Os traballadores de Megasa, en Narón, paralizamos a produción hoxe desde as 6 horas. A folga xeral é de 24 horas. Todo desenvolveuse con absoluta normalidade. Se a patronal segue sen querer negociar un convenio xusto a seguinte data de mobilización será o vindeiro domingo 24 de agosto.
(Para ampliar as fotos pinchade nelas)
Hoxe entraremos a traballar ás dez da noite, e ao saír este domingo ás seis da mañá, comezaremos a folga xeral á que nos obriga a ir a pechazón da patronal. Este mes estaremos catro días, basicamente eliximos os domingos porque é cando máis rendable sae a produción.
Sabemos que imos a un proceso longo. Os dous últimos convenios firmáronse porque hai xa un lustro estivemos dezaoito días en folga. Así que estamos mentalizados para chegar ao nadal, se fose preciso. O curioso é poder explicarlle á xente o que pasa, as nosas reivindicacións non son esaxeradas, probablemente aqueles que descoñecen como funcionan as empresas privadas as consideren pacatas. Se pinchades na foto ou aquí, poderedes ver como o Diario de Ferrol recolleu a roda de prensa do Comité de Empresa, formado por sete delegados de UGT e dous de CCOO (hai unha terceira sección sindical, nacionalista, pero carece de representación electoral).
En fin, este domingo estou de folga!
Dentro dun par de horas pecharase o Mercado Medieval que desde o xoves 7 de agosto, estase a desenvolver en Ferrol Vello, no Peirao de Curuxeiras. Non teño dúbida de que os xornais locais falarán do Mercado Medieval como un gran éxito de visitantes. Ademais, coincide co desenvolvemento da feira marítima do Spinnaker, esta última organizada pola familia de Paloma Lago.
A anterior corporación municipal, dirixida pola Dereita, intentara a organización do Mercado da Ilustración. A verdade que resultou unha auténtica chapuza. Acabou misturado co Medievo. Practicamente, so algúns pola súa conta fixeron os traxes adecuados para o século dezaoito, así como as xentes vinculadas ao teatro aficionado (p.e. Bartoleta Teatro); o resto, incluídas todas as casetas e o resto dos participantes tiraron do que xa tiñan feito para a Idade Media e para o conxunto de eventos en Galicia.
Pero, o certo é que Ferrol non ten zona medieval. De feito as estreitas rúas onde se desenvolve tradicionalmente a feira medieval necesitan dunha urxente intervención urbanística, esixe xa a súa restauración, pero é imposible confundilas coa estrutura medieval. Non estou dicindo que non se faga, senón que esta cidade está estreitamente ligada á Ilustración e ao Racionalismo (o barrio da Magdalena aí está desde Carlos III), que xunto ao desenvolvemento da industria naval, sentarán as bases da historia ferrolá de finais do século dezanove e todo o século vinte. Serían os substratos do potente movemento obreiro desta cidade, e da loita contra o franquismo e, despois contra a reconversión salvaxe de mediados de 1980.
Neste senso segue as pautas do nacemento do movemento obreiro. A Ilustración sentará as bases para derrocar ao feudalismo e os artesáns democráticos darán lugar á Revolución Francesa. A esquerda xacobina democrática pasará a súa herdanza aos fundadores do socialismo científico. Do mesmo xeito, que Marx e Engels, en termos filosóficos son herdeiros de Hegel, Feuerbach ou Ricardo, no político o son de Aristóteles, Rousseau e Robespierre. Foi na Revolución de 1848 – A Comuna de París – onde atoparían o axente transformador da sociedade, os asalariados herdeiros directos dos vellos artesáns parisinos. Lembrade que a Nova Gazeta Renana, dirixida por Marx, definíase como o “Órgano da Democracia”.
Pero, volvendo ao asunto creo que desde o Concello de Ferrol deberían recuperar a idea da feira da Ilustración. Deben contar co numeroso movemento asociativo da cidade, pero tamén necesitan dun plan específico, tanto no deseño dos traxes, dos postos do mercado decimonónico, así como do financiamento específica deste evento. É dicir, hai traballo para as Institucións, as asociacións, os historiadores e para os creativos
Pensemos nisto.
