Arquivo por etiquetas: municipais 2023

Alcalde Rey Varela

Poblicado o por
Resposta

Debemos comezar por felicitar ao novo alcalde de Ferrol pola súa vitoria do 28 de maio. José Manuel Rey aglutina á dereita tradicional, sen fugas molestas cara a Vox e capitaliza a pouca política social que fan desde a Xunta e as entidades caritativas afíns; feito este que explica que o PP “arrase” en Recimil, por exemplo. Así como o voto de novos ferroláns de relixión evanxélica.

Desde a esquerda, é unha torpeza menos valorar o liderado de Rey Varela, con perfil propio, centrado, sen radicalismos. Debemos sumarlle un PP altamente mobilizado, presente no movemento veciñal e deportivo que, xunto á confluencia dos seus cargos públicos, Autoridade Portuaria, Delegación Territorial e a influencia mediática, fan da dereita a principal organización social da cidade.

Sabemos da inexactitude da enquisa que estivo tutelando a campaña. O PP nunca tivo 14. As esquerdas suman máis votos, pero grazas á lei electoral o PSOE – por 150 votos – perde o concelleiro 13 en favor do PP.

As esquerdas debemos asumir que non estamos no Ferrol dos anos 90, temos necesidade de construírmos organizacións vivas que sumen tanto ás clases traballadora e media, como a eses pequenos empresarios que mal sobreviven nun presente moi complicado. Tamén hai debates incómodos que debemos abordar, nesta cidade de tantos perfís sociais.

https://www.diariodeferrol.com/articulo/opinion/alcalde-rey-varela-4317272

O relato electoral

Poblicado o por
Resposta

Nos últimos anos asistimos a unha loita por impoñer uns relatos políticos que, de algún xeito, ten máis que ver coa ficción literaria ou cinematográfica. Dáse, especialmente, entre aqueles partidos que chegan a un proceso electoral sen poder ensinar xestión e que se deixaron levar pola comodidade dos plenos municipais.

O relato, ou a ficción – como di Vargas Llosa – “é unha mentira que encubre unha profunda verdade; ela é a vida que non foi, a que os homes e mulleres dunha época dada quixeron ter e non tiveron e por iso deberon de inventala”. Engadía o Nobel que “os xogos non soen ser perigosos, sempre e cando non pretendan desbordar o seu espazo propio e enredarse coa vida real”.

Vén isto a colación, porque se ben é lexítimo que as forzas políticas intenten vender a súa visión, debe estar baseada en feitos. Non ser unha especie de apocalipse local do que seremos salvados in extremis cambiando o voto. Así mesmo, é moi criticable que se espere – até o derradeiro momento – á convocatoria electoral para facer unha denuncia xudicial que, evidentemente, pretende embarrar e botar fóra do xogo democrático a un goberno municipal lexítimo. A contra denuncia evitará o simple arquivo da causa pasadas as eleccións.

https://www.diariodeferrol.com/articulo/opinion/relato-electoral-4279589

Precampaña ferrolá

Poblicado o por
Resposta

Estamos xa totalmente inmersos nela. Pero, deberemos esperar a saber até o propio día da votación cal será a decisión da cidadanía, para un novo mandato á fronte do Concello de Ferrol. O que si sabemos é que este é un debate entre dous: o socialista Ángel Mato e a dereita liderada por José Manuel Rey.

No caso de Ángel Mato ten no seu haber facer fronte á pandemia, a xestión municipal co dobre de investimentos que tivo aquel único goberno de maioría absoluta do PP, impulsar á autoestima de Ferrol coa candidatura a Patrimonio Mundial, así como un cambio radical urbanístico que nos converte, por dereito propio, nunha cidade plenamente europea.

José Manuel Rey vén de facer unha errática precampaña tutelado pola Xunta de Galicia, asumindo como propias as débedas desta. Mais, é certo que dispón dun electorado moi fiel, aínda que o concurso da Vox vaille “marcar” o discurso e, por momentos, abandonar a comodidade do centro político.

As incapacidades dos comúns e dos nacionalistas, que lles impediron formar parte do goberno municipal liderado por Ángel Mato, son os “pecados” que estas formacións deberán purgar ante os seus electores. De Podemos, se espera que sexan máis unha axuda en favor das aspiracións de Rey Varela.

https://www.diariodeferrol.com/articulo/opinion/precampana-ferrola-4271493

As apariencias importan

Poblicado o por
Resposta

A fachada marítima de Ferrol terá un cambio fundamental ante a nova intervención urbanística proxectada pola Xunta de Galicia e a Autoridade Portuaria, entre Curuxeiras e a Malata. Un investimento que supera os catro millóns e medio de euros. Primeiro, agradecer a estas administracións públicas que participen en mellorar as cousas, pero permítanme dicir que en política é tan importante ser como parecer.

Estamos a nos acostumar a que os partidos confunden os seus intereses, lexítimos si, pero, en moitos casos, cun uso inadecuado das institucións. Estaban presentes máximos representantes da administración autonómica e do porto, mais a cidade estaba “ausente”. Nestas intervencións tan importantes o lóxico, normal e protocolario é a presenza da beneficiada a través do seu máximo representante, é dicir, o alcalde.

Mais seguro que ningunha xunta electoral vai investigar se este acto institucional converteuse nun acto de partido pola exclusiva e preferente presenza dun precandidato municipal. Ningún político vai escusarse pola “aparencia partidaria”, nin oiremos aquelo do Emérito: “perdón, equivoqueime, non volverá a pasar”. Pero, xa dicían os madrileños ao paso de Fernando VII: “Viva El-Rei”.

https://www.diariodeferrol.com/articulo/opinion/as-aparencias-importan-3905644

Abrir a muralla

Poblicado o por
Resposta

Na temporada alta do verán, este país queda paralizado e o mundo queda reducido a unha terraza fronte ao mar e un par de libros. Por iso, pretendía deixar á marxe a política municipal, xa tan condicionada polas vindeiras eleccións.

Pero, en Ferrol adiantouse o outono político. Iso si, deixando tamén as claras as estratexias de cada formación. Así o BNG e o PP, no pleno da semana pasada, deixaron á zona rural sen saneamento ao impedir coa suma dos seus votos a aprobación das contas de Emafesa. E xunto con FeC, apostaron por seguir impedindo que haxa novo contrato para Parques e Xardíns, cando o informe xurídico foi categórico marcando as marxes legais do mesmo.

Fronte á “gran coalición”, o alcalde socialista Ángel Mato e a súa proposta para un novo aparcadoiro en Esteiro, abrindo máis muralla entre Batallóns e Navantia. Duascentas corenta prazas cun orzamento previsto de dous millóns de euros. Acertada proposta que si ten un efecto disuasorio, eliminando presión de tráfico rodado do centro da cidade pero a un paso de todo. Esta colaboración urbanística entre Concello, Navantia e Defensa abre a cidade ao mar, indo na liña correcta do que ten que ser un proxecto de cidade nestes tempos.

https://www.diariodeferrol.com/articulo/opinion/abrir-muralla-3870392