alporízame algo que me contaban dunhas inmobiliarias locais que no alugueiro de pisos, a parte de avaliar a túa situación económica, pagar por adiantado a correspondente fianza, agora che piden que leves un avalista.

Enlace web a Diario de Ferrol.