Este martes o exército de Israel asasinaba a un neno palestino de nove anos. A desculpa era unha protesta contra o ilegal Muro que converte os territorios ocupados no maior campo de concentración da historia da Humanidade.
Non hai moito os soldados israelís detiveron ao pai da nena palestina que gravou os abusos militares contra un palestino, que participaba noutra protesta contra a ocupación. En Israel preocúpalles que se difundan imaxes do que están a facer. O vídeo o podedes ver arriba.
Así mesmo, o Goberno de Israel ordena aos seus dirixentes e militares que non veñan a España. Non vaia ser que os deteñan por crimes de lesa humanidade.
Israel foi o produto final do pacto entre o movemento sionista e a Potencia Colonial Británica de principios do século vinte, e que despois da Segunda Guerra Mundial acabou por cristalizar. A pretensión dos Británicos era introducir a unha poboación foránea co obxectivo de romper a unidade e uniformidade da poboación autóctona palestina.
Curiosamente, Israel pretende asentar a súa suposta autoridade moral e política en dous discursos antisemitas. Pretender que este estado colonial ten a súa orixe no exterminio dos seis millóns de xudeus nos campos nazis é unha ofensa á súa memoria. Así mesmo, o xenocidio que practican contra outro pobo semita como o palestino.
Aquí, por estrañas razóns, pechamos os ollos á realidade da ocupación israelí. Que diferenza hai entre Radovan Karadzic
e os dirixentes do Estado de Israel? Tras a partición en dúas do territorio palestino polas Nacións Unidas en 1948, as aldeas palestinas que quedaron baixo a bandeira de Israel foron masacradas. Os soldados israelís usaban a violencia indiscriminada contra a poboación civil desarmada, chegaron incluso a usar a violación sistemática de nenas e mulleres palestinas como instrumento para a limpeza étnica.
Ademais, pode haber democracia nun estado que ten a guerra como xeito permanente de vida? Que discrimina aos seus nacionais en función da súa orixe étnica ou filiación política? A millón e medio de palestinos se lles nega a súa identidade e se lles chama árabes – israelís, teñen prohibido os partidos que reclamen a súa palestinidade, ou o reagrupamento familiar cos que viven fóra das fronteiras actuais de Israel. Pero, tamén, se es israelita e non compartes a política de apartheid interno ou de limpeza étnica en Gaza e Cisxordania se te pode retirar a nacionalidade. Hai centos de menores palestinos en cárceres de Israel por tirar pedras contra os tanques do exército ocupante.
Todo isto para asegurar o dominio do lobby relixioso – militar sobre a poboación israelita. Tan só ducia e media de familias xudías controlan a metade da riqueza do país.
Todo para romper a unidade dese pobo árabe que vai desde o Atlántico á fronteira con Irán, e así controlar as súa reservas de gas e petróleo. Seguimos noutra fase do colonialismo.
Palestina leva sesenta anos reclamándonos unha soa cousa: protección.
A verdade que teño que ser agradecido, cando menos non pasan desapercibidas as miñas palabras. Teño unha amiga, que agora está a defender os intereses do País desde Bos Aires, periodista ela, que di que o asunto é que falen dun, aínda que sexa mal. Eu non comparto isto último, pero talvez sexa mellor así.
En todo caso, meu primeiro agradecemento a quen me publica. Son consciente de que teñen acceso a moita xente e, polo tanto, son vehículos axeitados para opinar e difundir ideas e reflexións. No meu caso, modestas. Hai quen me cualifica como destacado dirixente socialista, máis erra. Son un simple militante, que polo seu compromiso político chegou aos movementos sociais.
O que pasa é que aqueles que defendemos a saída de Reganosa da ría de Ferrol estamos sendo observados e combatidos en todas as frontes. O curioso é que algúns destes defensores de Reganosa, din que é estratéxica para a construción nacional de Galiza. O meu delito, ademais, foi mencionar no seu día a algún destacado dirixente que agora aspira a ser Conselleiro tras as vindeiras eleccións autonómicas de 2009.
