Coñecíamos a posición do alcalde, pero a resposta dos socialistas, nacionalistas e un concelleiro de IF, agora próximo ao PP, eran incógnitas a resolver:

A primeira sorpresa foi a intervención de Xaime Bello, ex alcalde e voceiro do BNG ferrolán. A súa disertación daba, por momentos, a impresión de que os nacionalistas volvían ao punto de partida. Pero, non. Nun triplo salto mortal e tras conseguir do actual alcalde do PP, o desglose da votación en dúas – recurso 1242, e retirada de todos os contenciosos por parte do concello – o BNG votaba co PP, gañando Reganosa. Na votación abstivéronse 3 concelleiros socialistas –faltaban Carbajales e un de IF – e votaron coherentemente a Esquerda Unida de Yolanda Díaz e Miramontes e os outros cinco concelleiros de IF.

Na segunda votación, coa abstención de BNG e PSOE, e tras o empate, o voto de calidade do Alcalde conseguía a retirada dos restantes contenciosos xudiciais abertos polo Concello. Teño as miñas dúbidas de se é legal aprobar unha resolución con tan só sete votos de vintetrés. Aínda que unha parte deles foron á abstención, non hai maioría de votos favorables. En calquera caso, o alcalde debera deixar o asunto sobre a mesa e tratar de buscar un acordo de consenso en temas tan transcendentais. ¿Pode ser legal esta resolución do Pleno? Non sei, pero é ilexítima.

Obviamente, deixan sós aos veciños ferroláns e as súas asociacións ante o perigo… A pesar de todo, seguen vivos os 7 contenciosos contra Reganosa do Comité Cidadán, ademais tendo en conta que unha sentenza favorable ao concello ferrolán, foi refrendada por outra favorable ao propio Comité de Emerxencia. Hoxe, Reganosa aínda non ten permiso de funcionamento, nin D.I.A., nin Protocolo de Seguridade avaliado pola lexislación vixente. E sigue aberto o expediente na Comisión Europea. É dicir, aínda queda un longo camiño e moi difícil de sortear para os intereses desta empresa.

Evidentemente, vai traer repercusións políticas. O feito de ter obtido un apoio explícito do BNG e pasivo de tres concelleiros socialistas, para Juan Juncal é darlle a razón e facilitarlle o camiño de cara as eleccións de maio de 2007.

No BNG, esta pirueta pode acabar de afondarlle o chan electoral; ademais o acontecido acaba co seu discurso herdado da reconversión naval, porque se ben é certo, que os socialistas fixeron mal coa reconversión –aínda non houbo reindustralización – eles, os nacionalistas abríronlle a porta a unha ameaza directa á vida das persoas. Queda ver como vai afectar á seguridade da base naval ou á actividade do asteleiro militar de Navantia, evidentemente, poden deslocalizarse, pero, ¿Que facer coas persoas? De funcionar Reganosa, só poderíase… evacuala cidade de cada vez que entrara un metanero. Imposible.

Aquí é necesario facer un apunte sobre Xaime Bello. ¿Por que se presta a esta operación cando esta a retirarse da política activa? Así, o BNG non pode reivindicalo seu mandato, nin a súa figura política.

Como militante socialista non acabo de entender que tres compañeiros concelleiros poñan paus nas rodas da candidatura á alcaldía de Vicente Irisarri. Deixar todo en mans do paso do tempo –quedan seis meses para as eleccións locais – ou a que nada vai pasar por, aínda que sexa de forma pasiva, apostar por unha forma de capitalismo do século XVIII, é arriscarse a moito. En calquera caso, os tres quedaran para sempre vinculados a estes feitos. É dunha enorme gravidade a responsabilidade que asumen.

Juan Fernández, coa súa coherencia neste tema amosa que aínda ten recorrido e pode dar moita guerra dentro do campo da dereita. Queda Yolanda Díaz convertida na única voz da esquerda que merece o respecto cidadán, non é estraño que nas enquisas sexa a concelleira mellor valorada polos ferroláns.

Estes días polemizaba cunha amiga, a través do correo electrónico, pola súa integración en Terra Galega. Evidentemente, a miña argumentación de que a presentación de pequenas candidaturas, que dificilmente ían ter representatividade municipal, prexudicaba á esquerda e facilitaba a reelección de Juncal, e por extensión, favorecía a continuación de Reganosa. Hoxe esta opinión non se sostén. Para isto abonda coa auto inmolación dos concelleiros socialistas e nacionalistas.

Máis, sigo a considerar que a candidatura duns supostos “Verdes” é oportunista. Que pode distraer a votantes de Yolanda Díaz; de Terra Galega, que é un invento de Xoán Gato para botarlle un pulso ao PSOE na deputación coruñesa e evitar así os cambios que Narón necesita.

Remato agradecéndolle ao amigo Lage a súa información do encontro da Conselleira de Pesca cos mariscadores da ría ferrolá. O asunto é que aínda cun acordo no que conten con eles e participen na rexeneración da ría, a principal ameaza, que é a utilización da auga por parte de Reganosa, que vai devolver cunha diferenza de cinco grados, acabará danando irremediablemente o marisqueo e fará imposible a recuperación medioambiental desta ría. Sigue adiante aquel plan da Xunta de Fraga, cando era Conselleiro Amancio Landín, de sacrificala ría ferrolá para usos industriais.

