Arquivo por etiquetas: ferrol

Beatriz Sestayo

Poblicado o por
Resposta

Ela gañou as primarias de Ferrol, e ten xa a responsabilidade de liderar un novo proxecto e asegurar un goberno da esquerda. Deberá afondar en propostas para relanzar a cidade e que sirvan como eixos do programa común progresista. Obviamente, terá a máxima responsabilidade na confección das listas -de común acordo co PSdeG e PSOE- e amosar, claramente, que ten capacidade para evitar acompañarse de persoas que restan votos. Xa non é tempo de cuestións internas. É o tempo da cidade.

En Ferrol, é incuestionable a confluencia arredor do novo secretario provincial, Julio Sacristán. Supón un achegamento da secretaria local á voceira municipal? Romperá Sacristán cos seus tradicionais apoios? Que cambios vai traer?

Mención merecen os 26 votos a un descoñecido Mirás; obviamente, hai unha lectura local. Un apunte para Besteiro: o resultado coruñés aféctalle.

Enlace web ao @DiarioFerrol.

Propaganda

Poblicado o por
Resposta

É normal que ninguén crea que o acordo do pleno de Ferrol, sobre a rehabilitación integral e a elaboración do plan socio-comunitario para Recimil, sexa máis que un anuncio oportunista de boas intencións. Dende cando á dereita preocúpalle este barrio, mais cando de sempre apostaron polo seu derrube total?

Estamos ante un goberno da dereita sen xestión e apurando obras alleas grazas ao Plan Urban. Ás portas dunhas novas eleccións. Sumado á desfeita que sofre o PP con ducias de dirixentes imputados. Evidentemente, teñen medo da factura a pagar en maio de 2015.

#PPropaganda

#PPropaganda

O certo, e o vimos este domingo coa propaganda institucional, é que a dereita está nunha desaforada campaña de imaxe. Pero, os propietarios históricos e os inquilinos legalizables xa teñen todos os argumentos para amargarlle a campaña electoral a José Manuel Rey. A xente está farta de promesas.

Enlace web a @DiarioFerrol.

Anacleto

Poblicado o por
Resposta

O Anacleto era aquel axente secreto para misións imposibles, que saíu das mans do ilustrador Manuel Vázquez Gallego da Editorial Bruguera. Vén isto a conto porque -e perdoen a confianza- foi un recordo que se me veu á cabeza, cando tamén acompaña ao traballador de Navantia, Xoaquín García Sinde, na súa denuncia ante os medios de comunicación, do veto recibido polo CNI.

Senón, xa me explicarán cómo é posible, nesta cidade onde todos nos coñecemos, que os nosos servizos secretos fagan un informe para denegarlle a alguén a habilitación por cuestión de seguridade. Negándolle así poder acceder a determinadas seccións da naval.

Isto non é cousa nova. Hai un tempo, un amigo avogado contábame como chegara ás súas mans un informe fotográfico, onde apareciamos xentes da esquerda ferrolá do entorno do Comité de Emerxencia. Engadir a pretensión de algunha “autoridade” de vincularnos a “grupos radicais” pola nosa oposición a Reganosa. Así, grazas á dereita as nosas forzas de seguridade van, como Anacleto, en misións inauditas.

Enlace web a “Letras de Cambio”, Diario de Ferrol.

Recimil 2020

Poblicado o por
Resposta

Foto ©AVV San Fernando Recimil (Ferrol)

O alcalde José Manuel Rey quere agora un pacto para Recimil, a sete meses das eleccións municipais. Quizais porque prevese que van mudar as correlacións de forzas no Concello. Así, o posible acordo deberá ser referendado polas direccións dos partidos ferroláns, ao estar todos os grupos municipais á espera da súa renovación.

Pero, evidentemente, a base do pacto non pode ser o seu programa, Ferrol 2020, que pretendía amontoar a aqueles veciños que non puideran botar, para dedicar o resto do barrio a un novo pelotazo urbanístico. Todo acordo pasa pola rehabilitación integral, por recoñecer os dereitos dos propietarios históricos e por poñer ao día a todos aqueles inquilinos que, verdadeiramente, necesiten da solidariedade.

As máis de mil vivendas, os cento vinte locais existentes, dan para unha intervención nos eidos da dinamización económica, cultural e dos servizos. Así, tamén para unha importante oferta de alugueiro social que, en definitiva, require da constitución dunha empresa municipal ferrolá da vivenda.

Enlace web ao Diario de Ferrol (Columna “Letras de Cambio”).

Candidatos

Poblicado o por
Resposta

É evidente, estamos a oito meses das eleccións municipais. Os nervios, de algunhas persoas que aspiran a xogar un papel destacado, afloran xa. Incluso métennos a outros por medio, máis non pasa nada. A algúns aválanos o camiño andado.

Á marxe de que todos esperan a hexemonía de Sestayo no PSdeG e de EU na “marea” local, si aconsello á esquerda un pouco de acougo. O importante seguen a ser os cidadáns, e aquí esa suma de vontades colectivas chámase Ferrol; máis agora que, como afirma o euro-deputado socialista Pepe Blanco, o noso único veto vén da man do PP.

Unha dereita que quere desmantelar os Concellos e os seus servizos, para entregarllos á voracidade desa nova especulación, que eles chaman “recuperación económica”. No 2015 xogámonos moito en Ferrol. E por iso, as nosas xentes, están á espera de que nas esquerdas locais deixen de mirarse o embigo.

Enlace a Diario de Ferrol.