Arquivo por autores: Manuel Cendán

Descoñecido's avatar

Acerca de Manuel Cendán

"Un murmurio de palabras". https://manuelcendan.com

A trincheira

Poblicado o por
Resposta

Patronais do transporte xunto con outros sectores afectados, tanto pola suba especulativa dos carburantes como da enerxía e das materias primas, taponaron estes días a Trincheira e outras vías, colapsando a comarca e Ferrol. Viven situacións de angustia e abren contradicións sociais. Outra cousa é o oportunismo de quen os anima a aumentar a crispación, pero tamén esíxelle ao Goberno que use as Forzas Armadas contra estes colectivos.

Acertan os alcaldes da comarca que, encabezados por Ángel Mato, buscan unha vía de comunicación destas asociacións coa Xunta e o Goberno central. Mais, non valen parches temporais, hai que ir alén de baixadas de impostos ou subvencións. Senón os especuladores verán que aínda teñen marxe. Recoméndolles que tamén poñan no seu sitio as dereitas e ultras que no Congreso votan contra todas as medidas, porque para estas o prioritario é manter a hexemonía dos oligopolios.

https://www.diariodeferrol.com/articulo/opinion/trincheira-3504845

As Pías

Poblicado o por
Resposta

Hai obras que cambian radicalmente unha cidade e a proxectada para a reforma integral das Pías é unha destas. Tamén é certo que vén con varias décadas de atraso. Mágoa que as “cousas de palacio” vaian así. Mágoa que non viñera moito antes, houbéramos aforrado o desastre da praza de España, que só necesitaba mover “O Cabalo” e ter o aparcadoiro, hoxe existente, baixo o edificio da Xunta de Galicia.

Será unha obra que veremos rematada no novo mandato saído das eleccións municipais do 2023. Mais, é consecuencia directa dun compromiso decidido do alcalde Ángel Mato. Seguramente, un dos seus maiores empeños. Unha pegada que calquera quixera deixar e máis nunha cidade tan falta de autoestima. Seremos testemuñas dun novo Ferrol. Dun gran bulevar que conectará Caranza, Bertón, Ultramar, Telleiras, Esteiro e Recimil. Financiado a cargo dos fondos de recuperación Next Generation da Unión Europea.

https://www.diariodeferrol.com/articulo/opinion/as-pias-3497103

Normalidade

Poblicado o por
Resposta

Hai unhas enormes ganas de volver á “normalidade”. Está presente en cada conversa nosa ou nas que oímos en calquera café. Estes dous anos de pandemia deixa unha grande ferida na nosa economía e na nosa situación emocional.

Levamos meses con subas especulativas nas tarifas enerxéticas que para as clases traballadoras e media son imposibles, provocando unha inflación en todos os demais produtos. Á vez, Putin decidiu disputarlle a hexemonía aos EEUU e aos seus satélites, e sen ningún pudor, invadir e provocar unha catástrofe humanitaria en Ucraína.

Necesitamos unha intervención no sector eléctrico, pero tamén regular os disparates da banca e no propio funcionamento das Bolsas, hoxe a mercé dos grupos de presión. Até cando poden esperar as persoas e as empresas, a economía real, a unha decisión de Europa? Si, “Winter is coming”… pero, estamos na vida real e as persoas necesitan solucións xa.

https://www.diariodeferrol.com/articulo/opinion/normalidade-3483200

10 de Marzo

Poblicado o por
Resposta

Nuns días, en Ferrol e a súa comarca estaremos celebrando o cincuenta aniversario de aquel outro 10 de marzo, que tanta dor e feridas deixou. Pero, a pesar desta singularidade e da petición feita por quen estiveron en primeira liña, fronte as balas da represión franquista, non veremos unhas mobilizacións unitarias. Para outros era moito máis importante marcar diferenzas de grupiño e facer unha lectura separada.

Agora que tanto falamos de memoria histórica, de contribuír coa verdade dos feitos ao reforzo da democracia e do estado de benestar, deberíamos facer contas e saber se ter permitido lecturas sectarias, para alimentar un discurso de aqueles que nin estiveron nin se lles esperaba, valeu a pena. E todo por iso de escapar de situacións incómodas por dicir que a verdade histórica foi a que foi. Agochar os problemas e permitir lecturas interesadas só serviron para confundir as cousas.

https://www.diariodeferrol.com/articulo/opinion/10-marzo-3475510

Quince meses

Poblicado o por
Resposta

Estamos a quince meses das eleccións municipais e tras o incendio, acontecido na dirección estatal do PP, é evidente que estamos nun novo escenario que vai ter unha influencia determinante. Está por ver se a vella dereita vai ser quen de frear a súa sangría cara aos ultras ou se ben, en Ferrol, vai favorecer o agromar unha candidatura deste perfil antidemocrático.

Desde o goberno municipal vanse anunciando unha xeira de intervencións, moito máis alá dun simple retoque urbano e que vai a cambiar de extremo a extremo a cidade tal e como agora a coñecemos. Mentres, tanto Ferrol en Común coma o BNG quéixanse de que non teñen influencia nas políticas desenvolvidas polo alcalde socialista Ángel Mato. Son as consecuencias directas de quedarse fóra do grupo de goberno. Estar fóra, máis cando a oposición e única alternativa real está liderada por José Manuel Rey e os Populares, éche un mal negocio.

https://www.diariodeferrol.com/articulo/opinion/quince-meses-3456094