Fender leña

Tomo prestada a expresión. Non descubro de quen é, simplemente, porque son o único responsable do que se diga aquí. O asunto vén por esa morea de xente que sabe e opina de todo, máis nun tempo no que algúns están empeñados en volver a tempos pretéritos. Todo isto acrecentado pola relevancia que agora dan as redes sociais. E como se di nestes “tempos modernos”, abro fío.

A partir do 2005 houbo unha explosión de blogues, aos que apuntouse medio país. Eu aínda manteño o meu. Pero, teño un amigo (espero que benevolente) que a cada “post” meu, el facía a disección oportuna. Así ata que un día canso, díxenlle que abrira un propio. Así fixo, publicou 3 ou 4 veces. Quizais esta é a cuestión, o falar non ten cancelas pero trasladar ideas ten un custe.

Por iso, como di Mercedes, o mellor é que moitas veces vaiamos a fender leña ao monte. É o tempo de limpalo e de acumular madeira para o inverno.

https://www.diariodeferrol.com/opinion/manuel-cedan/fender-lena/20180808232118233562.html

Facendo cidade

O novo orzamento municipal non foi unha tregua. Aquí e agora do que se trata -ou iso parece- é de “okupar” as páxinas dos xornais, darlle máis importancia ao “relato” que ao traballo a prol da veciñanza. A esta vella forma que teñen moitas e moitos políticos locais, súmanse outros dende determinadas asociacións históricas ou auto-convocantes que buscan o seu minuto de gloria. Como diría Gramsci, o vello non acaba de morrer e o novo de nacer, namentres xorden os nosos pequenos monstros.

Si, hai outro Ferrol que emerxe, que está a facer cidade, que suman esforzos. A estes últimos impórtalles ben pouco de quen ves sendo, senón que sexas rebelde -verdadeiramente- contra o solpor. Son novas xentes conscientes do seu dereito á cidade. Por iso, resultan tan incómodos tanto para os reaccionarios de dereitas, como para os reaccionarios de esquerdas (que tamén hai e máis do que cremos).

https://www.diariodeferrol.com/opinion/manuel-cedan/facendo-cidade/20180801222312232952.html

E quen paga?

Unha das consecuencias do camiño a esas municipais de 2019 tan incertas é a dura competencia entre as dereitas, que se radicalizan por momentos para así liderar o voto na Magdalena, usando como escusa a remodelación da praza de Armas. Ocultan que goberne quen goberne non vai a haber novo aparcadoiro, é inviable. De onde ían sacar elas os seis millóns de euros que os técnicos apuntan como custe previsible?

Un novo aparcadoiro só poderíase financiar cunha concesión e levantando unha área comercial en Armas, competidora -polo tanto- co comercio e a hostalería da Magdalena. Pero, non hai interesados. Mais, cando no centro hai entre o Cantón, Abastos e Praza de España 1220 prazas de aparcadoiro usadas a medio gas. Outra opción sería que fose financiado a costa de outros investimentos. Está a dereita disposta a detraer recursos dos demais barrios de Ferrol para financiar este capricho?

https://www.diariodeferrol.com/opinion/manuel-cedan/e-quen-paga/20180726000053232365.html

Unha cervexa, por favor!

O título non é por unha tolemia temporal, falta de cabeza ou por pasarme de freada. Non, só pretende dar a benvida a este primeiro festival da cervexa artesanal, que celébrase estes días na nosa praza da Constitución. Como moitas cousas que pasa nesta cidade, parte dunha iniciativa privada que vén a traballar por unha inexistente “marca Ferrol” ben necesaria. Así vemos como outros concellos teñen o seu festival folk ou o seu resurrection fest consolidado, nós non temos nada semellante.

Sacando este primeiro festival cervexeiro, os eventos que atraen á turistas e ao público en xeral, este mes de xullo, foron a parar a outros concellos. Mugardos ou Fene por non ir moi lonxe. Igual hai que pararse a pensar que Ferrol necesita unha programación que vaia alén de simples saltos de ra, que non se trata con ir dando a impresión de andar cumprindo por cumprir ou esperar ás nosas festas de agosto.

https://www.diariodeferrol.com/opinion/manuel-cedan/unha-cervexa-por-favor/20180719004106231718.html

O mercado de Caranza

A xente do mercado de Caranza debe estar cansa de tanto esperar, de tantas palabras baleiras, de tantos anos. Pero, o certo é que a xerente de Urbanismo -nas recentes xornadas do Foro Ferrol Vivo- falaba de que xa estaban os pregos da licitación e que esta remodelación parcial ía para oito meses, de ser así van a estar moi apurados desde o actual grupo de goberno para poder inaugurar o novo mercado, se non queren coincidir coas novas eleccións municipais, datas prohibidas para eses faceres.

A esta primeira fase, terá que vir outra máis que, en verdade, converta a eses quince mil metros cadrados nun elemento central e aglutinador das actividades comerciais, de servizos, deportivas e socio-culturais que complemente Caranza, así recollido como tal no actual PXOM. Agora vai a reorganización interior dos postos do mercado e o seu equipamento adecuado ás novas necesidades, montacargas de servizo e a mellora do acceso peonil e un ascensor desde a avenida de Castelao… Unha boa nova.

Enlace a Letras de Cambio (Diario de Ferrol).