En calquera caso, recomendo seguir estes días a bitácora do Comité Cidadán, se queredes afondar na información sobre esta problemática. Tamén vos deixo unha selección de 10 fotos que saquei no Pleno do 17 de novembro.

En español

Os mariscadores da ría de Ferrol están poñendo a comarca patas arriba a pesar dos intentos da policía de impedilo. Pero, quizais o máis salientable é que están a descubrir, unha vez máis, ca ría de Ferrol morre por falta de coidado polas autoridades autonómicas.

Outra vez máis vese que non é o mesmo quen goberne. A xestión do PP ao fronte da Xunta de Galicia déixalle ao novo Goberno de Touriño un calvario que lle pode estoupar na cara se non pon solucións inmediatas para salvar a ría ferrolá.

A nosa ría está contaminada, e cada día máis morta, porque non se limpa, polos vertidos urbanos que multiplicáronse na última década, porque Forestal do Atlántico verte, co permiso da Consellería nacionalista de Industria un montón de merda que mata todo o que atopa. O que é incompatible co discurso do Conselleiro de Medio Ambiente, o socialista Pachi Vázquez, de pór coto aos desastres medio ambientais e industriais herdados de Fraga, coma así se veu no río Umia. Ademais, seguimos coa ameaza dun futuro funcionamento da Planta de Gas de Reganosa, a carón da empresa anterior, que botará 300.000 toneladas de auga contaminada á ría ao día.

A Xunta de Fraga chegou a publicar un libro en 1997, onde propoñía que a ría de Ferrol fose “sacrificada para usos industriais”. O libro estaba prologado polo entón Conselleiro de Pesca Amancio Landín. Os miles de millóns da Unión Europea que viñeron para o saneamento integral das nosas rías o gastaron indebidamente.

A ninguén se lle escapa que si acaban cos mariscadores e as Cofradías (a pesar das críticas que estas poidan recibir), desaparece o principal foco de oposición á entrada dos metaneiros na ría e á súa futura destrución total por parte dunha Reganosa, que non ten feita Declaración de Impacto Ambiental, nin cumpre as normativas de seguridade europeas (entre elas Seveso II), nin poderá cumprir mentres queira seguir dentro da ría ferrolá e non fóra da mesma.

A nova Xunta de Galicia debe dar unha resposta axeitada e que permita a recuperación dunha ría que podería triplicar o número de postos de traballo de mariscadores. As Consellerías de Pesca, Industria, Ordenación do Territorio e Medio Ambiente deben dar solucións e non quedar atrapados polos intereses escuros de aqueles que nos queren matar a nosa ría por unha falta de visión do que é o desenvolvemento sostible.

Outra ría de Ferrol é posible. Aínda estamos a tempo.

En español

Tras ter que aprazar do martes ao venres 19 de maio, por causa de forza maior, a parroquia naronesa de Ferrerías recibiu unha visita do PSOE. A delegación estaba formada por Catalina García, secretaria xeral do partido socialista en Narón, por Mario Isasi, secretario de política municipal da agrupación local e Ánxel Teijeiro, concelleiro socialista no Concello.

A visita, a esta miña parroquia materna e dos meus avós, causou un pequeno revoo. A verdade que hai moitos anos que ninguén se preocupaba polo que lles acontece aos meus veciños, amigos e familiares. Quizais, dende o principio da Democracia, cando o meu tío Leonardo, que aquela militaba no PCG, e hoxe no PSOE asturiano recollera as inquedanzas da miña xente.

O comunicado oficial do PSdeG – PSOE de Narón di:
“¿PERTENCE O LUGAR DE FERRERÍAS Ó CONCELLO DE NARÓN?

O pasado venres día 19 do presente mes, o Concelleiro de Ensino Ángel Teijeiro, o Secretario de Política Municipal da Agrupación Local Socialista Mario Isasi e a Secretaria Xeral Catalina García mantiveron unha xuntanza cos veciños de Ferrerías (Xuvia) para tomar nota e ver “in situ” a problemática do lugar.

“Pareceunos incríbel que de verdade seguíramos a estar no noso Concello, vendo o abandono ó que están relegados estes cidadás”, manifesta Catalina García.

Segundo declaracións dunha representante dos veciños “a derradeira vez que se fixo reclamación escrita e tamén de palabra foi polas pasadas eleccións municipais, o Alcalde en persoa nos prometeu solventa-los problemas que se lle expuxeron, ademais de acudir un día (dentro de Campaña Electoral) para ver todo por el mesmo.Vai facer catro anos e aínda non se nos fixo nin un só arranxo, non se atendeu nin unha soa demanda…”

Os representantes Socialistas tomaron nota de tódalas reivindicacións dos veciños e comprometéronse a facelas xestións oportunas coas distintas Administracións para que se solvente a precariedade na que se atopan en Ferrerías”.

O certo que o mesmo día que se sabía da xuntanza dos socialistas cos veciños, o sr. Alcalde Xoán Gato, mandou a uns albaneis para adecentar un pouco as aceras das Vivendas San Clemente, que datan a súa construcción en 1956. ¿Será casualidade?

En fin, os veciños están á espera de que desde o Concello de Narón se lles preste máis atención, e de que frutifiquen as xestións dos socialistas. En calquera caso, é de agradecer o interese de Catalina García e demais membros do PSOE de Narón.

Máis fotos.