Arquivo por etiquetas: dereito á cidade

As pequenas cousas

Poblicado o por
Resposta

Dinme que cada vez escribo menos sobre política local e teño que facerlles unha confesión: abúrreme. Non a política local, que se é da boa, está centrada en solucionar os problemas inmediatos e máis de preto da cidadanía, senón o xeito que os diversos “aparatos” dos grupos políticos a están a facer.

Basicamente, na miña opinión, seguen ancorados nos anos noventa do século pasado. Iso lévaos a pensar que as grandes obras e os grandes titulares reflectidos na prensa son os que moven o voto cidadán. O certo, é que si, son esixencias cidadás, pero considerase amortizadas, máis se veñen con décadas de atraso e se as teñen que sufrir, directamente, por ser de longa duración.

Seguen a pensar que, con falar nun pleno municipal, iso xa abonda. Cando – se teñen sorte – acabarán saíndo nunhas liñas no xornal do día seguinte, a carón da crónica da sesión. Mentres, estamos asistindo a un cambio substancial na conformación demográfica de Ferrol e problemas como a falta de vivenda asequible ou a suba dos impostos municipais están na orde do día. Igual deberan – os nosos políticos – buscar unha comunicación directa coa cidadanía e falar diso, que na esquerda chamábase “o socialismo das pequenas cousas”.

https://www.diariodeferrol.com/articulo/opinion/as-pequenas-cousas-5359578

A capacidade de xestionar

Poblicado o por
Resposta

Andan as entidades veciñais revoltas en Ferrol, e se por algo se caracterizan é por facer esforzos por levarse ben cos sucesivos gobernos municipais, sen importarlles a súa cor. Elas están a algo “tan conservador” como buscar solucións para os problemas do día a día dos seus barrios. Non teñen teñen tempo para retóricas.

Queren solucións a problemas reais e inmediatos e agora non hai escusas. Lembran aquelo de que Ferrol necesitaba unha maioría absoluta? Pois, parece que iso quedou nun simple eslogan de campaña. Agora, resulta que trece son menos que oito.

Outra cousa que sae mal é o populismo. A renuncia á recadación por infraccións de tráfico acaba de facerlle un burato ás contas municipais de dous millóns de euros, que a actual corporación popular pretende paliar subindo un dez por cento o IBI a toda a cidadanía. Iso si, deixando que os bens da Xunta de Galicia non tributen por este concepto, algo que ninguén pode entender.

Si, a xestión desta maioría absoluta descansa na afabilidade do alcalde Rey Varela e na fichaxe de Ponte Far, concelleiro de cultura. Pero, todo goberno serio necesita amosar a súa capacidade de xestionar as cousas que inciden directamente na vida da cidadanía.

https://www.diariodeferrol.com/articulo/opinion/capacidade-xestionar-5033429

O diario do centro do mundo

Poblicado o por
Resposta

Vinte e cinco anos compartindo un mesmo camiño. Xuntos o Diario de Ferrol e as comarcas de Ferrolterra, Eume e Ortegal. Expresando un xeito de vivir e unha concepción do mundo. Rompendo silencios que pretendían frear o desenvolvemento da nosa sociedade. A terra da Ilustración, das e dos traballadores de marzo, a terra de todos os acentos e de todas as cores. Este territorio feito de aceiro líquido, auga e barcos.

O Diario de Ferrol suma varios ingredientes que faino diferente: darlle voz á opinión pública das nosas comarcas e o dereito a vivir dignamente na nosa terra. Opinión pública e dereito á cidade. Rompe censuras e o discurso hexemónico de aqueles que din que estamos na fin da historia e que, polo tanto, tanto ten e pretenden impoñer a apatía. Pero, fronte a isto: alegría! Si, alegría porque participamos nesta festa popular que é o aniversario do noso xornal local.