Quizais, por iso non perdo tempo en descualificar persoalmente aos mandados do Coronel. O que pretenden é evitar o debate. Pero, son consciente de que a miña reflexión chegou a onde tiña que chegar. O debate sobre o traslado de Reganosa xa está na sociedade galega.
O problema, é que en medio hai xente que pode ser usada para o contrario do que eles queren. Sobre todo, senón entenden que a maior agresión medioambiental e á vida que sofren os galegos está en Mugardos, e que hai moitos intereses para defender a Reganosa e que usan todo para iso. Non me preocupan as críticas, se son sinceras. A polémica sobre o traslado de Reganosa tamén está no Colectivo Fusquenlla, en Galiza non se vende, ou en Chuza. Á marxe obviamente do orixinal en Vieiros.
Recoñezo que non sabía o do decreto da Xunta de Galicia (1 de xullo D 133/2008 de 12 de xuño), que derroga o Raminp. Mais, aportaban – obviamente non era esa a intención – unha proba de cargo contra o bipartito: unha lexislación á carta.
Para os cidadáns da ría de Ferrol, a verdade que válenos calquera das tres opcións do meu artigo “Hai alternativas a Reganosa” (mirade o post do día 24 de xullo): Porto Exterior de Ferrol, Plataforma Off Shore ou traslado a Ártabros. En todo caso, de persistir na tese de manter a actual localización en Mugardos, conduce a unha cuarta que alguén sintetizaba moi ben nos comentarios en Vieiros: demolición e peche de Reganosa. Eles verán.
Por certo, tamén escribo sobre Megasa. Que busquen ben no blog. Sobre o espigón do Porto Exterior de Ferrol coa terceira parte chegaba; entre as alegacións está a miña firma como secretario, entón, da Asociación Fuco Buxán.
Si, meu artigo “Hai alternativas a Reganosa” merece crítica. Sobre todo, porque uso a lóxica economicista dos nosos gobernantes, e dos partidos galegos implicados (PSdeG, PP e BNG). Si Ártabros está no debate é por unha dobre irracionalidade, que fai que teñan un dubidoso futuro: Reganosa e o Porto Exterior da Coruña. A primeira cunha forte resposta social e xudicial, a segunda polas enormes dificultades financeiras e técnicas. Aínda están a tempo de dar marcha atrás.
Galicia necesita, cando menos, dunha reordenación e racionalización gasística e portuaria; de cara a poder participar no enorme intercambio comercial marítimo entre América e Europa central, que pasa a poucas millas das nosas costas, e que podería entrar á Unión Europea por Galicia.
Por exemplo, o Porto Exterior de Ferrol estaba pensado para a planta de gas, sacar as industrias perigosas do interior da ría ferrolá e darlle servizo ás cidades de Ferrol e Coruña a curto prazo, cunha idea de complementariedade no contexto portuario galego e non dun liderazgo no noroeste dunha España virada cara a Madrid e ao Mediterráneo.
Volvendo á cuestión do traslado da planta de gas de Mugardos. Os tres partidos galegos saben que teñen que sacar a Reganosa da ría de Ferrol, senón serán as empresas madrileñas (si, madrileñas), quen o fagan. Están dispostas Fenosa, e en concreto Endesa a sufrir outro Brindisi? Como afectará a Reganosa, a compra por parte de Gas Natural das accións de Unión Fenosa?
Endesa e Fenosa van trasladar a Reganosa por unha esquecida orixe galega? Por patriotismo galego – madrileño? Non, vano facer por puro negocio.
Son consciente das marxes en que nos movemos. Pero, intento aportar na solución deste problema. Intento, ademais, un tripo e moi difícil equilibrio: defender os intereses da ría de Ferrol, facer país, e porque non dicilo, axudar a que o meu goberno na Xunta de Galicia teña unha saída viable, tanto técnica, económica como política.
