Arquivo da categoría: Diario de Ferrol

O mestre Torregrosa

Poblicado o por
Resposta

Hoxe á tarde temos unha cita no Teatro Jofre. Alí diversos colectivos e moitas e moitos cidadáns, como boa representación da cidade, xuntarémonos para render homenaxe a unha das grandes persoas deste Ferrol noso: José Torregrosa.

Periodista, crítico de cine, novelista, autor teatral, poeta e mestre. Persoa comprometida desde sempre e que pasou polas cárceres franquistas. Si, moitos son os seus perfís, pero permítanme subliñar a súa calidade humana. El forxador de historias, forxador de cultura, do dereito á liberdade e á vida digna, mestre de xente libre. Mestre de vida.

Somos o que somos pola xente que nos acompañan, máis cando permiten que as nosas vidas sexan mellores e poden ser vividas como deben. Polo tempo e polo esforzo que fixeron por cambiar as cousas e deixarnos abertas as grandes alamedas por onde pasan as persoas libres, para facer unha sociedade mellor.

Unha homenaxe sentida a unha persoa xenerosa e a que debemos reivindicar, máis porque el escapa do merecido recoñecemento, sempre por priorizar o ben colectivo. El que tanto nos ten ensinado, el que reconstrúe cada día o mundo, tecla a tecla. Permítanme darlle as grazas publicamente a José Torregrosa, amigo, irmán, pai.

https://www.diariodeferrol.com/articulo/opinion/mestre-torregrosa-4237421

A semana das Pepitas

Poblicado o por
Resposta

Esta cidade irrepetible, nacida ao carón do mar, que tan pronto fai grandes buques militares, como barquiños de papel para ser Patrimonio Mundial ante a Unesco. Esta cidade única que é Ferrol, ten tamén a súa banda sonora. Estes días que terán a súa cume na noite das Pepitas, é unha especie de semana grande, que reflicte un dos eventos que une a toda a cidadanía por riba de calquera diferenza social. A música feita polas rondallas é un nexo que suma ao conxunto da cidade nunha festa popular e participativa.

Así mesmo, este ano a cidade ten unha nova singradura que levar a bon porto. A consecución para que as Pepitas, e as rondallas, teñan recoñecidas a súa festa como de interese turístico nacional por parte do ministerio de Turismo. Este obxectivo é xa un compromiso do actual goberno municipal, onde da man da concelleira Eva Martínez teñen encamiñado o expediente correspondente.

Teño escrito que somos o que soñamos, pero tamén o camiño que percorremos. Así que xentes de Ferrol, “autóctonos” e “vindeiros”, xentes con todos os acentos, súmense. Esta é unha festa que une, onde a cidade canta xunta á muller, buscando un “pretexto” – se por un casual este fose necesaria – para celebrar a vida.

https://www.diariodeferrol.com/articulo/opinion/semana-das-pepitas-4214109

Un acordo por Ferrol

Poblicado o por
Resposta

Ángel Mato e o grupo socialista lograron a aprobación do chamado “Convenio de Defensa”. Era tempo de pechar o estéril debate deste últimos trinta anos. Pode gustar máis o menos, podemos ser críticos con que o ministerio de Defensa actúe como unha inmobiliaria, pero tocaba resolver. Por iso, é de agradecer o cambio de opinión do Partido Popular e tamén de Ferrol en Común.

Pero, seríamos incautos se consideraramos o acontecido como a evidencia de que si podemos artellar acordos de cidade? Quizais o preto que están as vindeiras eleccións municipais obrigaron a mudar dinámicas de non colaboración co actual goberno municipal?

Así estes días Rafael Fernández Beceiro, novo concelleiro de Facenda, xa tivo que facer fronte ás acusacións por parte da dereita e do nacionalismo sobre o nivel de investimento. E el non deixa de ter razón. Aquel goberno de maioría absoluta de Rey Varela só foi capaz de facer a metade de investimento, có actual goberno en minoría de Ángel Mato. Como vemos, realmente o importante é ter un proxecto de cidade e lograr abrir dinámicas que permitan sumar e lograr implementar o consenso social na cidade. Ás veces, menos suman máis, porque é cuestión de vontade e de traballo.

https://www.diariodeferrol.com/articulo/opinion/acordo-ferrol-4204009

O Ferrol emprendedor

Poblicado o por
Resposta

Son dos que pensa que Ferrol vai moito máis aló do que diariamente vaise reflectindo nos medios de comunicación local. Que a cidade realmente existente é a suma dos seus diversos barrios. E aí os múltiples colectivos e tamén as vontades individuais, son quen conforman a cidade real.

Así que debemos poñer en valor a ese colectivos plurais de cidadáns e a esas individualidades con vontade propia e tenaz. Por iso tras a pandemia, que parecía que todo ía quedar afundido, ou con cada crise económica, é salientable observar os sinais que permiten saber se a cidade recupera o seu pulso e oferta á súa cidadanía todas as oportunidades para desenvolver os seus proxectos vitais.

Como exemplo importante e determinante, debemos poñer en valor aos pequenos e medios empresarios, autónomos e autónomas, verdadeiros emprendedores, que teñen un sentimento de orfandade fronte as diversas administracións, e que si aportan ao verdadeiro crecemento de Ferrol e cumpren coas súas obrigas laborais. Moitos deles con décadas de actividade e con biografías contrastadas, non inventadas antonte, nin imposibles, que quizais non enchen páxinas, pero si son parte da economía real e decente desta cidade.

https://www.diariodeferrol.com/articulo/opinion/ferrol-emprendedor-4194981

Rosalía

Poblicado o por
Resposta

As galegas e os galegos temos á nosa propia Rosalía. Coherente coa nosa tradición o feito diferencial é que nós non falamos, simplemente, de pais fundadores do noso país. Rosalía de Castro é a gran matriarca, o símbolo que únenos a cada galega e a cada galego, de nacemento e de acollida, neste proxecto común e nacional que é Galicia. E como tamén niso somos diferentes, este 23 de febreiro, aquí, para celebrar o nacemento de Rosalía regalamos libros escritos na lingua propia do país e unha flor.

Así que xentes de pro. Xa saben, aproveiten en vaian ás librarías de Ferrol e da nosa comarca. Vaian a esas florerías que teñen preto. Pidan para regalar ese libro e esa flor. O feito merece a pena. Dicía Castelao que somos e seremos galegos grazas ao noso idioma, identidade única que ademais nos conecta alén do Miño e con medio mundo en cada continente.

Descubran á verdadeira Rosalía. Non esa que nos ensinaban de pequenos nos colexios chea de tópicos e prexuízos. Ela ten unha personalidade forte que racha coa sociedade do seu tempo. Primeira dos grandes autores literarios galegos, primeira dos grandes galeguistas, primeira do feminismo. Somos Rosalía, somos Galicia. Somos nación, modernidade. Somos Europa.

https://www.diariodeferrol.com/articulo/opinion/rosalia-4187428