Acusarannos de ter pensamentos perigosos. Xa saben que non temos medo en construír ese outro relato que fala de traballo, dignidade, esforzo, causa común, presente e futuro. A alegría crea comunidade. Unidade e avance. Por iso ter voz propia é perigosa. Este xornal local serve para conformar un sentir xeral contra a tiranía do conformismo e da ignorancia. Un periódico como o Diario de Ferrol é unha aposta contra a uniformidade que impón a globalización, que en nada respecta as identidades propias e alleas.

Somos palabras, somos xornal, soños, metas por alcanzar. O Diario de Ferrol leva vinte e cinco anos sendo o alter ego das nosas comarcas. O orballo que empapa, un poder civil que deixa ben claro que existimos e temos obxectivos como sociedade. Fronte á intemperie, no amor e no desamor. O Diario é a proa do noso sentir colectivo. Desta terra e deste tempo. Os tempos son chegados. Diario de Ferrol, vinte e cinco anos de militancia por esta terra infinita, no centro do mundo. Parabéns!

https://www.diariodeferrol.com/articulo/25-aniversario/25-aniversario-diario-do-centro-do-mundo-4883987

Especial 25 Aniversario- Diario de Ferrol – Domingo 2 de xuño 2024.

Ser Ferrol

Poblicado o por
Resposta

Estes días, quizais, sexan un bo expoñente de como a cidade vai por un sitio e a política local por outro. Cantos de vostedes seguiron polo miúdo o último pleno municipal? Cantos saben dos favores que lle imos facer á Xunta asumindo competencias súas na nova proposta de orzamentos? Das promesas incumpridas, que leva a subir a presión fiscal ou a non facer desaparecer o radar da Malata?

Nin sequera a Semana Santa ferrolá serve para debater sobre o tipo de turismo que queremos. Mais, cales son esas novas propostas para facer fronte a ese malestar que, a poucos, vaise instalando na poboación local contra a masificación, así como contra os pisos turísticos e os barrios con estrés?

Somos e temos os mesmos problemas que calquera cidade europea. Hai moitas persoas que apostamos por un Ferrol vivo, onde o dereito á cidadanía sexa real. Unha cidade onde desenvolver cada proxecto de vida, onde a propaganda non afogue o día a día dos seus moradores. Onde a paixón sexa pola boa vida e o sufrimento unha cuestión da estética cultural. A pesar da choiva Ferrol está tomada pola xente, que ten gañas de vivir. Talvez por iso, o primeiro sexa ter fe en nós mesmos e nesta cidade que está a carón do mar. Ser Ferrol.

https://www.diariodeferrol.com/articulo/opinion/ferrol-4772412

Ferrol 2030

Poblicado o por
Resposta

Historicamente, o deseño de Ferrol vén dun feito constatado ao longo dos anos: as liñas fundamentais do desenvolvemento da cidade parten sempre de gobernos municipais socialistas, onde os demais acaban seguindo a súa estela. Pero, por tanto cambio de cor nas súas sucesivas corporacións, indo a tiróns e a velocidade lenta. Máis agora cunha nova administración local cun baixo nivel de xestión, a pesar da súa maioría absoluta.

Aí está o que acontece coa política de aparcadoiros ou alugueiro, a xestión da empresa de turismo, a falta de iniciativas para a candidatura de Ferrol a patrimonio mundial, a biblioteca municipal, as multas da Malata… Todos son anuncios e poucas as realidades.

Así, será moi interesante a vindeira reunión do foro urbano convocado polo actual goberno local de Ferrol. Un debate enmarcado dentro da axenda 2030, que busca un consenso institucional e cidadán sobre o futuro inmediato das nosas cidades.

Fronte a un modelo de cidade hostil, excluínte, invivible para amplos sectores da poboación pola agravación das desigualdades urbanas, que só resérvanos o papel de consumidores, debemos desenvolver outro inclusivo dos nosos dereitos á cidadanía. A “civitas” fronte a “polis”.

https://www.diariodeferrol.com/articulo/opinion/ferrol-2030-4683379