Arquivo da categoría: As Terras do Nordés

Ferrolterra, Trasancos, Eume e Ortegal

Polémica na Rede sobre o Superporto Ártabros

Poblicado o por
4

A verdade que teño que ser agradecido, cando menos non pasan desapercibidas as miñas palabras. Teño unha amiga, que agora está a defender os intereses do País desde Bos Aires, periodista ela, que di que o asunto é que falen dun, aínda que sexa mal. Eu non comparto isto último, pero talvez sexa mellor así.

En todo caso, meu primeiro agradecemento a quen me publica. Son consciente de que teñen acceso a moita xente e, polo tanto, son vehículos axeitados para opinar e difundir ideas e reflexións. No meu caso, modestas. Hai quen me cualifica como destacado dirixente socialista, máis erra. Son un simple militante, que polo seu compromiso político chegou aos movementos sociais.

O que pasa é que aqueles que defendemos a saída de Reganosa da ría de Ferrol estamos sendo observados e combatidos en todas as frontes. O curioso é que algúns destes defensores de Reganosa, din que é estratéxica para a construción nacional de Galiza. O meu delito, ademais, foi mencionar no seu día a algún destacado dirixente que agora aspira a ser Conselleiro tras as vindeiras eleccións autonómicas de 2009.

Quizais, por iso non perdo tempo en descualificar persoalmente aos mandados do Coronel. O que pretenden é evitar o debate. Pero, son consciente de que a miña reflexión chegou a onde tiña que chegar. O debate sobre o traslado de Reganosa xa está na sociedade galega.

O problema, é que en medio hai xente que pode ser usada para o contrario do que eles queren. Sobre todo, senón entenden que a maior agresión medioambiental e á vida que sofren os galegos está en Mugardos, e que hai moitos intereses para defender a Reganosa e que usan todo para iso. Non me preocupan as críticas, se son sinceras. A polémica sobre o traslado de Reganosa tamén está no Colectivo Fusquenlla, en Galiza non se vende, ou en Chuza. Á marxe obviamente do orixinal en Vieiros.

Recoñezo que non sabía o do decreto da Xunta de Galicia (1 de xullo D 133/2008 de 12 de xuño), que derroga o Raminp. Mais, aportaban – obviamente non era esa a intención – unha proba de cargo contra o bipartito: unha lexislación á carta.

Para os cidadáns da ría de Ferrol, a verdade que válenos calquera das tres opcións do meu artigo “Hai alternativas a Reganosa” (mirade o post do día 24 de xullo): Porto Exterior de Ferrol, Plataforma Off Shore ou traslado a Ártabros. En todo caso, de persistir na tese de manter a actual localización en Mugardos, conduce a unha cuarta que alguén sintetizaba moi ben nos comentarios en Vieiros: demolición e peche de Reganosa. Eles verán.

Por certo, tamén escribo sobre Megasa. Que busquen ben no blog. Sobre o espigón do Porto Exterior de Ferrol coa terceira parte chegaba; entre as alegacións está a miña firma como secretario, entón, da Asociación Fuco Buxán.

Si, meu artigo “Hai alternativas a Reganosa” merece crítica. Sobre todo, porque uso a lóxica economicista dos nosos gobernantes, e dos partidos galegos implicados (PSdeG, PP e BNG). Si Ártabros está no debate é por unha dobre irracionalidade, que fai que teñan un dubidoso futuro: Reganosa e o Porto Exterior da Coruña. A primeira cunha forte resposta social e xudicial, a segunda polas enormes dificultades financeiras e técnicas. Aínda están a tempo de dar marcha atrás.

Galicia necesita, cando menos, dunha reordenación e racionalización gasística e portuaria; de cara a poder participar no enorme intercambio comercial marítimo entre América e Europa central, que pasa a poucas millas das nosas costas, e que podería entrar á Unión Europea por Galicia.

Por exemplo, o Porto Exterior de Ferrol estaba pensado para a planta de gas, sacar as industrias perigosas do interior da ría ferrolá e darlle servizo ás cidades de Ferrol e Coruña a curto prazo, cunha idea de complementariedade no contexto portuario galego e non dun liderazgo no noroeste dunha España virada cara a Madrid e ao Mediterráneo.

