A vida encontra sempre un camiño para proseguir a súa andaina, e a senda dos rebeldes é a única que a ética xustifica sobradamente. Así a sociedade e as organizacións que a conforman están vivas, porque os seus rebeldes teñen trazada a liña para o cambio, sabendo que a liberdade ten un prezo.

Os partidos son unha mestura de proxecto político e ambicións persoais, cando non son directamente secuestrados por aqueles que usan a política para facer negocios de dubidosa licitude. A isto último, en lingua antiga ferrolá chámanlle “soutismo”, sobre o cal hai ampla hemeroteca e tres accesibles expedientes documentados, cun contido que non hai muíño que terme de semellante lameira.

O socialismo ferrolán está no punto onde pode telo todo ou perdelo definitivamente. E os seus rebeldes (con causa) saben que o mundo se transforma tamén dende a mobilización, obrigando ás institucións a asumir as demandas dos cidadáns, sobre todo si unha sociedade como a ferrolá está nunha fonda situación de emerxencia, provocada pola crise xeral, á que se suma a que parece definitiva no naval. Estamos ante a meirande crise de supervivencia desta cidade.

Na esquerda do PSdeG ferrolán teñen dúas razóns polas que están dispostos a abrasarse: a paixón por Ferrol e a defensa do socialismo máis democrático. Por iso son rebeldes e van continuar ese camiño. Por iso, escriben letras para cambiar un mundo que comeza en Ferrol.

Enlace á versión dixital do Diario de Ferrol.