Rosalía

Poblicado o por
Resposta

As galegas e os galegos temos á nosa propia Rosalía. Coherente coa nosa tradición o feito diferencial é que nós non falamos, simplemente, de pais fundadores do noso país. Rosalía de Castro é a gran matriarca, o símbolo que únenos a cada galega e a cada galego, de nacemento e de acollida, neste proxecto común e nacional que é Galicia. E como tamén niso somos diferentes, este 23 de febreiro, aquí, para celebrar o nacemento de Rosalía regalamos libros escritos na lingua propia do país e unha flor.

Así que xentes de pro. Xa saben, aproveiten en vaian ás librarías de Ferrol e da nosa comarca. Vaian a esas florerías que teñen preto. Pidan para regalar ese libro e esa flor. O feito merece a pena. Dicía Castelao que somos e seremos galegos grazas ao noso idioma, identidade única que ademais nos conecta alén do Miño e con medio mundo en cada continente.

Descubran á verdadeira Rosalía. Non esa que nos ensinaban de pequenos nos colexios chea de tópicos e prexuízos. Ela ten unha personalidade forte que racha coa sociedade do seu tempo. Primeira dos grandes autores literarios galegos, primeira dos grandes galeguistas, primeira do feminismo. Somos Rosalía, somos Galicia. Somos nación, modernidade. Somos Europa.

https://www.diariodeferrol.com/articulo/opinion/rosalia-4187428

Miguel Tellado: unha oportunidade perdida

Poblicado o por
Resposta

A verdade que seguín con moito interese a entrevista, do día 9 de febreiro, a José Manuel Rey na Cadena Ser Ferrol. A miña sorpresa foi, cando cun xogo de palabras para oíntes non moi atentos, o candidato municipal da dereita parecía dicir que, finalmente, Ferrol si ía estar no chamado Corredor do Atlántico para mercadorías en ferrocarril. Incluso el agradecía a presentación da moción presentada polo seu partido no Senado e defendida polo ferrolán Miguel Tellado, compañeiro de escano de Núñez Feijoo.

Levado por esa primeira impresión, rebusquei na prensa por si en verdade a Xunta de Galicia fóra quen de rectificar. Pero, nada de nada. Así que decidín ir as fontes orixinais e ante a pouca información que lograba da propia páxina do Senado. Grazas á deputada Natividad González, puiden facer unha lectura máis polo miúdo do Diario de Sesións e da moción presentada pola dereita.

En conclusión. Miguel Tellado defende no Senado a proposta orixinal da Xunta onde Ferrol queda fóra do Corredor. Así que ese “Ferrol ten que estar”, non é – no mellor dos casos – máis que un simple desexo de Rey Varela. O certo é que a intervención de Miguel Tellado é unha ocasión perdida para o avance de Ferrol e comarca.

https://www.diariodeferrol.com/articulo/opinion/miguel-tellado-unha-oportunidade-perdida-4176548

Xardíns de Ucha

Poblicado o por
Resposta

Permítanme animarlles a sumarse a un novo recoñecemento, a quen foi o gran arquitecto municipal Rodolfo Ucha Piñeiro, e que tan fonda pegada deixou no desenvolvemento de Ferrol con innovadoras propostas urbanísticas e proxectos de reforma. Desde o Concello teñen aberto o expediente para denominar co nome de Xardíns de Ucha a ese espazo na zona inmediata ao chamado “Palacete ou Chalé de Canido”, que ademais é unha das obras máis senlleiras que tivo o propio arquitecto.

É axeitado buscar a participación do conxunto da cidadanía e das entidades locais nestes asuntos. Sinxelamente, porque este tipo de recoñecementos, a xentes que tanto fixeron pola nosa cidade, serven para reforzar o sentimento de colectividade, de formar parte dun proxecto común, para ter sempre orgullo de cidade. Porque somos e seremos Ferrol. Única e irrepetible.

Manden as súas achegas ao rexistro do Concello de Ferrol ou a través de correo electrónico ao departamento de Protocolo de Alcaldía. Súmense a esta nova proposta tal e como pídelles, desde as súas redes sociais, a concelleira de Patrimonio Histórico Eva Martínez, recoñecida por todos e todas pola súa capacidade de traballo e de xerar iniciativas que suman.

https://www.diariodeferrol.com/articulo/opinion/xardins-ucha-4169701

Ferrol non é galega?

Poblicado o por
Resposta

Estes días vimos, como a conferencia dos presidentes autonómicos de Galicia, Castela-León e Asturias, reclamaban ao goberno de España unha maior implicación e aposta polo “Corredor Cantábrico”, que pretende modernizar o ferrocarril para o transporte de mercadorías cara a Europa. Petición atendida de xeito parcial co nomeamento do comisionado estatal, cando aínda estaban abrindo a quenda das primeiras intervencións neste evento.

Esta cuestión sinala a visión que ten a Xunta de Galicia. Deixa fóra do corredor ás cidades de Ferrol e Lugo, así como ao norte galego. Na memoria está aquela proposta non atendida do que fóra enxeñeiro naval e profesor de economía aplicada, Manuel Casal Pita, dun tren circular que si comunicaba as sete grandes cidades galegas.

O alcalde Ángel Mato foi o primeiro en saír a defender a necesidade que temos de formar parte dese corredor atlántico. Igual Rey Varela poderíalle preguntar ao presidente da Xunta se Ferrol non é Galicia? Todo isto porque Rueda, coma Feijoo, é só un representante dunha dereita coruñesa incapaz de sumar sinerxías coa comarca de Ferrolterra. O cal explica que, como contrapartida, converteran á cidade de Vigo na capital económica de Galicia.

https://www.diariodeferrol.com/articulo/opinion/ferrol-non-e-galega-4159888

Instituto do Deporte

Poblicado o por
Resposta

Estaría ben que, esa sintonía que parece existir entre os grupos políticos municipais, para a constitución dun instituto do deporte en Ferrol saía adiante. Todos somos coñecedores das dificultades habidas e por haber para a xestión das instalacións deportivas da cidade e os numerosos desencontros, onde os diversos clubs foron os protagonistas, así como unha parte da cidadanía que sufriron as dificultades dos seus fillos e fillas como usuarios.

Esta proposta do actual grupo de goberno encabezado polo socialista Ángel Mato, vén a poñer unha solución de longo alcance. Xa case na historia queda o bon sabor do desaparecido Padroado de Deportes, que nesa xeira de privatizacións irracionais levouno por diante. Unha vez máis a mellor xestión, de aquelo que atinxe á administración local e aos intereses do conxunto da cidadanía, é a pública.

Hai case unha década da onda privatizadora de servizos públicos, que do conxunto do Estado tamén chegou á cidade, pretendendo reducir todo o público a negocio lucrativo. Hoxe, esta proposta do Concello emenda un erro histórico como foi a desaparición do Padroado e vai na liña axeitada, para o deporte e para os seus usuarios e usuarias na cidade de Ferrol.

https://www.diariodeferrol.com/articulo/opinion/instituto-do-deporte-4151789