Arquivo da categoría: Diario de Ferrol

Señora Rosa

Poblicado o por
Resposta

 

Cada vez é moito máis evidente que o actual equipo do alcalde de Ferrol, José Manuel Rey, non prevía gobernar. Porque, só así pódese entender a desidia con que están a tratar todo o que afecta á xestión municipal.

O autismo da actual concelleira de benestar social, Rosa Martínez. As súas desafortunadas declaracións, sobre se ela “pensaba” que non había nenos que pasan fame na nosa cidade, volven a amosar esta falta de perfil. Máis, non é novidade. Estamos acostumados a respostas que buscan entreter ao persoal e non asumir responsabilidades, pola falta evidente de traballo e preocupación polo que se ten entre as mans.

Este desprezo para a xestión propia, levan a considerarse de seu máis como uns intermediarios ante un feixe de asociacións confesionais e empresas, en vez de responsables públicos do que é patrimonio común dos ferroláns, o noso Concello.

Enlace a @DiarioFerrol

 

Creative Commons

Poblicado o por
Resposta

 

Que a Rede é unha selva pola inxente cantidade de información é unha obviedade. Pero, baixo a premisa de elaborar materiais de libre acceso e circulación hai, como contrapartida, moitas experiencias que apostan por unha cultura participativa, crítica e comunitaria.

Á marxe de que moitas iniciativas que xa hai, que unhas terán máis ou menos éxito, é evidente que quen queira ten materiais de alta calidade para formarse de xeito autodidacta. Para fomentar ese espírito crítico, necesario nestes tempos de crise social.

Páxinas como as de Somos Ninguén, Traficantes de Soños, Nocións Comúns, Coop57 ou a do profesor catalán Vicenç Navarro, unido á auto financiación de proxectos sociais por medio do crowdfounding, están a ser a base teórica e práctica dunha nova esquerda emerxente que, dende os movementos sociais, rompen as vellas e rancias hexemonías.

Enlace a Diario de Ferrol.

 

Ferrol Cre

Poblicado o por
Resposta

 

ferrol cre

Hai cousas xa imparables. As crebas producidas o 25 de maio obriga aos partidos a abrir as súas ventás, para que entre o aire fresco. E no Partido Socialista non podía ser menos.

A elección do novo secretario xeral do PSOE “á galega” é unha consecuencia desa crise de lexitimidade que sae das recentes eleccións europeas. Veremos se finalmente sae Sánchez co que Tapias reste a Madina, ou se pola contra aqueles que avalaron ao segundo, van agora votar por este último, para asegurarse que a vella garda marche.

Pero, iso non abonda. Hai que recuperar a credibilidade e a militancia perdidas. Novos mensaxes e novas voces, para un tempo novo. De aí as recentes xornadas “Ferrol Cre” das súas secretarías de política municipal e de comunicación. Unha aposta por unha nova cultura política, que debe ubicar aos socialistas no corazón dunha cidade que cre na súa xente.

Enlace a @DiarioFerrol.

 

Coronación

Poblicado o por
Resposta

 

Felipe V de España “O Animoso”

En dous días cambiaremos de xefe no Estado. Deciden por nós, unhas Cortes que esqueceron que, en democracia, o pobo é quen máis manda. E din que o referendo, que decida o pobo, non se axusta á Constitución. Manda truco!

Esquecen que Juan Carlos I foi referendado polo cidadáns. Iso si, co paquete completo da reforma política que foi sometida ás urnas, iniciando así a Transición democrática. Certo, tamén, que a intentona golpista do 23F deulle a lexitimidade. Mais, agora esgotada coa axuda dos elefantes e do xenro.

E porque as cousas non son eternas, a xente ten dereito a decidir. Máxime cunha crise social como a vista nas eleccións europeas do 25 de maio. Están sen resolver a saída da crise económica, o modelo de Estado e a configuración federal de España. Esa é a lectura. O sexto Filipe será coroado, será legal, pero non lexítimo. Si, saúde e república!

Enlace a @DiarioFerrol

 

Auga

Poblicado o por
Resposta

 

Si, a xestión do alcalde José Manuel Rey fai auga. O conflito do saneamento e as novas taxas da auga, que gravan as economías dos ferroláns, veñen dados pola incapacidade da dereita local para defender Ferrol, fronte á Xunta de Galicia.

Pretenden darse un titular nesta longa precampaña de cara ás eleccións municipais do 2015. Mentres, Augas de Galicia e a Xunta escabullen a súa obriga de poñer en marcha todo o proceso do novo saneamento. Non vaia ser que haxa problemas; e de paso fan negocio a costa dos cidadáns.

A falta de sangue da dereita ferrolá, vólvese contra deles. A rebelión entendible de Narón, só é o primeiro paso para a rebelión da propia veciñanza ferrolá, contra unha dereita incapaz de defender o ben común. Unha dereita que está de xeonllos ante os intereses crematísticos duns poucos. Acaba o alcalde ferrolán de pegarse un tiro no seu propio pé.

Enlace web á columna Letras de Cambio (@DiarioFerrol).