Sabores Ilustrados

O martes tiven ocasión de asistir á presentación do proxecto “Sabores Ilustrados no Camiño Inglés”, a carón do seu quilómetro cero, na oficina de turismo do peirao de Curuxeiras, organizada por Cites Ferrol co apoio da Xunta e do Concello de Ferrol.

Saben que son devoto deste tipo de iniciativas. Unha nova campaña que mistura o Ferrol Ilustrado co Camiño Inglés e a promoción da enogastronomía local. Ademais, en catro idiomas, para achegarse a todo posible peregrino que decida comezar aquí a súa viaxe a Santiago.

Vai na liña de fomentar e desenvolver Ferrol como destino turístico, pero tamén ten a virtude de combater a baixa autoestima que hai en algún sector da cidadanía. Si, temos potencial. E esta iniciativa tamén ponlle valor ao noso patrimonio, entendido este en sentido amplo. Somos un espazo urbano irrepetible. Saboreemos a certeza de estar onde comeza o mundo e que leva o nome da nosa cidade.

https://www.citesferrol.gal/

https://www.diariodeferrol.com/texto-diario/mostrar/2963913/sabores-ilustrados

Auga no Camiño

Ás veces son as pequenas iniciativas as que logran un grande interese, como a construción de fontes de auga para que a xente, paisanos e peregrinos, poidan abastecerse de auga. Así hai que saudar a decisión da Deputación coruñesa que vai construír vinte e catro fontes, máis o menos cada seis quilómetros, para que cada quen poida ter a oportunidade de beber auga fresca, seguindo a traza do noso Camiño Inglés.

Esta iniciativa que vai a combater o uso indiscriminado dos plásticos, tamén vai darlle un pulo e revalorizar este itinerario cultural europeo que parte de Ferrol, e que ademais é o único camiño de Santiago que atinxe só á nosa provincia. Son a suma de pequenas iniciativas as que van configurando o éxito, sobre todo na promoción de aqueles proxectos compartidos, que para algúns será relixioso, para moitos cultural e para outros moitos un investimento económico e turístico que á cidade vaille ben.

https://www.diariodeferrol.com/opinion/manuel-cendan/auga-no-camino/20210105225256294427.html

A primeira milla

Este venres festivo e este sábado son os días escollidos, por Eduardo Hermida e o seu grupo de artistas, para unha interesante intervención en Ferrol Vello e que conta co apoio da Deputación, Concello, veciños, hostaleiros e do Grupo de Traballo a prol do Camiño Inglés.

Servirá para presentar en sociedade o logo do noso tramo do Camiño de Santiago, que suma elementos como a frecha amarela que indica a dirección a seguir polos peregrinos, como aqueles que fan referencia á Parrocheira e á Fábrica de Lápices. Este logo, ademais, é unha cesión gratuíta de Hermida á cidade de Ferrol.

Pero, tan importante como iso é precisamente encher Ferrol Vello deses lapis creados por estes artistas. Unha reivindicación da necesaria rehabilitación deste barrio portuario, inicio da primeira milla, necesitado de recuperar as súas rúas e edificios. Necesitado de recuperar poboación e ilusión por un mellor futuro.

https://www.diariodeferrol.com/opinion/manuel-cendan/a-primeira-milla/20191204204403269772.html

Sexan felices

Fáganme caso, sexan felices. Abandonen un tempo esas redes sociais con tan poucos amigos reais e tantos bulos, que expresan – de xeito desaforado – que a soidade é unha gran enfermidade actual.

Aproveiten estes días, faga ou non faga “un sol de carallo” que cantaban Os Resentidos. Aproveiten, porque van ter que desdobrase, non imos dar feito entre a segunda Beer Fest, que hoxe comeza no Cantón e un Ferrol Vello, que vai recibir a unha morea de barcos que veñen a promover o noso Camiño Inglés, “Sail the way” que din eles. Sumen o tríatlon e a feira.

Pasen hoxe tamén polo Derby ou este finde pola Room. Ah, saquen as súas camisetas de Far Away Place para este sábado á noite. Xa saben: we don’t walk, we run… e fagan un oco para o torneo europeo de baloncesto femenino en Esteiro e no Porta Nova, para o Cidade de Ferrol de xadrez.

Xentes de Ferrol, fáganme caso. Sexan felices porque a vida é de función única.

https://www.diariodeferrol.com/opinion/manuel-cendan/sexan-felices/20190718001954260900.html

Aduanas

O interese xeral e a solidariedade non son feitos que abonde nas Administracións. Normalmente, cada unha actúa dándolle pulo ao seu e se poden fan caixa, para despois vendernos iso como xestión. Así que a resposta do Goberno de España, a raíz do antigo edificio de Aduanas de Ferrol, é a esperada. Non o van ceder de balde, hai unha lei en vigor que o prohibe e o teñen á mellor oferta.

Pero, este inmoble só merece unha pregunta parlamentaria? De veras -no Gabinete ministerial e a persoa titular- saben que, as e os ferroláns, o queremos para nós? Alguén notificoulles oficialmente o deterioro do edificio, que é un foco infeccioso? Dende o Concello foron quen de implicar, por exemplo, á Deputación? Hai financiamento para rehabilitar e acordo de usos? Hai unha proposta ao Ministerio de venda simbólica ou é posible algún tipo de intercambio? Fixemos os deberes? A política é buscar solucións.

https://www.diariodeferrol.com/opinion/manuel-cedan/aduanas/20180822230933234819.html