Exposición “Resistencias Palestinas” na Coruña

A ONGD Acsur-Las Segovias inaugurou o pasado 2 de setembro na Casa Museo Casares Quiroga(R/ Panaderas 12, A Coruña), a exposición: ‘Resitencias Palestinas ao outro lado do Muro’, continuando as que xa Fuco Buxán ten realizado na Comarca de Ferrol, e tamén en Santiago de Compostela.

A exposición esta aberta dende o 2 ao 26 de setembro, en horario de 11.00 a 14.00 horas e de 18.00 a 21.00 horas, os domingos e festivos: de 11.00 a
14.00 horas.

Ademais, o mércores 17 de setembro haberá unha conferencia sobre a situación dos territorios ocupados, na que intervirán:

Mohamed Safa (O.L.P),

Xan Gabeiras (Galiza por Palestina),

María Xosé Bravo (Concelleira de Cultura Concello da Coruña),

e Dolores Queiro (ACSUR-Galiza).

P.S. Israel separa ás familias palestinas (ver noticia)

Israel segue a causar dor

Este martes o exército de Israel asasinaba a un neno palestino de nove anos. A desculpa era unha protesta contra o ilegal Muro que converte os territorios ocupados no maior campo de concentración da historia da Humanidade.

Non hai moito os soldados israelís detiveron ao pai da nena palestina que gravou os abusos militares contra un palestino, que participaba noutra protesta contra a ocupación. En Israel preocúpalles que se difundan imaxes do que están a facer. O vídeo o podedes ver arriba.

Así mesmo, o Goberno de Israel ordena aos seus dirixentes e militares que non veñan a España. Non vaia ser que os deteñan por crimes de lesa humanidade.

Israel foi o produto final do pacto entre o movemento sionista e a Potencia Colonial Británica de principios do século vinte, e que despois da Segunda Guerra Mundial acabou por cristalizar. A pretensión dos Británicos era introducir a unha poboación foránea co obxectivo de romper a unidade e uniformidade da poboación autóctona palestina.

Curiosamente, Israel pretende asentar a súa suposta autoridade moral e política en dous discursos antisemitas. Pretender que este estado colonial ten a súa orixe no exterminio dos seis millóns de xudeus nos campos nazis é unha ofensa á súa memoria. Así mesmo, o xenocidio que practican contra outro pobo semita como o palestino.

Aquí, por estrañas razóns, pechamos os ollos á realidade da ocupación israelí. Que diferenza hai entre Radovan Karadzic e os dirixentes do Estado de Israel? Tras a partición en dúas do territorio palestino polas Nacións Unidas en 1948, as aldeas palestinas que quedaron baixo a bandeira de Israel foron masacradas. Os soldados israelís usaban a violencia indiscriminada contra a poboación civil desarmada, chegaron incluso a usar a violación sistemática de nenas e mulleres palestinas como instrumento para a limpeza étnica.

Ademais, pode haber democracia nun estado que ten a guerra como xeito permanente de vida? Que discrimina aos seus nacionais en función da súa orixe étnica ou filiación política? A millón e medio de palestinos se lles nega a súa identidade e se lles chama árabes – israelís, teñen prohibido os partidos que reclamen a súa palestinidade, ou o reagrupamento familiar cos que viven fóra das fronteiras actuais de Israel. Pero, tamén, se es israelita e non compartes a política de apartheid interno ou de limpeza étnica en Gaza e Cisxordania se te pode retirar a nacionalidade. Hai centos de menores palestinos en cárceres de Israel por tirar pedras contra os tanques do exército ocupante.

Todo isto para asegurar o dominio do lobby relixioso – militar sobre a poboación israelita. Tan só ducia e media de familias xudías controlan a metade da riqueza do país.

Todo para romper a unidade dese pobo árabe que vai desde o Atlántico á fronteira con Irán, e así controlar as súa reservas de gas e petróleo. Seguimos noutra fase do colonialismo.

Palestina leva sesenta anos reclamándonos unha soa cousa: protección.

“Resistencias palestinas” en Fene

Bandeira palestinaMañá xoves ás 20 horas na Casa da Cultura de Fene clausuramos a exposición fotográfica sobre os efectos que ten na poboación palestina a construción do xa declarado ilegal Muro israelí. Para achegarnos á realidade deste pobo masacrado e ocupado contaremos coa presenza de Mohamed Safa (da Organización para a Liberación de Palestina), Magali Thill (directora adxunta de ACSUR e responsable para Palestina desta ONG). Tamén estará Iván Puentes, alcalde socialista de Fene. O acto será presentado por Teresa Martínez, directiva de Fuco Buxán.

Por outra banda, por motivo alleos, tanto ao conferenciante como a Fuco Buxán, a presentación do libro “A esforzada conquista da Autonomía” (Editorial Galaxia), de Ceferino Díaz, trasládase ao xoves 22 de maio.

Como sabedes este 9 de maio fai un ano de que Reganosa, empezou a meter gaseiros dentro da ría de Ferrol. Desde o Comité Cidadán de Emerxencia fan unha convocatoria para que a veciñanza de Ferrol faga un percorrido polas rúas da cidade e “visitemos” aos socios do Consello de Administración desta regasificadora perigosa, ilegal e non legalizable. Cando ademais, a súa presenza e o apoio político que ten, impide a outros consorcios levar adiante outras propostas no exterior da ría e que non ameazaría á poboación.