Volvendo á cuestión do traslado da planta de gas de Mugardos. Os tres partidos galegos saben que teñen que sacar a Reganosa da ría de Ferrol, senón serán as empresas madrileñas (si, madrileñas), quen o fagan. Están dispostas Fenosa, e en concreto Endesa a sufrir outro Brindisi? Como afectará a Reganosa, a compra por parte de Gas Natural das accións de Unión Fenosa?

Endesa e Fenosa van trasladar a Reganosa por unha esquecida orixe galega? Por patriotismo galego – madrileño? Non, vano facer por puro negocio.

Son consciente das marxes en que nos movemos. Pero, intento aportar na solución deste problema. Intento, ademais, un tripo e moi difícil equilibrio: defender os intereses da ría de Ferrol, facer país, e porque non dicilo, axudar a que o meu goberno na Xunta de Galicia teña unha saída viable, tanto técnica, económica como política.

…E van 24 números de “Razón Socialista”

Poblicado o por
Resposta

Onte presentamos o número 24 da revista semestral “Razón Socialista”, editada desde o ano 1999 pola Asociación Cultural Fuco Buxán. O primeiro número chegou ás rúas o Primeiro de Maio de 1995.

Portada Razón Socialista 24Razón Socialista naceu inicialmente da man de militantes socialistas descontentos co acontecer interno do PSdeG – PSOE, para máis tarde ampliar ese grupo inicial a outras xentes do conxunto da esquerda ferrolá e que deu lugar a unha atípica agrupación socio – cultural como Fuco Buxán, hoxe cunha gran pluralidade interna, tanto política, como sindical, e que ten como obxectivo común a rexeneración da esquerda e a transformación da sociedade desde postulados progresistas e galeguistas.

E iso, tamén vese nas páxinas da revista. Agora, xa a podedes baixar en formato pdf, ou ben pedila en formato papel á propia asociación cultural.

Quizais, a portada deste número 24 sexan unha das máis impactantes. Tras o edificio derrubado da rúa Madalena, vese ao fondo a Casa do Concello de Ferrol. Na portada, tamén se destacan, entre outras, as firmas de Santiago Carrillo, do Presidente asturiano Álvarez Areces, do sempre amigo Jordi Pedret, e do tamén amigo, Xosé Manuel Sarille, fundador da Mesa pola Normalización Lingüística.

Na presentación de hoxe, a intervención destacada foi a de Aitor Bouza Manso,da Asociación Xuvenil “Aprende a escoitar”, o seu artigo “Os mozos e as mozas tamén sabemos escoitar” o atoparedes na páxina 28. É este un colectivo do IES Carvalho Calero do barrio de Caranza, que están a traballar con xente maior, buscando nexos para que estes últimos sintan que aínda son importantes, e útiles de seu e para o conxunto da sociedade. Recoméndovos que visitedes a súa páxina, para coñecelos mellor; así mesmo déixovos cun vídeo do traballo social que están a desenvolver.

É difícil non recomendar todos os artigos deste número. Desde a entrevista ao alcalde de Ferrol, Vicente Irisarri, á que se lle fai a Victoria Fernández; desde a cuestión chilena á palestina; da situación da nosa lingua á situación da policía local ferrolá… Quizais – mira que é difícil optar – me paro nos artigos de Pedret, sobre a desaparición da esquerda italiana; ou no artigo de Lucía Albor, que propón o superporto Ártabros como solución ao conflito de Reganosa. Quizais, sexan máis novedosos polo xeito de enfocar estes asuntos.

En fin, pinchade aquí, e baixar e difundide este novo número 24 de Razón Socialista.

Outra sentenza contra Reganosa

Poblicado o por
Resposta

Mañá domingo será a manifestación contra Reganosa. Máis esta vez hai novas importantes e que son moi saudables, para a loita democrática do pobo de Ferrolterra contra a maior agresión medioambiental e para a vida das persoas que sufre Galicia. O Tribunal Superior de Xustiza de Galicia acaba de decretar a ilegalidade da modificación do Plan Xeral de Ordenación Municipal do Concello de Mugardos polo que se daba cobertura á perigosa, ilegal e non legalizable planta de gas dentro da ría.

Ademais, o Comité Cidadán de Emerxencia para a Ría de Ferrol acaba de presentar ante a Fiscalía especial anticorrupción unha denuncia por presunto enriquecemento ilícito, onde están ademais implicados o anterior Presidente da Xunta e o seu ex Conselleiro de Economía, Srs. Fraga e Orza, respectivamente, como responsables políticos.

