Domingo en campaña

Poblicado o por
Resposta

Este vindeiro domingo non acaba a campaña, realmente é o día en que comeza a das municipais do 26 de maio. Será moi interesante saber como vai influír o resultado das eleccións xerais e a sorte que vaian a sufrir os diversos partidos. Máis, cando en Ferrol hai unha morea de grupos que pretenden ter opcións para sentarse na nova Corporación.

Todo apunta a que Rey Varela vai ter que redeseñar a súa estratexia electoral por xogar a ser o Rivera que quere pescar polo centro, alén da dereita e na dereita. O certo é que lle poden restar Lavodrama, os abascales e, moito máis, o seu ex secretario xeral, o señor Langtry. Na esquerda, espérase a novidade que representa un candidato socialista moi crítico coa política municipal, destes últimos anos. Porque, basicamente, aí está o miolo: un goberno dun PP débil, ou o socialista Ángel Mato que, desde a esquerda, busca amplos consensos por Ferrol.

https://www.diariodeferrol.com/opinion/manuel-cendan/domingo-en-campana/20190424232438254794.html

Ferrol na rúa

Poblicado o por
Resposta

Alégrome de que Ferrol teña na Semana Santa as rúas cheas de xente de aquí, de alá e de moito máis lonxe. É bo para a cidade e amosa que si é posible outra dinámica moi afastada do solpor a que nos teñen acostumados determinados políticos e determinados vellos grupos de presión locais.

Para acerto da cidade a suposta cuestión relixiosa, afortunadamente, non esmaga estes días. De feito, creo que o xeito inclusivo vén de que é máis un evento cultural, moi afastado da vella imposición e do control de masas de tempos pretéritos.

Así, á propia Semana Santa súmase unha ampla oferta gastronómica, de ocio e o noso entorno cultural e natural. Iniciativas saídas do propio tecido cidadán. Obviamente, as propias confrarías, ese sector emerxente da nova hostalería ou esas tan aplaudidas como a da Ruta Naval. Imaxinan ter unha empresa municipal que soubera das fortalezas turísticas de Ferrol?

https://www.diariodeferrol.com/opinion/manuel-cendan/ferrol-na-rua/20190417205720254417.html

Flor de amor

Poblicado o por
Resposta

Non están cansos de andar pola rúa e ver como os coches “okupan” todo? As dobres filas, os aparcamentos indebidos? Non están cansos de saltar da beirarrúa á calzada? Habituais estampas que temos todos os días na praza do Inferniño, á entrada á rúa Catalunya na praza de España ou na rúa da Terra, por citar tres exemplos. Unha cidade tamén é a súa forma de moverse e de pór en primeiro lugar ás persoas. Iso é calidade de vida.

Neste senso, dende a concellaría de Urbanismo, parécenos mandar unha mensaxe subliminal: contra o asalto dos coches, bancos de pedra e flores de amor. Non son quen para saber se estas flores son axeitadas para o Cantón, pero – cando menos – si resultan mellores que seguir deixando estragalo todo (outro asunto é que estas cousas merezan unha planificación pequena, máis grande ou medidas disuasorias). Pode parecer un tema menor, pero é un xeito de ir aprendendo cales son as prioridades.

https://www.diariodeferrol.com/opinion/manuel-cendan/flor-de-amor/20190410192129253073.html

Vulnerables

Poblicado o por
Resposta

Son noticias que aparecen de cando en cando, dun mundo que a maioría da poboación considera que non é o seu. Pero que si forman parte do noso e son mulleres vulnerables, neste caso venezolanas en situacións extremas, traídas por unha mafia de proxenetas para “ofertar ao mercado local”. Seguramente, a maioría da cidadanía de Ferrol non sinta ningunha responsabilidade. Nin os “consumidores” -eufemismo que oculta a violencia do “sexo de pago”- que deberan ser sancionados.

Así a policía acaba de intervir no barrio do Inferniño e nas rúas Concepción Arenal, Armada Española, Independencia, Estrada de Castela, Avenida de Vigo… E amparados na nosa indiferenza e no nome da suposta liberdade de quen está en situación de risco, hai quen leva no seu programa electoral legalizar a prostitución, abusando dobremente de mulleres vulnerables. Os únicos interesados son os proxenetas que serían recoñecidos como “emprendedores”.

https://www.diariodeferrol.com/opinion/manuel-cendan/vulnerables/20190403212102252710.html

A pataleta

Poblicado o por
Resposta

Imos ter doce candidaturas para as municipais en Ferrol, e o prazo de presentación aínda acaba o 15 de abril. Si, no noso caso, á crise económica xeral súmase unha evidente de identidade local. Esta última produto da inestabilidade e do bloqueo á que foi sometida a actividade diaria do Concello e que derivou nunha desafección xeneralizada, por parte da veciñanza.

Así, xunto a esa pluralidade, hai unha inestabilidade enorme na confección das candidaturas que, en moitos casos, non son máis que pataletas persoais que se non son satisfeitas, ameazan -non sei- se coa tormenta perfecta ou co tormento eterno.

Quizais a pataleta máis salientable sexa a de Beatriz Sestayo que sabedora da súa derrota, presentouse por candidato interposto ás últimas primarias socialistas, e rechazada -tamén- a súa candidatura a deputada nacional, pretende vulnerar o mandato que a militancia outorgoulle a Ángel Mato.

https://www.diariodeferrol.com/opinion/manuel-cendan/a-pataleta/20190327222606252222.html