O mercado de Caranza

Poblicado o por
Resposta

A xente do mercado de Caranza debe estar cansa de tanto esperar, de tantas palabras baleiras, de tantos anos. Pero, o certo é que a xerente de Urbanismo -nas recentes xornadas do Foro Ferrol Vivo- falaba de que xa estaban os pregos da licitación e que esta remodelación parcial ía para oito meses, de ser así van a estar moi apurados desde o actual grupo de goberno para poder inaugurar o novo mercado, se non queren coincidir coas novas eleccións municipais, datas prohibidas para eses faceres.

A esta primeira fase, terá que vir outra máis que, en verdade, converta a eses quince mil metros cadrados nun elemento central e aglutinador das actividades comerciais, de servizos, deportivas e socio-culturais que complemente Caranza, así recollido como tal no actual PXOM. Agora vai a reorganización interior dos postos do mercado e o seu equipamento adecuado ás novas necesidades, montacargas de servizo e a mellora do acceso peonil e un ascensor desde a avenida de Castelao… Unha boa nova.

Enlace a Letras de Cambio (Diario de Ferrol).

O botánico do Montón

Poblicado o por
Resposta

O mandato do alcalde Vicente Irisarri foi quen de poñer a andar o xardín botánico, situado na península do Montón. Máis de mil douscentos árbores de cincuenta e oito especies catalogadas pola SGHN. Seguramente, un gran descoñecido para a inmensa maioría da cidadanía de Ferrol, e agora, unha década despois corre un grave risco de deteriorarse e ter danos irreparables polo simple feito de estar abandonado.

Así, e tal e como quedou claro nas xornadas sobre o barrio de Caranza, organizadas polo Foro Ferrol Vivo en colaboración coa asociación de veciños e outras entidades, necesita dunha actuación urxente. De aí que a presidenta veciñal reclame unha primeira inversión de cen mil euros, necesarios para volver a poñerlle as portas e o enreixado, frear as “okupacións” e iniciar unha recuperación integral de ese espazo, que está chamado a ser un dos grandes pulmóns de Ferrol, de ocio e deporte.

https://www.diariodeferrol.com/opinion/manuel-cedan/o-botanico-do-monton/20180705000213230574.html

As facturas de Urbaser

Poblicado o por
Resposta

A privatización do servizo municipal de limpeza de Ferrol é un problema. A idea xeneralizada é que non supón ningunha mellora a súa xestión privada, nin para a cidade e menos para o seu propio persoal, abocado á precariedade e a non saber que vai pasar a medio prazo. É certo, nada fíxose nestes tres anos, porque tamén ninguén traballou para darlle unha solución definitiva, como podía ser a subrogación do seu persoal a unha nova empresa municipalizada, tiveron ocasión cos orzamentos aprobados recentemente.

Hoxe veremos que novas tráenos o pleno municipal. Non creo que ningún grupo político queira asumir ser responsable dunha folga para o día primeiro de xullo. Si, Urbaser usa ás súas e aos seus empregados. Si, aquí hai responsabilidades políticas, incluso de quen esquece a súa xestión de inicio de mandato. Precísase unha solución definitiva, para o medio prazo e fin do desacougo laboral.

https://www.diariodeferrol.com/opinion/manuel-cedan/as-facturas-de-urbaser/20180628002123229975.html

Asociacións

Poblicado o por
Resposta

O movemento asociativo en Ferrol é moi amplo e plural. Unha forma de participación que fai unha importante achega á calidade democrática e ao noso dereito á cidade, así unha morea de actividades e servizos son ofertados.

Fronte a isto, está a relación peculiar que as asociacións levan establecendo cos sucesivos gobernos municipais, indiferentemente da súa cor política. Todas as corporacións sempre apostaron por controlar ás entidades, así como por acaparar o traballo de estas últimas como se fora propio.

Como mostra a obriga de ter que incluír na publicidade das actividades o logo do Concello polo simple feito de usar un local municipal, que queiran ou non é un ben colectivo da cidadanía. Obriga que nin os propios partidos respectan como usuarios, obviamente, porque é unha inxerencia e que induce á confusión. Dando a entender que hai unha xestión directa municipal, sendo esta inexistente.

https://www.diariodeferrol.com/opinion/manuel-cedan/asociacions/20180621005258229353.html

Burocracia

Poblicado o por
Resposta

A xente común, que mira ás administracións dende unha certa distancia, non acaba de entender como funciona a nosa burocracia. Que Narón deba oitocentos cincuenta mil euros polo saneamento, e non haxa fórmula para que pague, e ademais haxa que esperar a un estudio do secretario municipal e do interventor, resulta paradoxal. Pero, quizais a trampa estea na famosa encomenda de xestión de Emafesa e que o noso concello veciño non acepta por ter dúbidas legais con ese proceder.

Así mesmo, vemos como desde o Catastro súmanse ao esperpento pretendendo facer a transmisión dunha herdanza dunha señora que ao final ten que demostrar que segue viva. Algúns coñecemos casos de asignarse fincas a outras persoas por error e ter que acabar buscando ao “propietario orixinal”. E para acabar a pretensión da Xunta de que o IBI das súas vivendas sociais sexa pagado polos seus inquilinos. En fin, a burocracia.

https://www.diariodeferrol.com/opinion/manuel-cedan/burocracia/20180613230212228640.html