Fene con Palestina

Catel Fene con PalestinaEsta semana, debe ser por iso de non perder o costume, desde a Asociación Fuco Buxán facemos doblete. Este martes 22 de Abril en Sargadelos Ferrol, houbo un acto sobre a actual situación medio ambiental e urbanística de Galicia. Participaron nel Antón Masa, presidente da Asociación pola defensa da Ría de Pontevedra; Xosé García, secretario xeral de Verdegaia e Rosa Méndez, directiva de Fuco Buxán e Doutora en Humanidades, especialista en Patrimonio Público. O encargado de presentar o acto foi o amigo, compañeiro e pintor Víctor García Novás.

 Así mesmo, na Casa da Cultura de Fene, inauguramos a exposición “Resistencias palestinas ao outro lado do Muro”. Como xa sabedes esta exposición xa a levamos a Santiago, á Fundación Araguaney (setembro 2007), como a Ferrol á Galería Sargadelos (novembro 2007).

 A exposición rematará o 8 de maio. No acto de peche falarán Teresa Martinez (directiva de Fuco Buxán), Magali Thill (subdirectora de ACSUR – Las Segovias), Mohamed Safa (OLP) e o alcalde socialista e amigo Iván Puentes. Será ás 20 horas, no Salón de Actos da Casa da Cultura en Fene.

A exposición consta dunha serie de fotografías de Haneen Kandalaft de Nazareth, Jamal Aruri de Ramallah, de Mathew Cassel e Gary Fields dos EE.UU., do español Raúl Gallego e da campaña “Stop The Wall”.

Debedes saber que ACSUR, xa ten delegación en Galicia. Ao seu cargo está Dolores Queiro, recen chegada de traballar en Guatemala. Sendo esta substituída polo amigo Ian Ingelmo, que lembraredes que foi o noso profesor de vídeo comunitario en “Ferrol, polo mar e a vida”, xunto con Silvia Chocarro. Para contactar coa delegación na Coruña podedes facelo a través do correo galiza@acsur.org.

Xa para rematar, adiantarvos que o 9 de maio virá Ceferino Díaz a presentar o seu libro “A esforzada conquista da Autonomía”. Un interesantísimo traballo sobre como se desenvolveu a historia que dou lugar ao actual Estatuto de Autonomía de Galicia.

Layla Khaled en Ferrol

Mesa Layla Khaled FerrolEste martes 1 de abril, tivemos a compañía da dirixente histórica palestina Layla Khaled. Unha muller que forma parte dos grandes mitos vivos do seu pobo contra a política de limpeza étnica que practica Israel. Deputada, dirixente da Unión Xeral de Mulleres palestinas e da Fronte Popular para a Liberación de Palestina.

Fuco Buxán tivo a sorte de poder contar con ela grazas aos amigos da Asociación Galiza por Palestina. A intervención de Layla Khaled desenvolveuse en árabe; pero grazas á tradución da vicepresidenta de GxP, a galego – palestina Laila Quintela, non houbo problema. Na mesa, tamén, acompañounos Nerea Varela, vogal desa entidade, e entre o público, Omar Contreras. Grazas, tamén, á Galería Sargadelos de Ferrol, ás súas traballadoras –nesta ocasión fixeron de anfitrionas Bárbara e Isabel – e á súa xerente, Verónica Martínez. A sala estaba chea de xente.

Se facemos caso á propaganda israelí son imposibles as características desta persoa: ser palestina, de esquerdas e muller. Á súa intervención reflicte a serenidade dun pobo xa curtido en máis de sesenta anos de ocupación. Unha poboación que sufriu en mans do exército de ocupación israelí todo tipo de tropelías. O acontecido en Palestina é o mesmo que temos gravado, máis recentemente, na nosa memoria sobre o que pasou na antiga Iugoslavia. Non hai diferenza. Ningunha.

Khaled fixo un percorrido pola situación, tanto interna palestina, como do conflito cos ocupantes israelís; así como polas condicións irrenunciables: o retorno dos oito millóns de exiliados, a libre autodeterminación do pobo palestino e un estado viable con capital en Xerusalem. Quizais, o máis novedoso fora a pretensión de pór en acordo ao conxunto da esquerda palestina. Unha terceira vía fronte ao nacionalismo de Al Fatah e o integrismo de Hamás. Así como o papel que xoga a muller palestina contra o ocupante, as súas organizacións e o seu papel a carón dos homes palestinos. E dúas peticións: que visitemos Palestina para coñecer de preto a situación real e apoio ao boicot económico a Israel.

Na cea posterior, uns poucos tivemos ocasión para profundar en algúns aspectos do conflito, da situación da muller palestina e as contradicións das militantes de Hamás, a situación do millón e medio de palestinos “nacionalizados” por Israel, un pouco de historia do antigo Reino de Galicia – a verdade que saqueille partido ao libro do amigo Camilo Nogueira, por certo dedicado por el – nas súas loitas contra a Spania musulmana, a conexión medieval entre o galego e o catalán, a estética dos chiístas iraquís copiada da semana santa católica española; e tamén, a situación latino americana. Omar leva media vida entre nós, produto do seu exilio tras o golpe de estado de Pinochet en Chile.

Un día proveitoso para o coñecemento e a solidariedade galego palestina. Ah, Layla Khaled recibiu o emblema da nosa asociación, o Fuco Buxán en cerámica de Sargadelos, deseñado para nós polo amigo e socio de honra Isaac Díaz Pardo. ¡Viva Palestina libre!

Layla Khaled en Ferrol