Tamén, a Unión Europea aceptou a trámite reiniciar o expediente aberto ao Goberno español por presunto grave incumprimento das directivas europeas de medio ambiente.

Talvez, aqueles “asesores” da actual Xunta de Galicia, e que aconsellaron aos seus titulares do PSdeG e BNG, “deixar facer” a Reganosa, teñan moito que explicarlles como lles meteron neste desaguisado. Un par de suxestións: que se desfagan deses “asesores” e que busquen unha saída política ao conflito, e iso só pasa porque a Planta de Gas non estea dentro da ría de Ferrol.

Lembrade: Domingo 8 de xuño, ás 12 horas no Peirao de Curuxeiras de Ferrol Vello. Manifestación.

Arriba tedes o vídeo da roda de prensa do Comité Cidadán, e aquí seguido podedes baixarvos o son musical da loita popular contra Reganosa.

Balakandra (“Ou iso parecía”)

Cuña radiofónica Radio Filispim

Contra Reganosa: peche no Concello de Ferrol

Poblicado o por
Resposta

Unha representación do Comité Cidadán está desde onte pechada na casa do Concello. Trátase de denunciar a situación na que desde o 9 de maio de 2007, atópase a ría e a cidade de Ferrol, ante a ameaza para a vida e o medio ambiente que supón Reganosa. Unha planta de gas que carece da obrigada Declaración de Impacto Ambiental e xa ten en contra dúas sentenzas do Tribunal Superior de Xustiza de Galicia.

Reganosa é perigosa, ilegal e ademais, non é legalizable. Un accidente ou atentado terían consecuencias catastróficas para nós. Lembro as declaracións do xa falecido Xeneral Gabeiras o 8 de setembro de 2001, presidente de honra do Comité Cidadán de Emerxencia, falando de que por mor da planta de Tojeiro, éramos obxectivo preferente dos terroristas. A este último faltoulle tempo para tildar a Gabeiras de tolo; o 11 de setembro Al Qaeda tiraba abaixo as Torres Xemelgas de Nova Iork.

A todo isto hai que sumarlle o pacto á siciliana firmado polo entón Presidente da Xunta, Manuel Fraga, onde esta comprometíase a pagar a falta de beneficios económicos á Reganosa do peto de todos os galegos. Reganosa é un ruinoso negocio, na actualidade está ao 30 % da súa capacidade nominal. Orza e Feijoó tamén son culpables.

A estas alturas os tres partidos galegos con representación no Parlamento de Galicia teñen responsabilidades nesta desfeita. Se un só dos grupos parlamentarios houbera pedido a planta de Reganosa fóra da ría de Ferrol, hoxe esta non estaría hoxe en Mugardos. Os cidadáns de Ferrolterra así o saben.

Agora pretenden voar o canle de entrada á ría para facilitarlle o paso aos gaseiros, máis terán que seguir a facelo coa preamar. Seguen a transportar gas por estradas en camións cisterna; e pretenden ampliar a capacidade de regasificación da planta á espera de que o Goberno central lle permita a Reganosa alimentar o sistema gasístico estatal, ante a falta de clientes galegos.

Pero, o certo é que desde a Consellería de Pesca se lles dixo aos mariscadores que non sementaran preto dos Castelos, sinxelamente van voar os seus fondos mariños, que son Rede Natura.

Ademais, o apoio político a Reganosa impide que outros operadores poidan ofertar proxectos industriais de desenvolvemento sostibles para Galicia. A proposta do superporto Ártabros como entrada de mercadorías entre América e Europa, como porto refuxio e cunha proposta de planta de gas superior a Reganosa, e cumprindo coas normativas de seguridade e legais, está á espera de mellores tempos. Polo tanto, ninguén pode dicir que non hai alternativa a Reganosa, que é unha cuestión de “patriotismo”, que este é un movemento de “non no meu patio traseiro”, de falta de solidariedade co país. Antes e agora, a isto chamábase “caciquismo”.

O 8 de xuño hai manifestación en Ferrol. Contra a maior agresión medio ambiental que sufre Galicia. Contra Reganosa, contra o desamparo no que estamos os cidadáns.

O domingo 8 de xuño, ás 12 horas acudide ao Porto de Ferrol. Contra Reganosa. Por dignidade do pobo galego. Planta de Gas, fóra da Ría de Ferrol! En defensa da vida, da ría e da legalidade!

Ver Boletín do Comité Cidadán.

Ver libro “Muros de Silencio”.