Pittsburg

Hai unha década houbo outra viaxe á sede central de Alcoa en Pensilvania. Daquela foi a cargo de Rajoy e Feijóo, crendo que con aquel acordo arranxaba o problema das súas factorías españolas. Craso erro e, por medio, metéronnos a todos.

Estes días cúmprense 8 anos das mobilizacións de Megasa en Narón. A instancia de Feijóo, o entón ministro Soria modifica a orde ministerial IET/2804/2012 pola que, para facilitar as demandas de Alcoa, provocaba competencia desleal entre empresas do mesmo sector con tarifas eléctricas desiguais. Iso sumado á privatización de Aznar e Rato, que consolidara un oligopolio de 5 grandes operadores eléctricos, provoca a tormenta perfecta.

Todos desexamos que os traballadores/as de Alcoa logren unha saída de futuro con esta visita da ministra socialista Reyes Maroto. Oxalá, pero resulta curioso que unha multinacional aposte pola nacionalización de facto de Alcoa – Cervo.

https://www.diariodeferrol.com/texto-diario/mostrar/3058658/pittsburg

Aritmética variable

Os gobernos locais socialistas, de sempre, destacáronse por unha grande xestión. E o actual goberno suma unha enorme capacidade mediática e algunha concelleira todo terreo.

Iso vese na programación de cara ao verán cun feixe de iniciativas que saen directamente do Concello ou coa súa participación. De feito, o Partido Popular só tivo ocasión de criticar a falta de folletos turísticos nos primeiros días, cuestión debida a que até última hora non se sabía se a Armada ía abrir as súas instalacións a estas actividades. Acusar ao goberno local de falta de política turística choca coa realidade.

Si, a política local depende da “aritmética variable” da que fala o ex alcalde José Manuel Rey. Iso provoca que os grandes proxectos custen máis (aínda que a remodelación das Pías é outro tanto do Goberno Mato). Pero, iso non esgota nin a responsabilidade do goberno de liderar, nin a da oposición de sumar.

https://www.diariodeferrol.com/texto-diario/mostrar/3048342/aritmetica-variable

Samuel

Levamos días que nin a choiva dá un respiro. Este verán está a ser moi cru, pero esas bágoas insistentes da propia choiva, que nos empapan cada día, si decidiron parar para que puidéramos achegarnos este luns á Praza de Armas. Xusto media hora antes da convocatoria dounos un respiro, a modo de solidariedade co mozo coruñés morto por unha turba de covardes asasinos.

O impacto deste asasinato é tremendo. A resposta de Ferrol así o testemuña con esta concentración de repulsa. E, preguntámonos, como é posible tanto odio? Como temos normalizada tanta violencia? Como nestes anos os discursos ultras entraron nas nosas vidas con tanta impunidade?

Samuel somos todos. Hai uns días foi el, mañá será calquera, incluso aqueles incautos que cren estar a salvo e súmanse, sen reparos, ao relato miserable dos ultras. Xustiza para Samuel. Xustiza, defensa da democracia e dos dereitos fundamentais.

https://www.diariodeferrol.com/texto-diario/mostrar/3041053/samuel

O tempo no espello

Teño que recoñecer que paso con frecuencia polo Centro Cívico de Canido, convertido nun dos eixos culturais de Ferrol. Alí tiven, ademais, a ocasión de ser acollido na presentación do meu libro “A Terra Infinita”, algo que agradézolles moito. E, unha vez máis, atopeime con Roberto Taboada, esta vez subido ao teito xunto con outra xente para montar unha lonas que deran sombra, ao seu patio interior, ao día seguinte.

Eu ía a buscar a miña filla Sabela, que precisamente co seu coro “Tempo Novo” estaban co ensaio final. Así e tendo fondo musical, outra vez, paseime por esa biblioteca comunitaria que hai nunha das salas principais. Nesta ocasión, pareime nun libro de poemas, abrindo unha das súas páxinas, despois outra e outra. Ao final, non puiden resistirme. Tirei do teléfono, busquei na rede e acabei mercando un exemplar, o que dá título hoxe a esta columna, de Avilés de Taramancos, Ediciós do Castro.

https://www.diariodeferrol.com/texto-diario/mostrar/2977461/tempo-no-espello

As marxes de Ferrol

É certo que as marxes para facer política local en Ferrol son moi estreitas e, máis, cando vés dunha situación extraordinaria como a provocada pola pandemia do Covid-19. Por iso, a mellor política partidaria sempre é, nestes casos, arrimar o ombro e botar unha man. Pero, agora xa foi e a soidade do goberno de Angel Mato converteuse nun plus que deixa en evidencia ao resto dos grupos municipais.

Lembran a roda de prensa do PP sobre a metade de mandato? Foi flor dun día. O certo é que o goberno municipal de Ángel Mato está a gañar a batalla mediática e, o que é máis importante, na percepción na cidadanía. A isto hai que sumarlle a errada precampaña da Xunta contra o alcalde, aí está o “show” da entrega do saneamento ao Concello. E todos sabemos que en asuntos como na xestión das multas, non habería diferenzas con ningún candidato/a. No fondo é como ese baile coxo de Feijóo co uso das máscaras.

https://www.diariodeferrol.com/texto-diario/mostrar/2967949/sabores-ilustrados